Regjeringa legg i dag fram meldinga til Stortinget om forvaltinga av Statens pensjonsfond i 2011. – I tråd med det vi varsla i fjor, justerer vi investeringsstrategien for Statens pensjonsfond Utland (SPU) på fleire viktige område slik at investeringane vert ytterlegare spreidde, seier finansminister Sigbjørn Johnsen.
Breiare geografisk spreiing av investeringane
Over halvparten av midla i fondet har til no vore investert i Europa. Denne konsentrasjonen av investeringane har hatt som mål å redusere valutarisiko. Ei ny vurdering i fjorårets melding om fondet, Meld. St. 15 (2010-2011), synte at valutarisikoen i fondet er mindre enn ein tidlegare har trudd. Derfor vart det varsla at ein over tid burde redusere den delen som vert investert i Europa, slik at den geografiske spreiinga av fondet vert enda breiare. Denne endringa er starta.
I meldinga vert det lagt fram ein plan om å redusere andelen i Europa til nærare 40 prosent. Fondet vil framleis ha store investeringar i Europa, og ein større del enn mange andre internasjonale investorar.
– Den delen som vert investert i Europa, skal reduserast gradvis over tid. Samstundes veks fondet, slik at investeringane målt i kroner likevel vil auke på sikt. Fondet skal framleis vere ein stor investor i Europa, seier finansminister Sigbjørn Johnsen.
Går mot globale marknadsvekter for aksjeinvesteringane
Den geografiske fordelinga av fondet sine aksjeinvesteringar skal ta utgangspunkt i såkalla globale marknadsvekter. Det inneber at fordelinga framover i stor grad vert bestemt av storleiken på dei ulike aksjemarknadane over heile verda.
Marknadsvekter vil innebere at ein større del av fondskapitalen vert investert i dei framveksande aksjemarknadene enn i dag. Det økonomiske og finansielle tyngdepunktet i verda er i endring, noko som kjem til å verte spegla i fondet sine investeringar.
– Ein fullstendig overgang til globale marknadsvekter ville ha gjeve ein kraftig reduksjon av investeringane i Europa og samstundes ein høg andel i USA. Vi meiner at det er fornuftig med ei jamnare fordeling mellom desse to marknadene enn i dag, og vi vil derfor ikkje gå heilt over til marknadsvekting, seier finansministeren.
Klargjering av rolla til obligasjonsinvesteringane – ny referanseindeks
– I tråd med det vi varsla i fjor, er vi i gong med å endre referanseindeksen som obligasjonsinvesteringane baserer seg på. Vi har lagt særleg vekt på å spreie risikoen breiare og på å forenkle indeksen, seier finansminister Sigbjørn Johnsen.
Den nye referanseindeksen er delt i ein statsdel og ein selskapsdel. Statsdelen av indeksen skal utgjere 70 prosent. Målet med denne delen av obligasjonsporteføljen er å dempe svingingane i fondet si samla avkasting. Investeringane i statsobligasjonar vil verte fordelt i tråd med landa sin økonomiske storleik, målt ved brutto nasjonalprodukt (BNP-vekting). Den økonomiske storleiken til landa gjev eit betre bilete av betalingsevna deira, enn marknadsvekter (storleiken på låneopptak). Norges Bank vil i dessutan ta omsyn til skilnader i statsfinansiell styrke mellom land i den operative forvaltinga av fondet.
Obligasjonar som er utskrivne av føretak, skal utgjere 30 prosent av den nye indeksen. Slike obligasjonar gjev normalt ei litt høgare avkasting enn statsobligasjonar. Indeksen vert forenkla ved at ein tek ut fleire delmarknader. For denne delen av obligasjonsporteføljen bruker ein marknadsvekter.
I tillegg legg ein opp til å inkludere statsobligasjonar med høg kredittvurdering (høgare enn BBB- eller såkalla ”investment grade”) frå framveksande marknader i indeksen. Det vil spreie investeringane endå breiare på tvers av land og valutaer. Det vil betre bytteforholdet mellom forventa avkasting og risiko i obligasjonsporteføljen.
Fortsett rebalansering av aksjeandelen til SPU
I meldinga vert det lagt fram planar om endringar i reglane for såkalla rebalansering av investeringane. Referanseindeksen for SPU har ein aksjeandel på 60 prosent. Aksjeandelen er fastsett ut frå ei avveging mellom forventa avkasting og risiko på lang sikt. Ulik kursutvikling mellom aksjar og obligasjonar gjer at andelen aksjar i den faktiske porteføljen vert endra over tid. Det tyder at fondet kan få ein høgare eller lågare aksjeandel enn den vekta som departementet har fastsett. Reglane for rebalansering styrer mellom anna korleis aksjeandelen kjem tilbake til 60 prosent.
– Røynslene med rebalansering er gode, det har bidrege til å auke avkasting til fondet. Rebalansering er en viktig del av strategien for fondet, seier finansministeren.
– Noregs Bank har gjeve råd om utforminga av reglane for rebalansering. Dei tilrår at ein forenklar reglane, og at banda for rebalansering vert sette til +/- 3 prosent. Dei gjer òg framlegg om større openheit om reglane. Departementet går no gjennom dette, og i løpet av våren vil dei fastsetje? nye reglar, seier finansministeren.
______________________________
Sjå òg:
Utdjupande rapportar til meldinga finst på samlesida over publikasjonar til Statens pensjonsfond. Sjå rapportane her.