Bidragsforskudd

Kven kan få bidragsforskot?

Barn under 18 år som ikkje bur saman med begge foreldra, har som hovudregel rett til bidragsforskot. Den som har den faktiske omsorga for barnet, kan setje fram krav og få forskotet utbetalt til seg. Bidragsforskot blir ikkje gitt for barn som bur i fosterheim eller barnevernsinstitusjon, eller som på annan måte får fullt underhald av det offentlege.

Barnet må som hovudregel vere busett og opphalde seg i Noreg. Barnet blir rekna som busett dersom det har vore i eller skal opphalde seg i Noreg i meir enn tolv månader. Dersom visse vilkår er oppfylte, kan barnet behalde forskotet dersom det oppheld seg i utlandet i opptil seks månader. EØS‑regelverket gjer at barn som er busette i eit anna EØS‑land enn Noreg, kan ha rett til bidragsforskot. Det gjeld til dømes dersom ein av foreldra arbeider her. Du kan lese meir om bidragsforskot ved opphald i eller flytting til eit anna EØS‑land under Internasjonalt i menyen til høgre.

Eit vilkår for å få forskot er at det er eller blir avtalt eller fastsett bidrag til barnet frå den av foreldra som ikkje bur saman med det. Denne forelderen skal betale bidraget til NAV Innkrevjing.

Kva kan du få?

Bidragsforskotet er behovsprøvd og kan utgjere 50, 75 eller 100 prosent av full sats. Satsen blir regulert 1. juli kvart år.

Prosentsatsen blir fastsett ut frå kor stor inntekt du har, kor mange eigne barn du har i eigen husstand, og om du er gift, registrert partnar, sambuar eller einsleg forsørgjar. Retten til forskot fell bort dersom inntekta di overstig 320 gonger den fulle forskotssatsen.

Dersom inntekta di ikkje overstig 320 gonger fullt bidragsforskot, kan du få forskot med full sats

• når farskapet til barnet ikkje er fastsett
• når barnet er adoptert og du er einsleg adoptant
• når den andre forelderen er død og barnet ikkje har rett til barnepensjon

Dersom barnet bur åleine eller saman med ein annan enn ein av foreldra, er det inga behovsprøving.

Har barnet delt bustad, kan det ha rett til forskot frå begge foreldra. Det er eit vilkår at det kan bli fastsett bidrag frå den andre forelderen, eller at forelderen sjølv eller den andre forelderen ikkje har økonomisk evne til å betale bidrag.

Så sant vilkåra ovanfor er oppfylte, kan barnet få forskot til og med den månaden det fyller 18 år.

Korleis søkjer du?

Du søkjer om bidragsforskot ved å fylle ut søknadsblanketten som du finn under Skjema og vedlegg i menyen til høgre. (same kravblanketten som når du søkjer om underhaldsbidrag - NAV 54‑00.05). Her finn du òg informasjon om kva vedlegg/ dokumentasjon du må leggje ved søknaden. Vedlegget  til søknadsblanketten opplyser deg om korleis du skal dokumentere inntekta di.

Du kan få bidragsforskot frå opptil tre månader før søknadsmånaden dersom vilkåra for forskot var oppfylte. Du bør derfor søkje innan tre månader etter at vilkåra blei oppfylte.

Søknaden sender eller leverer du til NAV-kontoret ditt saman med dokumentasjon av inntekta.

Vedtak

Du får først eit varsel om saksbehandlingstida. Når saka er ferdigbehandla, får du ei skriftleg melding om vedtaket.