Du er her:
Pressemelding, 08.10.2012
Nr.: 37/2012
Tiltak mot skatteunndragingar i drosjenæringa
Regjeringa gjer framlegg om å innføre ei plikt for drosjesentralar til å melde inn opplysningar om omsetnaden mv. for drosjeeigarar til skatte- og avgiftsstyresmaktene. – Framlegget er eit viktig tiltak mot skatteunndragingar og inngår i regjeringa sin handlingsplan mot økonomisk kriminalitet, seier finansminister Sigbjørn Johnsen.
Gjentekne kontrollar av drosjenæringa i Oslo har sidan starten på 1990-talet avdekt at store delar av omsetnaden vert halden unna skattlegging.
- Skatteunndragingane i drosjenæringa i Oslo har vist seg å vere av eit så stort omfang at det er grunn til å frykte at det òg førekjem andre stader. Derfor treng vi å innføre eit særleg tiltak i denne bransjen, seier finansminister Sigbjørn Johnsen.
Innmelding av opplysningar frå tredjepartar er eit viktig verkemiddel for å sikre etterleving av skatte- og avgiftsregelverket for alle skattytargrupper. Det ligg godt til rette for ei innmeldingsordning, fordi relevante opplysningar om omsetnad mv. allereie i dag vert registrerte i ein skiftlapp i taksameteret i den einskilde drosja. Skiftlappen vert overført til drosjesentralane. Drosjesentralane skal no årleg rapportere inn opplysningar om omsetnaden mv. for tilknytte drosjeeigarar til skatte- og avgiftsstyresmaktene.
Ordninga inneber at skattestyresmaktene kan samanlikne opplysningar som vert gjevne i sjølvmeldinga og næringsoppgåva, med opplysningar som vert registrerte laupande i taksameteret gjennom året. Høvet til å kunne manipulere opplysningane i skiftlappen vert dermed reduserte, og avvik kan verte avdekka allereie under likningshandsaminga. Ved manglande innmelding skal reglane i likningslova om gebyr ved for seint eller ikkje leverte oppgåver, nyttast.