!AG04_2008 05-2.
Aatsitassat pillugit isumaqatigiissut paatsuungassutaasoq.
Uuliasiorneq pillugu qallunaat kalaallillu isumaqatigiissutaannut tapersersuisut akerliusullu isumaqarput isumaqatigiissutip imarisaa ministeriunermit paasilluarneqarsimanngitsoq.
Allattoq: Christian Schultz-Lorentzen Nutserisoq: Gâbánguaq Johansen.
København.
Kalaallit Nunaanni uuliaqarpat ataatsimoortumik tapiissutit Danmarkimit matussusertinneqareerpata uulia Kalaallit Nunaata pigisassarissavaa. Taama namminersorneq pillugu isumalioqatigiissitami isumaqatigiissummi partiinit tamanit Dansk Folkeparti minillugu isumaqatigiissutigineqartumi allassimasoqarpoq, Folketingimut Inatsisartunullu ilaasortaq Lars-Emil Johansen (Siumut) erseqqissaavoq. Taanna oqarpoq, ministeriuneq Anders Fogh Rasmussen (V) »kukkuluttortoq«« sisamanngornermi isumaqatigiissut avitseqatigiiffiusutut, Kalaallit Nunaata Danmarkillu aatsitassarsiornermit isertitanik avitseqatigiiffigisaattut, eqqaagamiuk, Ritzau allappoq. Søren Espersen Dansk Folkepartimeersoq aamma isumaqarpoq, ministeriunerup isumaqatigiissut paatsoorsimagaa, isumaqatigiinniarnerit ammaanneqaqqinnissaannik siunertaqarsimanngikkuni, DF-imi taamaaliorusummat, namminersorneq pillugu isumalioqatigiissitami isumaqatigiissummut partii akerliummat. Oqalliseqqilernissarli ministeriunerup kissaatigisimassagaa LarsEmil Johansenip ilimaginngilaa, Venstre isumalioqatigiissitami isumaqatigiissummut tapersiilluni taaseqataasimammat. Politikikkut nutaamik pisoqalersimanissaa ilimaginngilara. Oqqarliorneruvoq, Foghip oqaasii pillugit Lars-Emil Johansen oqarpoq.
Allannguisoqanngitsoq.
Statsministereqarfimmi tusagassiisartut pisortaat Michael Ulveman AG-mut oqarpoq, nutaaqanngitsoq. Namminersorneq pillugu isumalioqatigiissitami isumaqatigiissutaagallartumut ministeriuneq isumaqataalluinnarpoq. Ritzau saqqummiussaminik sukaterisimavoq. Taamaattumik paatsuungasoqalerpoq. Kalaallit Nunaanni aatsitassarsiornermit isertitaalerumaartussat qanoq agguataarneqarnissaat pillugu isumalioqatigiissitamit saqqummiussamut ministeriuneq isumaqataavoq, Michael Ulveman oqarpoq. Namminersorneq pillugu isumalioqatigiissitami isumaqatigiissut naapertorlugu ukiumut aatsitassarsiornermit isertitat siulliit 75 millioner koruunit Kalaallit Nunaata pisassavai. Tamatuma kingorna isertitat Kalaallit Nunaannit Danmarkimillu aveqatigiissutigineqartassapput Danmarkimit Kalaallit Nunaannut ukiumoortumik tapiissutit 3 milliarder sinneqalaartut Danmarkimit matussusertinneqarnissaat tikillugu. Ataatsimoortumik tapiissutit matussuserneqarpata aatsitassat Kalaallit Nunaannit pigineqartussaanerat aallaavigalugu illuatungeriit isumaqatigiinniaqqilissapput. Taama isumaqatigiissutip isumalioqatigiissitamut ilaasortamit Lars-Emil Johansenimit paasineqarpoq, aamma isumalioqatigiissitamut ilaasortamit Kristen Touborgimit (SF) Søren Espersenimillu (DF), naak kingulleq isumaqatigiissummut akerliugaluartoq.
Akissut ersernerluttoq.
Kisianni Ritzau naapertorlugu nutaarsiassaqartitsivimmit tusagassiortut ilaannit ataatsimoortumik tapiissutit matussuserneqareerpata qanoq pisoqarnissaanik aperineqarami ministeriuneq ima akissuteqarsimavoq: Taava siunissami aaqqissuussinissaq pillugu Danmarkip Kalaallit Nunaatalu akornanni isumaqatigiinniartoqalissaaq. Isumaqarpungali tamatumani siunissaq ungasingaatsiartoq pissusiviusuni pineqartoq, Fogh oqarpoq. Ritzau: Tassa Kalaallit Nunaata aatsitassanik tamakkiisumik piginnittunngornissaa siunniunneqarsimanngilaq? Siunissami aatsitassarsiornermit isertitat tunngaviatigut 50/50imik avinneqartarnissaat siunniunneqarpoq. Isumaqarpunga tamanna aaqqissuussinerusoq naapertuilluartorujussuaq, ministeriuneq oqarpoq. Pilersaarut nutaaq malillugu isumalioqatigiissitaq qallunaanik kalaallinillu inatsisartunik ilaasortaqartoq februaarip naanerani suliaminik naammassinnippat isumalioqatigiissitap isumaliutissiissutaa Kalaallit Nunaanni Danmarkimilu naalakkersuinikkut siuttunit oqaluuserineqalissaaq. Taama pisoqareerpat namminersorneq pillugu ukioq manna novembarimi innuttaasut taasitinneqarnissaat naalakkersuisut siulittaasuannit siunniunneqarpoq. Namminersorneq annertusisaq 2009-ip qiteqqunnerani namminersornerunermut ullumikkut atuuttumut taarsiullugu atuutilersinneqassaaq.