Skatteetaten sørgjer for at skattar og avgifter blir fastsette og innbetalt på riktig måte og at landet har eit oppdatert folkeregister. Etaten hadde i 2007 ansvar for at det totalt blei utlikna om lag 738 milliardar kronar i skattar og avgifter til staten.
Skatteetaten blei omorganisert 1. januar 2008, og omfattar Skattedirektoratet og skattekontor i fem regionar: Skatt aust, Skatt sør, Skatt vest, Skatt Midt-Noreg og Skatt nord. Skattekontoret erstattar dei tidlegare likningskontora, skattefutkontora, fylkesskattekontora og sentralskattekontora. Skattekontoret kan behandle saker for heile landet innanfor alle verkeområde. Skatteetaten skriv ut skattekort, forskotsskatt, kontrollerer sjølvmeldingane og har ansvar for folkeregisteret. Vidare fastset og kontrollerer etaten folketrygdavgifter og meirverdiavgift, krev inn meirverdiavgift og ei rekkje andre avgifter og gebyr for staten, og fastset og krev inn arveavgift. I tillegg har skatteetaten fagleg ansvar overfor dei kommunale skattinnkrevjarane som krev inn dei direkte skattane.
Ved årsskiftet 2007/2008 hadde etaten ei bemanning tilsvarande 6064 årsverk, og etaten har eit driftsbudsjett på om lag 4 milliardar kronar (2008).
