Du er her: regjeringa.no / Finansdepartementet / Pressesenter / Pressemeldingar / 2012 / Framlegg om å styrke Bankenes sikringsfond
Pressemelding, 11.05.2012
Nr.: 11/2012
Framlegg om å styrke Bankenes sikringsfond
Finansdepartementet har sendt på høyring eit framlegg om å styrke kapitalen i Bankenes sikringsfond. Framlegget inneber at bankane skal betale ei avgift til fondet kvart år, uavhengig av storleiken på fondet. I dag er det i praksis ei øvre grense for storleiken på sikringsfondet.
I dag vert det ikkje kravd inn avgift frå dei bankane som er medlem av Bankenes sikringsfond når fondet overstig det lovfastsette minstekravet til storleiken på fondet. Det vart til dømes ikkje betalt avgift i 2011 og 2012. I dei åra då bankane har betalt full avgift til sikringsfondet, har summen av årleg innbetalt avgift lege på omlag 1,7 milliardar kroner.
– Dersom den øvre grensa for storleiken på sikringsfondet vert avskaffa, kan ein byggje opp fondet slik at det vert betre i stand til å handsame problem i større einskildbankar, og dei problema som rammar fleire bankar samstundes. Kapitalen i sikringsfondet er òg viktig for tiltrua til den norske innskotsgarantiordninga, seier finansminister Sigbjørn Johnsen.
Fristen for å komme med høyringsfråsegner er 6. august 2012.
Les meir: