Du er her:
Pressemelding, 08.10.2012
Nr.: 95/12
Statsbudsjettet 2013:
Filmsatsinga fortset i 2013
Regjeringa held fram satsinga på film og foreslår ein auke til filmfeltet på nær 38 millionar kroner.
I kulturbudsjettet for 2013 foreslår regjeringa å løyve totalt 744,7 millionar kroner til film- og medieformål. Av dette er om lag 447 millionar kroner direkte stønad til audiovisuelle produksjonar via Norsk filminstitutt. Auken gir rom for ei større satsing på kvalitetsheving og internasjonalisering for norsk film, for å nå målet om at norsk film skal hevde seg internasjonalt og oppnå internasjonale prisar. Regjeringa gir 10 millionar kroner til internasjonalisering i 2013. Samstundes skal det satsast sterkare på å auke mangfaldet i norsk film- og fjernsynsproduksjon.
Den totale auken på feltet gjer det også mogleg å auke tilskota til fjernsynsdrama. Regjeringa gir 9 millionar kroner meir til fjernsynsdrama generelt og til fjernsynsdrama for barn og unge spesielt i 2013.
Tilskotet til utvikling av dataspel blir auka med 5 millionar kroner. Regjeringa sitt mål om å doble tilskota til utvikling av dataspel frå 2011-nivå innan utgangen av Kulturløftet II i 2014 vil med dette vere nådd.