!Sermitsiaq02_2008 36-1.
Kalaallinngorsaaneq, imaluunniit?.
All. Finn Heilmann, Nuuk.
Arabiamiut Tveqarfiat Al Jazeera, oqariartuuteqarpoq ilisarnaatigisaminik ima imalimmik: Ataasivimmik isumaqarputit  allamillu (One Opinion And Another). Taanna naalakkersuisut siulittaasuata, aamma partimut Siumumut siulittaasuusup sammiviginiaraluagaanut tulluarsorinarpoq. Unali aallaqqaataaniit erseqqissumik oqaatigineqarli: Tamatumani partip Siumup politikia uparuartorniarneqassanngilaq. Tamanna partit illua-tungiliuttut soorunami atorluarniarsarigaluarpaat, aamma taakkunannga paasinarsinnaasumik, kisianni isumaqartitsiniassalluni partii Siumut tamanut inissaqartitsinngitsoq, taanna peqquserluinnarnerunani eqqortuunngilaq. Partip siulittaasuata saqqummertarnermigut aarlerinaatigisaa, tassalu kalaalinngorsaanerarluni, ima malitseqaannarpoq inuiaqatigiinni aaqqissuussaanitsinni innuttaaqatigiit ilaannik taamannanik mattussiinnalermat, una tunngavilersuutigiinnarlugu Namminersornerullutik Oqartussani naalakkersuisoqarfinni atorfilittatut pisortanik atorfinitsitsinissamut atatillugu soraarsitsisoqarnavianngitsoq. Ila ukorsii, ajornartorsiut suunngikkaluassusia, tassalu naalakkersuisoqarfinni atorfilittatut pisortanik kalaallisut oqalussinnaasunik atorfinitsisoqarniarnera. Tamannami nutaarsiassartaqanngilaq taaguutitaassaat eqqaassanngikkaanni. Qinnuteqartummi arlariippata, aappaalu kalaallisut oqalussinnaasoq, aappaa pisinnaanani, kisiannili tamarmik piginnaasamikkut naligiissinneqarpata, taavami taannaassajunnarsivoq kalaallisut pisinnaasoq atorfinitsinneqartussaq?!.
Tamatta inissaqarpugut.
Oqaaseq kalaalinngorsaaneq oqaaseruna naapertuutinngivissoq, ilami kalaalinngorsaaneq taaneqaannartorlu kalaaleq kinaluunniit oqaatsini atugaralugit tulluusimaarutilik nikussaassaaq, pingaartumik qanoq pineqarsimanini eqqaallaatigalugu nunasiaataaffiusimagami, nunasiaataajunnaarfiulerami, danskit allaffissuarmiimmata, tikisitat ilaalu ilanngullugit eqqaallaatigalugit. Qanormi paarlattuanik oqarutta? Danmarkimi danskinngorsaaneq? Taava immaqa paasineqassagaluarpoq Danmarkimi taamaaliortoqanngimmat, uku qajaqatiginngikkaanni Dansk Folkeparteermiut anersaapiloqataallu allanertanik asissuisut. Naagga, Danmarkimi allaat noqqaasoqarpoq allanertanik ilinniagartuut sulisussarsiariumallugit, ilami, allaat assersuutigiinnarlugu Indiamukartalerput danskisut pikkorissartikkiartorlugit nakorsatut Danmarkimut suliartortinnagit. Tamannalu qanoq isumaqarpa? Imaappoq, ilinniagaqartunik Danmarkimi amigaateqartoqarpoq, taamaattumillu uagut uunga ajuusaarnaqisumik inisseriaannaassalluta ilinniagartuunik sulisussarsisinnaassanata taakku pisariaqartinneranni. Ilinniagaqartunik Nunatsinnut aggersaasinnaajunnaassasugut ukuninnga nunaqqatitsinnik ukiuni taamaannani Danmarkimi nunaluunniit allani ilinniagaqarsimasunik. Unami eqqaamaniagassaq tassaavoq matumani pineqartut tassaaginnaanngimmata pisortat allaffissuini imaluunniit ingerlatseqatigiiffinni pisortat pigisaanni sulisut. Tamatumanimi partip siulittaasuata oqariartuutaa ima kusanaatsigaaq suliaqarfinnut allanut aamma sunniuteqalereerluni naapertuutinngitsumik. Tassaniipporli oqimaaqatigiissitsisariaqarnerput. Oqimaaqatigiissillugu, illua-tungaani isumannaassallugu kalaallit meeqqat inuusuttullu atuartinneq qarlutillu ilinniagaqarnissaat, taamaasillutillu tikisitat atorfiinik tigusisinnaalernissaat, illuatungaanillu tamat inuiaqatigiinni uatsinni inissaqartinneqarsinnaanissaat, ima pinnata immikkoortitsilereerluta Nunatsinni kalaallisut oqaatsitsinnik piginnaasaqarluartut (taakkulumi aamma ikeqalutik) kisiisa pisinnarlugit allat kalaallisut oqaatsitsinnik annerusumik pisinnaasaqanngitsut sussakkeerlugit. Imaluunniit oqaatigilluaannarlugu: Ilavut annaarataannaavavut. Tamakkumi pinianngikkutsigik, taava Steffen Brandtitulli nipilersoqatigiinnit TV 2-meersumit Danmarks Radiop Juullimut Inuulluaqqusinerani oqaatigisaatut piinnarta: Soormi ikinngutigiiginnarutta?!.
Socialisme.
»Sanngiinnerpaartatik qanoq pisarnerlugit inuiaqatigiit taakku ilisarnaatigaat.« (Vagn Greve). Issuaaneq taanna pissarsiaraara inoqatinnit ataqqilluinnakkannik. Issuagarlu taanna sulisartut kattuffianni amigaateqarani imaannaasimanngikkaluamut assut eqqarsariaallatsitsivoq. Nunatsinnimi tusagassiorfiit SIK saaffigigajuttarpaat inuiaqatigiinni sanngiitsortavut qanoq pisarnerivut pillugu, qanoq pisarnerivut suliamik ilinniagaqarsimanngitsut. Kisianni erseqqissaatigilara una: SIK-p tamanna sianigisaqarfiginngilaa! SIK ilaasortaqanngilaq suliffeqanngitsunik! Taakkuninnga suliffeqaratik, inissiassaqaratik, aappaqaratik, innarluuteqarlutik, toqqutissaminnik nappaateqartunik siunissaqaratik, taakkuusunik illersorneqanngitsunik. Partiimi socialistiskimik tunngaveqartumik ilaasortaasutut kiinaallertarpunga inuiaqatigiinni sanngiinnerpaartatsinnik akisussaassuseqarneq ajoratta. Isumaqaannartaratta imerniartarfiuteqarutta iluanaaruteqarfissatsinnik, taakku orniguttartut sussakkiiginnarsinnaallugit. Inoqativut nikagalugit pisinnaanerarluta. Kisianni, inuiaqatigiinni tamat tamaasa inissaqartikkumagutsigik qamannga uummammit pisumik isaassisinnaasariaqarpugut, taama pineqarumalluta killissarput tikikkutsigu ikiortariaqarnermik. Kalaaleq kalaalinngorsarneqarsinnaanngilaq. Ilami taanna taamaareerpoq!.