!AG20_2008 11-1.
Peqatigiinniat ukiuni 100-ni.
Peqatigiinniat ullumikkut nunarput tamakkerlugu 220-nik ilaasortaqarpoq.
Allattoq: Bikki Reimer Nutserisoq: Gâbánguaq Johansen.
Nuuk.
Nunatsinni peqatigiiffiit siullerpaartaasa ilaat, Peqatigiinniat, marsip 13-iani ukiunik 100liilluni nalliuttorsiussaaq. Ukiuni arlaqalersuni aningaasaqarnikkut ajornartorsiortarsimagaluarluni peqatigiiffik Organip Aqqutaani Nuummiut oqartarnerattut »Illu Qaqortoq«-mi suli ingerlanneqarpoq. 1903-mi ajoqimi maanna toqoreersimalersumi, Niels Lyngemi, bibelimetut aallartippoq, tamatumanilu aamma qanoq peqqinnarnerusumik inuusoqarsinnaanera oqaluuserineqartalerluni, Magnus Larsen, ukiuni 35-ni Peqatigiinnianut ilaasortaasimasoq, oqaluttuarpoq. Ullumikkut taanna palasitut soraarninngorsimavoq peqatigiinniallu pillugit marlunnik atuakkiorsimalluni 1999-imi aamma 2003-mi saqqummersinneqartunik. Peqatigiiffippalaarnerusumik sulinissaq kissaatigalugu S.W. Schultz-Lorentzenimit, Steffen Møllerimit, Niels Lyngemit aamma Sejer Abelsenimit peqatigiiffik Peqatigiinniat pilersinneqarpoq. Ikiorsiisarneq atuutinngikkallarmat Peqatigiinnianit iliarsunnut anaananullu kisermaanut ikiuunnissaq pingaartilluinnarneqarsimavoq. Piniagassat ajornarsinerisa nalaanni aamma Peqatigiinniat ikiuuttarsimapput. Taamaattumik piniakkanik suugaluartunilluunniit tunisisoqaraangat isertitat ilaannik immikkoortitsisoqartarpoq ikiuiniarnermi siunertanut pitsaasunut imaluunniit piniagassat ajornarsinissaannut. Piffissap ilaani aamma innuttaasut Peqatigiinnianullu ilaasortat pissakinnerusunut umialiorlutillu qaanniortarsimapput, anaanat kisermaat ammassiartarsinnaaqqullugit meeqqallu qaannaminni piniarniartarsinnaaqqullugit. Peqatigiinnianut ilaasortat arnartaat mersukkaminnik nioqquteqarnermikkut peqatigiiffimmut aningaasanik pissarsiniartarput. Ullutsinni ulapaarfiusuni bingortitsineq peqatigiiffitsinnut aningaasanik pissarsiniarnissamut periarfissatuaalersimavoq, Magnus Larsen oqaluttuarpoq. Upperisarsiornermiit oqallinnermut.
Peqatigiiffik 1908-p missaani ingerlallualermat Nuummi innuttaasunut 300-t missaanniittunut oqallittarfinngoriartulerpoq. Ukioq taanna peqatigiiffik ataatsimeersuaqqaarmat illoqarfimmi innuttaasut marloriaataannik amerlassusillit peqataapput nunaqarfinniit ataatsimeersuarnermut peqataajartortut inuppassuit tikerarmata. Taamanimi pisoq angisuujuvoq isumaginninnikkut ajornartorsiutinik peqatigiiffik isumaginnittuummat, Magnus Larsen oqaluttuarpoq. Ajoqiuneq Jonas Petersen Qasigiannguaneersoq 1925-mi nunatta nunasiatut inissisimaneranik oqallitsitsilerpoq nunasiaatillit apeqqusernerisigut. Taanna Peqatigiinniat atuagassiaanni atuartartut allagaannik allagaqarpoq, tassanilu apeqqutigalugu nammineernerulernissamut piffissanngulinnginnersoq. Taamaalinerata nalaani apeqqut tamanna kimilluunniit apeqqutigissallugu sapiississutigineqanngilaq, taamaattumik taamani sakkortuumik oqallittoqartarsimassaaq. Nunasiaataaneq pillugu sammisap oqaluuserilernissaa ulorianartorujussuuvoq, ajoqiunerli tassa taamaaliorpoq. Taamaattumik oqartoqarsinnaavoq Peqatigiinniat ineriartornermut, perorsaanermullu nutarterinermullu 1920-kkuunniilli peqataasorujussuusimasoq, Magnus Larsen oqaluttuarpoq.
Meeqqat peqatigiiffeqarnerlu.
Ullumikkut Nuummi Peqatigiinnianit meeqqanut peqatigiiffik Nutaraq aallartinneqarsimavoq, taannalu meeqqanik perorsaanermut inuiaqatigiinnilu ineriartornissaannut ilapittuutaanissamik siunertaqarpoq. Meeqqat innuttaasunut pingaarutilimmik ilaapput, taamaattumik aamma peqatigiiffeqartariaqarput. Ullumikkut Nutaraq 29-nik ilaasortaqarpoq. Sapaatini ualit tamaasa ataatsimuualaarnernik aaqqissuussisarpugut, tamakkunanilu assigiinngitsut oqaluuserineqartarput meeqqanullu pingasut 15-illu akornanni ukiulinnut aaqqissuussisoqartarluni, Magnus Larsen oqarpoq. Peqatigiiffilerinernut tamanut piffissaq ilungersunartuuvoq. Uagut peqatigiiffitsinnuinnaq ukiut tamaasa 145.000 koruunit nalinginut aningaasartuuteqartarpugut. Illuuterput innuttaasunut sunulluunniit atatillugu attartortissinnaavarput, kisianni annermik bingortitsineq peqatigiiffiup aningaasaqarneranut ingerlassissutaavoq. Sapaatit tamaasa bingortitsisoqartanngikkaluarpat aningaasaqarnerput ajorluinnassagaluarpoq, Magnus Larsen naggasiivoq.