Norsk fiskeri- og havbruksnæring leverer i dag sjømat til forbrukarar i over 150 land verda rundt. Dette er sunn mat produsert i eit reint havmiljø.
Næringa er ei av Noreg sine fremste eksportnæringar, og betyr mykje for busetjing og aktivitet langs den lange kysten vår. Den gir arbeidsplassar i fisket, oppdrett og fiskeindustri, og skaper omfattande ringverknader for næringsliv og for forsking og utvikling.
Noreg produserer om lag 3 millionar tonn fisk årleg. Av produksjonen går 90 prosent til eksport. Derfor er marknadstilgjenge for norsk fisk ei sentral utfordring for norsk fiskeri- og havbrukspolitikk. Målet til Fiskeri- og kystdepartementet er å leggje til rette for auka verdi av produkt basert på marint råstoff.