Douva kon lela priśi hóljiba vojbuvela hošavel pes daruno, mulano ta ladžarutno. Nína vojbuvela dota avel mulano ta lel bengalo džinta vahka douva fanula jek var,vahka douva akharelas hóljibaske. Ńebi douva kon ávela hóljimen télal langhto tíja vojbuvela douva angouvela iego respekti ta vojbuvel hošavel pes but korkoro.
So hin hóljiba?
Hóljiba vojbuvel áchel rakhiba palaldumo, dikhiba, asaniba, tiokiba, díjiba ta bilatše láve. Douva vojbuvel nína áchel džungale sms, mejl vaj tšuviba aro facebook vaj kana ávelas jágimen aro interneti.
Hóljiba vojbuvel nína áchel te džiko phańelas avri ińasto dólesko khal ke komunis ná kólavela pes sar vaure tenkila te mote kólavel pes, vaj ke ná dikhelas sar vaure. Douva vojbuvel áchel te ná lelas áchel it,vaj komuja dielavena ákni pa vaure. Kana douva lela džikones bengalo džinta, tála hin douva hóljiba.
Hóljiba hin butvarenge jek džoralo lav Saj te avel te douva kon hóljavela ná džanela te douva hin tšatšunes hóljiba. Jón saj te pheńen eksemplurales te douva sas ińasto jek spíja. Nebi aro jek kuѓiba hin ona itdžorjale ta it rúvale vaurensa.
It manera hin pe bilatše spíjibaha. Douva kon hóljavela vojbuvel onivar rakhavel pes ta pheńel te douva sas jek spíjiba. Nebi kana džiko lela dotta bengalo džinta dólesta,hin douva hóljiba.
Onivar hin hóljiba aja rúvalo te douva hin phagirba. Sar eksemplura hunkiba, ta kana maravels džiko. Trakaserieri vaj diskrimineriba hin nína hóljiba. Douva hin phagirba te pretinela džiko, vaj pe riśiba džiko télal 15 bereh te tšérel seksikane sáki apo interneti.
Kana arakhelas džiko bilatšes dóleske khal sar eksemplura douva dženosko bij vaj paśiba,hin douva hóljiba. Aja hastes kana džiko avela arakhel bilatšes, mote douva lel po tšatšunes!
Katar adhinela hóljiba pa?
Butvares vojbuvela hóljiba lelpe kana hin bilatšo áchiba aro jek skokha. Dóla kon hóljavena saj frestavena jón te rikhaven pen aro jek tikno skokha dženom te áchel bilatše kajo džikone vaure. Onivar adhinela hóljiba pa dota te ná áchela tšek bare komuja aro trystaliba kon lena angnal sváriba te sáre inkerena pen latšes vaurensa.
Hóljiba vojbuvel nína adhinela te douva kon hóljavela vaure ná džala latšes ta dóleske hóljavela vaure te hošelas pes džoralo. Onivar vojbuvel hóliba barjuvel ke dóla kon hin aro trystaliba ná romuvena pheńen priśi. Saj daravena jón te aven hóljimen vaj nahaven mále.
Sar vojbuvelas tiknavel hóljiba?
Douva ná tšekar terno dženosko angnál sváriba te arakhel hóljiba. Aro skola hin douva bare komujengo angnál sváriba te tšek ávenas hóljimen. Endo vojbuvela sáre hahtavel te tiknavel hóljiba.
Kana hokavelas te džiko ávela tšingrimen vaj hošavela pes avrutno,vojbuvelas sikavel te hin džintake. Onivar vojbuvela áchel dosta kana pheńelas latšo díves,vaj puchelas džiko sadivisikano,te džiko hošelas pes sigurno.
Pańa vojbuvelas hahtavel dženom te phukavel komujenge kon tšérena buti aro skola ka džiko ávela hóljimen.
» Kana avelas hóljavel