!AG06_2008 02-1.
Napparsimasunik oqaluttuaq.
Mianersoqqussutit imaaginnavikkaluartut peqqinnissaqarfiup naalakkersuisunit nunatsinnut nuunneqarnera aningaasaliissutillu imaaliallaannaq ikililerneqalernerat peqqinnissaqarfimmullu ataatsimoortumik aningaasaliissutit pingaarutillit ilaannik siunertanut allanut atuipiluttoqalernera ajorluinnartumik kinguneqalersimavoq. Taama milluaanermik periuseq akisussaassuseqanngitsoq tamanna taamanernilli peqqinnissaqarfitta aningaasassaqarneranik killilersuilersimavoq. Tamanna nunatsinni peqqinnissaqarfiup Danmarkimilu peqqinnissaqarfiup imminnut ungasilliartuinnalersimanerannut pissutaavoq, taamaalillutimmi kalaallit napparsimasut amerlanertigut eqqumiigeqisaminnik Danmarkimi napparsimasutut imaaliallaannaq katsorsaariaatsinik pitsaanerpaanik neqeroorfigineqartarunnaarsimapput. Innuttaaqatitsinnut pissarissaarnerusunut ilaginnaaginnartunut pissutsit soorunami taamaanngillat. Taakku napparsimmavinni namminersortuni tamalaanik suliaritinnernut akiliisinnaassuseqarput. Imaluunniit naammattumik nuimassuseqarsimagunik pisortanit akiliunneqartussanngortittarlutik. Inuiaqatigiinni nuimanernut nuimannginnerusunullu agguataarneqarsimasuni pisuut piitsullu assigiinnginneruleriartuinnarfigisaanni misigisartakkatsitut katsorsarneqarnissamut periarfissat pineqartillugit aamma naligiinngilagut. Aningaasaateqassuseq aalajangiisuusarpoq. Imaanngilarli kikkut tamarmik ilaginnarneqarnerat oqaatigineqartoq. Danmarkimi inuunermut pingaaruteqarluinnartumik katsorsartinnissanut akuerisaasoqartarpoq. Akerlianik amerlanertigut kisimiittarput. Kiserliornerminni napparsimasut nappaatitik sualuttorujussuit inuunermullu aarlerinartorsiortitsisuusut pillugit ernummateqarnerminnik akiugassaqartarput. Napparsimasunut nalinginnaasunut ilaqutaasunik ingiallorteqartitsinissamut aningaasatigut tapiissuteqarnissaq pineqartillugu pisortat imaaliallaannaq akuersitinneqarsinnaasanngillat. Uffa napparsimasut sapinngisamik toqqissisimanarnerpaanik avatangiiseqartillutik ajorunnaalertornerusarnerat ilisimatusaatinit tamalaanit misilittakkanillu takutinneqartaraluartoq. Tamatuma akerlianik asasanut maqaasineq sungiussimasanullu angerlarserneq annertuallaaleraangata amerlanerit perulunnerulersarput. Taamaattumik siunissami Danmarkimi katsorsartikkiartortussanut ingiallorteqarnissap ajornannginnerulernissaa anguniarlugu piffissami matumani atsiornernik katersisisoqarnera pissutissaqarluarpoq. Tamannali timmisartumut bilitsiliinerinnakkut kiisalu najugaqarnerup tamakkiisumik ilaannakuusumilluunniit akilerneqarnerinnaatigut aaqqinneqarsinnaanngilaq. Aamma piffissami sivikinnerusumi sivisunerusumiluunniit suliffigisamit inatsisit naapertorlugit sulinngiffeqarallarsinnaanissaq pisariaqassaaq. Inuiaqatigiinnut suliassap tamatuma aaqqinniarnissaa ajornaatsuinnaanngimmat nassuerutigisariaqarpoq. Kisianni taamaaliunnginnissamut akissaqanngilagut. Napparsimmaveqarnikkut periarfissanik pigisaqartinnata aammami pissutsit suli ukiorpassuarni taamaassammata innuttaaqatitsinnillu ilaquttanillu kilometererpassuarnik ungasissusilimmut aallartitsisariaqartartilluta taakku pitsaanerpaanik avatangiiseqarnissaannut katsorsarneqarnissamullu pitsaanerpaanik periarfissaqartitaanissaannut akisussaaffimmik inuiaqatigiit soorunami tigusisariaqarput. Taamaattumik politikerit itisuumik sininnerminnit iternissaannut piffissanngorpoq. Aap, tamatuma qangalili pisimannginnera paasiuminaappoq. Aatsitassarsiornermit uuliasiornermillu milliarderpassuarnik isertitaqalernissaq naalakkersuisunit oqaluuseriumaneqarumasarpoq. Kisianni politikerit imminnut tammartitaralutik piviusunik qimarratiginninnertik qaangerlugu allanngortitsillutillu innuttaasut ajornartorsiutaasa tunngaviulluinnartut ilaannik aaqqiissuteqaraluarunik tamanna kusassaatigissagaluarpaat.