Regjeringa foreslår i revidert nasjonalbudsjett å løyve om lag 600 millionar kroner over Fornyings-, administrasjons- og kyrkjedepartementets budsjett som følgje av åtaket mot regjeringskvartalet 22. juli. Midlane skal blant anna brukast til fysisk og teknisk sikring av regjeringskvartalet og erstatningslokala, meir tryggingspersonell, oppgradering av datanettet for sensitiv informasjon og husleige for erstatningslokale. Med løyvingar på andre budsjettkapittel er det i revidert budsjettet fremja forslag om totalt 770 millionar kroner.
- Arbeidet med å utbetre regjeringskvartalet og sikre nye og gamle departementslokale har pågått kontinuerleg sidan åtaket 22. juli. Løyvingane som følgje av terrorangrepet mot regjeringskvartalet 22. juli er no totalt oppe i om lag 1,45 milliardar kroner, seier fornyings-, administrasjons- og kyrkjeminister Rigmor Aasrud.
I det vedtekne budsjettet for 2012 er det sett av 250 millionar kroner til å dekkje kostnader som følgje av åtaka mot regjeringskvartalet 22. juli i fjor. Berekningane blei gjorde kort tid etter 22. juli i fjor. Arbeidet har vist seg langt meir omfattande. Samla behov for 2012 er i dag berekna til om lag 850 millionar kroner. I 2011 blei det utgiftsført 340 millionar som følgje av angrepet mot regjeringskvartalet.
Fysisk sikrings- og utbetringsarbeid i regjeringskvartalet
Regjeringa foreslår å auke løyvinga til sikring og utbetring av regjeringskvartalet med 135 millionar kroner. Totalt 165 millionar vil bli nytta i 2012. Løyvinga blir foreslått på budsjettet til Statsbygg.
Fysisk sikring av erstatningslokale
Regjeringa foreslår å løyve 187 millionar kroner til tryggingstiltak i erstatningslokala for departementa. Løyvinga blir foreslått på Statsbyggs budsjett.
Meir tryggingspersonell
Regjeringa foreslår å styrje driftsbudsjettet til Departementas servicesenter med 24,5 millionar kroner til blant anna oppbemanning av vakt- og tryggingspersonell i regjeringskvartalet og i dei nye lokala til departementa. Auka bemanning trengst for å ta vare på tryggleiken i departementa sine erstatningslokale. I ein overgangsfase er det behov for innleigde vektarar frå private selskap. Utgiftene til slike vektartenester er berekna til 55,9 millionar kroner i 2012. Det er òg lagt inn 16 millionar kroner som følgje av meirutgifter til blant anna møblar og kontorutstyr. Samla forslag til auka løyving etter angrepet er på 96,4 millionar kroner.
Teknisk sikring i regjeringskvartalet og erstatningslokale
Regjeringa foreslår å løyve 45,6 millionar kroner i hovudsak til å etablere grunnsikring av regjeringskvartalet og i departementas nye lokale. Beløpet omfattar anskaffing av teknisk utstyr som alarm- og tilgjengekontrollsystem, kortlesarar, overvakingskamera og utstyr til vaktsentral.
Oppgradering av IKT-tryggleiken
Regjeringa foreslår å løyve 11,5 millionar kroner for å utbetre dekningsgraden for Nødnett, og til å etablere eit gradert nettverk for alle departementa.
Husleige for erstatningslokale
Statsbygg leiger erstatningslokale som departementa nyttar etter angrepet 22. juli. Tilpassing av lokala til departementa sine formål og behov blir dekt over husleiga. Regjeringa foreslår å auke løyvinga til Statsbygg med 133 millionar kroner for å dekkje husleiga for erstatningslokala.