- I 2013 tek Regjeringa et nytt steg i arbeidet med å redusere gebyr ned mot kostnadsriktig nivå, seier finansminister Sigbjørn Johnsen. Gebyra for tinglysing av fast eigedom vert betydeleg reduserte, og gebyret for tollkredittdeklarasjonar vert utforma på ein kostnadsriktig måte. Frå 2012 til 2013 vert overprisa gebyr reduserte med til saman 555 millionar kroner. Sidan 2007 har Regjeringa med dette redusert gebyr med vel 1,2 milliardar kroner.
Regjeringa held fram oppryddinga i overprisa statlege gebyr og bruken av sektoravgifter. Sidan oppryddinga byrja i 2007, er overprisa gebyr reduserte med i overkant av 650 millionar kroner. Regjeringa sitt budsjettframlegg for 2013 inneber ein ytterlegare reduksjon på 555 millionar kroner. Regjeringa har òg avvikla fleire sektoravgifter.
Regjeringa gjer no framlegg om å setje gebyra for tinglysing av fast eigedom kraftig ned. Satsen for tinglysing av pantedokument i fast eigedom er i dag 1 935 kroner, medan det alminnelege tinglysingsgebyret som gjeld skjøte, heimelseerklæring mv. i fast eigedom er 1 548 kroner. Ein foreslår å fastsetje begge til 1 060 kroner. Dette gjev ei samla lette på om lag 400 millionar kroner. Fram mot statsbudsjettet for 2014 vil Regjeringa gå igjennom tinglysingsgebyra og vurdere ytterlegare letter.
Regjeringa gjer det rimelegare og administrativt enklare for næringsdrivande å innføre varer. Ein foreslår derfor å redusere gebyret for tollkredittdeklarasjonar tilsvarende ei samla lette på 155 millionar kroner. Dette kjem i tillegg til reduksjonen på 100 millionar kroner i 2012. Ein foreslår òg å legge om gebyret frå gebyr per deklarasjon til gebyr per månadsfaktura. Dei aller fleste av dei om lag 23 000 føretaka som bruker tollkredittordninga i dag, vil nyte godt av desse endringane.
Arbeidet med å rydde opp i bruken av sektoravgifter vert vidareført. I 2013 vert kontrollavgifta for fiskeflåten og kystavgifta avvikla, med eit oppsamla inntektstap på 33 millionar kroner for kvar av avgiftene. Samstundes vert det foreslått mindre aukar i kontroll- og tilsynsavgifta for havbruksnæringa og sektoravgifta for dels finansiering av Petroleumstilsynet sin aktivitet. Dette vil gje ei auka inntekt til staten på høvesvis 10 og 45 millionar kroner oppsamla. Gebyret som formidlarar av kinofilm må betale for førehandskontroll av film, vert foreslått gjort om til sektoravgift.
