Obično o odgovoria na sikavena disave promene
Palo šov kurke trebela manušeske te avel e probengoro odgovor, ama disavo puti šaj te lel poviše vreme. Komaj 95 kotar 100 probe e celulen nane disave promene hem proceninena pe kaj tane normalna. O odgovor avela direktno kotar i laboratorija.
Te sine mukhli i proba ki jek jek ginekologikani ambolanta ja pale disavo centri bašo khamnipaskoro čhinavibe tegani odova manuš so kerdža i proba othar ov i odgovorno te del tut o odgovor.
Ko okola slučaja keda i proba našti te analizirinel pe, obično zavisinela ko primer keda isi but rat tari mensturacij. Tegani manuš ovela pale vikimo te kerel proba.
Te isi disave promene ko celule
Te sikavela i proba kaj isi disave promene ko celule tegani odova lela te istraživinel pe ponodori. Te isi manuše lokhe promene ko celule hem te isi manuše 30 ja pale 35 berša, odova zavisinela kotar odova ki savi diz manuš bešela, tegani istražinela pe i proba direktno jekhe viruseskere testeja. O testi kontrolirinela dali manuše isi HPV, human papillomvirus, kova so barakerela o riziko bašo rako ko matericakoro kerlo. Samo okola džuvlja so isi olen HPV trebela te džan ponodori ko dikhljaribe. Te isi manuše lokhe promene ko celule kori so nane odova virus tegani manuš trebela te džal palo jek berš pale ki kontrola.
Keda i ko pučibe sa o promene ko celule e džuvlenge so isi olen pohari kotar 30 ja 35 berša, akana olenge preporučinela pe te oven dikhljarde kotar ginekologi, ama ko disave thana šaj i džuvli te ovel vikimi ko disave slučaja ki babica te šaj te kerel pe nevi proba bašo celule. O džuvlja so isi olen poviše kotar 30 ja 35 berša hem so isi olen promene ko celule a na samo lokhe promene hem olenge preporučinela pe te dikhljaren pes ko ginekologi.
O keribe celulengere probe na dena jek pherdo arakhibe bašo rako
O redovno celulengere probe dena jek zoralo arakhibe bašo rako ko matericakoro kerlo, ama odova nane šel procentia sigurno. O džuvlja šaj te astaren rako ko matericakoro kerlo mada e celulengere probe sine normalna, ama odova tano but retko. Osim kotar o džajbe ko celulengere probe redovno manuš trebela te rodel pomoč keda i džuvli ratvarela keda isi ola seksi, ja pale keda isi ola poviše puti ratvariba maškar o mensturacije, ja pale keda ratvarela pali i mensturacija.
Manuš šaj bilo keda te telefonirinel ko sastipearakhibaskoro godidejbe kaj te šaj manuš te džanel kori te obratinel pe.
Manuš šaj te ovel sekirimo bašo keribe probe hem bašo probengoro odgovor
Keda manuš mukhela celulengere probe tegani nane manušeske sajekh. Adžikerindor o odgovor manuš šaj te ovel sekirimo. Tegani manuš na trebela te bistrel kaj o celulengere probe tane jek način te arakhel pes manuš kotar rako. Odola promene so arakhena pe ola skoro uvek šaj te ikalen pe tikne operaciaja hem odolea manuš čhinavela te ovel rako.
Odova i čače but retko jek proba te sikavel kaj e džuvli astardža rako. Ko odola but retko slučaja kori so arakhela pe rako ko akala celulengere probe, ola tane ko jek but rano stadiumi hem ov sastljarela pe but jednostavno hem hari posledicenar. Keda kerela manuš akala celulengere probe tegani manuš arakhela sigate akava nasvalipe hem čhinavela pe o riziko manuš te perel but nasvalo.
Manuš odlučinela korkori dali o probe ka šparinen pe
Keda mukhela manuš celulengiri proba tegani oj obično šparinel pe. Tegani šaj ko primer jek nevi proba te usporedinel pe e purajnaja hem te dikhel pe sar džala ponodori. Plus odova o probe šaj koristinena pe bašo istraživibe ja pale bašo javer cili soj priznajmo kotar o istražibaskoro etikano komiteti. Manuš te na manglja te garaven pe o probe tegani trebela te phenel okoleske so kerela o probe, palo odova ola kosena sa.
O podatke bašo probe šparinena pe hem ko registri bašo kvaliteti kova so koristinela pe te šaj te ovel pošukar o arakhibe. Manuš te na manglja te koristinen pe olakere podatke tegani šaj rodela pe ola te oven kosle.