Nemninga regjeringa vert i daglegtale nytta med to tydingar; om kollegiet samla under Kongens leiing i statsrådsmøte, og om kollegiet samla under statsministeren si leiing i regjeringskonferanse.
Grunnlova og konstitusjonell praksis avgjer kva saker som formelt sett må avgjerast i statsråd hos Kongen, og kva saker kvar statsråd kan avgjera sjølve. I båe tilfelle er regjeringskonferansen det sentrale forumet for dei politiske drøftingane før dei formelle avgjerdene vert tekne.
Regjeringas medlemer
Etter Grunnlova er det Kongen som i statsrådsmøte utnemner statsrådane og fastset kva departement dei skal styre.
Det vert ikkje sjeldan gjort endringar i departementsstrukturen, ved at saksområde vert overførte mellom departement eller ved at departement vert nedlagde/oppretta. Pr. februar 2007 er det 18 departement og 19 regjeringsmedlemer medrekna statsministeren.
Statsrådsmøte vert normalt halde fredag kl. 11.00, i Statsrådsalen på Det kongelege slott i Oslo.
Regjeringa møtest normalt to gonger i veka til regjeringskonferanse på Statsministerens kontor, til vanleg på måndag og torsdag. Som fyrste sak i regjeringskonferansen på torsdagar vert det halde førebuande statsråd.
Danninga av ei ny regjering startar når den sitjande statsministeren har søkt avskjed og Kongen har gjeve ein annan i oppdrag å danne ny regjering.
Noreg er etter Grunnlova av 1814 eit monarki der makta er fordelt på ei lovgjevande og løyvande myndigheit: Stortinget, ei utøvande myndigheit: Regjeringa, og ei dømande myndigheit: domstolane. Det er folket i val som indirekte utpeikar regjeringa, sidan regjeringa gjeng ut frå det/dei partia på Stortinget som har fleirtal eller styringsdyktig mindretal.