Oppdaterte budsjettal for 2011

Finansdepartementet har i dag lagt fram proposisjonen om ny saldering av statsbudsjettet 2011. Ein gjer greie for vedtekne og foreslåtte endringar i statsbudsjettet gjennom året og for endringar i berekningane for skattar og avgifter. Det strukturelle, oljekorrigerte underskotet i 2011 vert no berekna til 99 milliardar kroner, som er ein reduksjon på 9,8 milliardar samanlikna med berekninga i Nasjonalbudsjettet 2012. Den berekna bruken av oljeinntekter i 2011 ligg 24,3 milliardar kroner under 4-prosentbanen av kapitalen i Statens pensjonsfond utland ved inngangen til året. Samstundes er det oljekorrigerte underskotet minska med 22 milliardar kroner til 84,2 milliardar kroner.

I statsbudsjettet for 2011 la Regjeringa opp til å halde bruken av oljeinntekter reelt uendra frå 2010 til 2011. Det gav et underskot på statsbudsjettet på 128,1 mrd. kroner, når ein held statens petroleumsinntekter utanom og korrigerer for verknaden av konjunkturar, jf. tabellen nedanfor. Målt ved endringa i det strukturelle, oljekorrigerte underskotet som del av verdiskapinga i fastlandsøkonomien, innebar det framlagde budsjettet ei innstramming på knapt 0,2 prosentpoeng. Bruken av oljeinntekter vart berekna til å liggje 7,4 milliardar kroner over forventa realavkasting av Statens pensjonsfond utland i 2011.

Endringane i samband med Revidert nasjonalbudsjett 2011 reduserte det strukturelle, oljekorrigerte underskotet frå 128,1 milliardar kroner til 112,9 milliardar kroner. Berekninga for skattar og avgifter frå fastlandsøkonomien vart oppjustert med 13 milliardar kroner etter justering for verknaden av konjunkturutviklinga (strukturelle skattar). Berekninga for øvrige postar styrkte budsjettet med netto 2,2 milliardar kroner, i hovudsak som følgje av auka utbytteinntekter.

I Nasjonalbudsjettet 2012 vart berekninga for det strukturelle, oljekorrigerte underskotet i 2011 sett ned til 108,8 milliardar kroner. Berekninga for strukturelle skattar vart oppjustert med drygt 4 milliardar kroner.

Berekninga for det strukturelle, oljekorrigerte underskotet vert no ytterlegare redusert. Ny informasjon om likninga og skatteoppgjeret for inntektsåret 2010 syner at utlikna skattar frå føretak utanom oljeverksemd auka kraftig frå 2009 til 2010 og meir enn det som vart lagt til grunn i Nasjonalbudsjettet 2012. Utlikna skatt frå personlege skattytarar auka meir enn det som vart lagt til grunn tidlegare. Ein gjennomgang av den nye informasjonen tilseier at berekninga for strukturelle skattar i 2011 vert sett opp med om lag 3 milliardar kroner.

Øvrige postar utanom skattar og avgifter bidreg til å redusere det strukturelle, oljekorrigerte underskotet med 6,8 milliardar kroner samanlikna med berekningane for 2011 i Nasjonalbudsjettet 2012. Det strukturelle, oljekorrigerte underskotet i 2011 kan etter dette bereknast til 99 milliardar kroner, som er 9,8 milliardar kroner lågare enn det som vart lagt til grunn i Nasjonalbudsjettet 2012.

Målt som del av verdiskapinga i fastlandsøkonomien vert det strukturelle, oljekorrigerte underskotet berekna å bli redusert med 0,6 prosentpoeng frå 2010 til 2011. Budsjettet for 2011 framstår dermed no som litt meir innstrammande enn tidlegare berekna.

Sidan Stortinget vedtok budsjettet i fjor haust, er det oljekorrigerte underskotet på statsbudsjettet redusert med 50,8 milliardar kroner. Reduksjonen skuldast i stor grad auka skatteinntekter frå fastlandsøkonomien, særleg som følgje av høgare skattar frå næringslivet enn lagt til grunn i Nasjonalbudsjettet 2011, auka utbytteinntekter og reduserte renteutgifter. Det oljekorrigerte underskotet i 2011 vert no berekna til 84,2 milliardar kroner. Dette underskotet vert dekt ved ei tilsvarande overføring frå Statens pensjonsfond utland.

Berekninga for staten sin netto kontantstraum frå petroleumsverksemda i 2011 er sett opp med 64,5 milliardar kroner frå saldert budsjett, til 352,5 milliardar kroner. Oppjusteringa skuldast hovudsakleg høgare petroleumsprisar i 2011 enn berekna i fjor haust.

Den reelle, underliggjande utgiftsveksten på statsbudsjettet vert no berekna til 2¼ prosent i 2011, målt i forhold til rekneskapen for 2010. Dette er om lag som lagt til grunn i Nasjonalbudsjettet 2011. Den nominelle, underliggjande utgiftsveksten er berekna til 5,7 pst.

Berekning for 2011 på ulike tidspunkt. Mrd. kroner og prosent

*) Endring i det strukturelle, oljekorrigerte underskotet målt som del av trend-BNP for Fastlands-Noreg.

Kjelde: Finansdepartementet

Meir utfyllande informasjon er tilgjengeleg i Prop. 45 S (2011-2012).