Over halvparten av den vaksne befolkninga i landet har skaffa seg MinID, og både talet på brukarar og talet på påloggingar stig framleis. - MinID har utvikla seg til å bli ein formidabel suksess med dobling i bruken siste år, derfor foreslår regjeringa 13 millionar kroner i ei ekstraløyving, seier fornyingsminister Rigmor Aasrud.
Stadig fleire innbyggjarar nyttar seg av elektronisk kommunikasjon med det offentlege.
- MinID lukkast så godt fordi løysingar er svært brukarvennleg. Innbyggjarane skal ha eit digitalt førsteval i kontakt med det offentlege, og då er elektronisk ID nødvendig. Når alt kan gjerast på skjerm, sparer det offentlege pengar og for innbyggjarane blir det raskare og enklare, seier fornyingsministeren.
Med hjelp av fødselsnummer, sjølvvalt passord og ein eingongskode via sms, blir det mogleg for brukarane å levere sjølvmelding, byte fastlege, levere meldekort til NAV, søkje studieplass og studielån, få tilgang til pensjonsopplysningar og ei rekkje andre offentlege tenester.
Talet på offentlege etatar som bruker MinID er i stadig vekst. Den føreslåtte ekstraløyvinga på 13 millionar kroner i revidert nasjonalbudsjett er nødvendig for å handtere den auka pågangen frå innbyggjarar og frå offentlege etatar som ønskjer å ta i bruk løysinga. 2 150 000 av den norske befolkninga over 15 år bruker no MinID.
