Politidirektør Ingelin Killengreen (63) blei i statsråd i dag utnemnd til ny departementsråd i Fornyings-, administrasjons- og kyrkjedepartementet (FAD). Killengreen overtek etter Karin Moe Røisland som går av med pensjon.
- Eg er veldig glad for at vi får ein ny departementsråd som har brei og solid leiarerfaring. Som direktør for Politidirektoratet gjennom 10 år og politimeister i Oslo i fem år før det har ho vore ein markant, synleg og tydeleg leiar. Før den tid har Killengreen i over ti år hatt ulike leiarjobbar i Justisdepartementet, blant anna som departementsråd. Killengreen kjenner den statlege forvaltninga godt, noko som er viktig i den jobben som ho no skal inn i, seier fornyingsminister Rigmor Aasrud.
Ingelin Killengreen har juridisk embetseksamen frå Universitetet i Oslo frå 1972 og har vore saksbehandlar, byråsjef, avdelingsdirektør, ekspedisjonssjef og departementsråd i Justisdepartementet. Ho har òg ein periode arbeidd som dommarfullmektig i Oslo skifterett. Dei siste15 åra har ho først vore politimeister i Oslo og deretter direktør for Politidirektoratet.
Det er ikkje fastsett når Killengreen vil tiltre som departementsråd i FAD.
![Ingelin Killengreen](/upload/FAD/Artikkelbilder/Ingelin_499.jpg)
Bilde: Ingelin Killengreen blei utnemnd til ny departementsråd i Fornyings-, administrasjons- og kyrkjedepartementet i statsråd i dag. Foto: FAD
![](/upload/FAD/Artikkelbilder/RAA_Killengreen_536.jpg)
Bilde: Nyutnemnd departementsråd Ingelin Killengreen saman med statsråd Rigmor Aasrud. Foto: FAD