O Sastipaskoro hem nasvalipaskoro arakhibe (Hälso- och sjukvården) ki Švedija najviše platinela pe kotar e lanstingeskere hem komunengere porezija. Odoja taksa manuš so platinela keda džala ko doktori odova tano samo jek tikno kotor kotar i celo cena.
Akava na važinela bašo o prifatno dikhljaribe ko primer i plastikani hirurgija odoleske so oj nane medicinsko potreba. Tegani manuš korkori platinela sa o trošako.
Razna takse ko razna landstingia hem komune
O landstingia hem o komune šaj skoro uvek korkori te odlučinen save takse ka platinen pe keda džala pe ko doktori ja pale bašo javer servisi ko sastipaskoro arakhibe. Obično sa o takse tane skoro isto ko sa o landstingija. Keda isi manuše potreba počesto te džal ko doktori/ambolanta tegani isi jek učokoštibaskoro arakhiba, poviše bašo odova ka dikhe ko teksti so avela potele.
Skoro ko sa o landstingia hem regionija o Sastipaskoro hem nasvalipaskoro arakhibe tano bizo love okolenge so nane olen pherde 20 berša.
O takse soj tele ola tane otprilike hem važinena ko phravdo arakhibe hem ko prifatno arakhadžije so isi olen dogovor disave landstingea.
Keda tano manuš čhivdo te pašljol ko nasvalengoro kher tegani platinela pe 100 krune bašo jek dive-rat.
Keda manuš džala ko plo doktori ki ambolanta tegani platinela taro 100 dži ko 300 krune. Keda džala pe ko ginekologi hem ko čhavengoro doktori tegani i taksa varirinela taro 200 dži ko 350 krune. Keda manuš džala ko doktori hem ovela uputimo te džal ko rentgeni tegani na platinela pe neve takse. Keda manuš džala ko javera specijalistia tegani i taksa šaj te ovel taro 150 dži ko 350 krune. Keda džala pe ko dežurno kotor ko nasvalengoro kher tegani odova šaj te koštinel taro 220 dži ko 380 krune. Keda džala pek i jek medicikani phen ja pale ko gimnastičari othe i taksa šaj te ovel taro 50 dži ko 220 krune.
Ki mamografija kori so dikhela pe rano dali isi rako ko brekha ja pale bašo celulengoro dikhljaribe tari matericakoro kerlo, kaske so vakerela pe ginekologikani kontrola othe šaj platinela pe dži ko 200 krune.
Disave landstingia lena taksa bašo transportiribe abulantikane verdaja ja pale helihoptereja.
Disave landstingija platinena palal i taksa keda manuš adžikerela poviše vreme nego soj dogovorimo. Keda manuš na iranela o dogovorimo vreme keda manušeske na pasujnela ja pale keda manuš našti te avel ko dogovorimo vreme manuš šaj te ovel čhivdo te platinel i taksa bašo odova vreme.
Manuš te birindža phravdo ja pale phandlo arakhiba ko jek javer landsting a na kori soj registririmo, tegani manuš pokinela (platinela) i pacientikani taksa so važinela ko odova landsting kori so manuš lela arakhiba.
O javera arakhibadejdžie šaj te ovel olen javer taksa
Okole so isi privatno nasvalipaskoro siguripe ja pale siguripe preko pli buti, ole šaj te oven javera uslovija save takse ka platinel.
Ko komunalno sastipaskoro hem nasvalipaskoro arakhibe, kova so važinela bašo o pophure so isi olen barevremeskere nasvalipa, othe isi razna takse bašo arakhibe kotar o medicikane phenja.
Ko Švedikane komunengoro hem Landstingengoro (Sveriges Kommuner och Landstings) webbthan isi o adrese bašo komune, landstingia hem regiojna. Olen isi nevi detalirimi informacija bašo ple takse.
O takse bašo avrutne manuša (strancia).
E avrutne manušen isi len pravo te del pe olenge hitno arakhibe ki Švedia.
Te avela manuš kotar jek javer EU- phuv, EEM-phuv ja pale kotar i Švajcarija tegani manušeske trebela jek evropikani nasvalipaskiri siguribaskiri karta, EU-karta, kolaja sikavela pe kaj manuše isi pravo bašo hitno arakhibe ama platinela pe obično taksa. Keda manuše nane odova tegani platinela pe sa o trošako bašo arakhibe.
Ama te manglja manuš te del pe oleske/olake arakhibe so nane hitno hem na mangela te platinel više kotar i obično pacientikani taksa tegani manuš trebela te sikavel jek ljil kori so terdžola kaj oleskiri/olakiri phuv ka platinel sa. Te nane manuše asavko ljil tegani manuš platinela sa korkoro.
Komaj sa o manuša so avena avri kotar i EU, EEM hem Švajcarija, ola platinena sa o trošakija korkori hem keda i ko pučibe o hitno arakhibe.
Tu sar švedžan/i /ka te uljan nasval/o/i ko javera phuvja
I evropikani nasvalipaskiri siguribaskiri karta, koja so šaj te poručinel pe kotar i Siguribaskiri kasa (Försäkringskassan), oj dela e švedikane dizutnenge pravo te koristinen o hitno arakhibe ko javera EU, EEM phuvja hem ki Švajcarija, tegani ola platinena takse sar odole phuvjengere manuša. Ko nordikane phuvja manuš na trebela te sikavel odoja karta.
Te trebindža manušeske arakhibe avri kotar o EU, EEM – phuvja hem kotar i Švajcarija tegani komaj kotar sa odola phuvja na platinela pe manušeske o trošakija so sine bašo arakhiba, ni kotar i Švedija ni kotar odoja phuv kori so sine manuš. Odoleske važno i te ovel manuše jek prifatno drumoskoro siguribe kova so učharela o trošakija sar soj ko primer o transportiribe. Te isi manuše khereskoro siguribe tegani obično isi ole jek drumoskoro siguribe so učharela jek kotor kotar o troškija.
Ko Siguribaskoro kasakoro (Försäkringskassans) webbthan isi buteder informacij bašo odova sar šaj lela pe arakhibe keda manuš i ko javera phuvja.