Regjeringa foreslår å auke løyvinga til Sametinget med 700 000 kroner til arbeidet med sørsamisk læremiddel- og terminologiutvikling i 2012. Regjeringa foreslår også å løyve 120 000 kroner til den samiske språkprisen Gollegiella. Dette går fram av forslag til revidert nasjonalbudsjett.
- Sørsamisk er eit sårbart språk. Regjeringa vil halde fram med arbeidet med å bevare og utvikle det sørsamiske språket og satsinga på sørsamiske læremiddel, seier sameminister Rigmor Aasrud.
Engerdal kommune har tidlegare motteke årleg støtte til drift av Elgå skole og til utvikling av sørsamiske læremiddel og sørsamisk terminologi. 2012 er det siste året med elevar ved denne skulen, og kommunen har derfor bestemt å leggje ned drifta frå hausten.
- Skulen har utført eit stort og viktig arbeid for utviklinga av sørsamisk språk. Med denne overføringa får Sametinget no ansvaret for å prioritere og organisere det vidare arbeidet med sørsamisk læremiddel- og terminologiutvikling, seier Aasrud.
120 000 kroner til samisk språkpris
Den samiske språkprisen Gollegiella blir utdelt kvart andre år av Det nordiske embetsorganet for samiske spørsmål. Prisbeløpet utgjer om lag 120 000 norske kroner. I 2012 vil Noreg stå for finansieringa av prisen.
Prisen blir delt ut på haustmøtet mellom dei nordiske ministrane med ansvar for samiske saker i Finland, Sverige og Noreg, og sametingspresidentane i dei tre landa.
Les meir om Gollegiella