Bičhalin (uput)
Remiss

Disavo puti šaj te del pe jek uput ko specijalisti ko javer landsting ja pale regioni, ko primer te nane odova arakhibe kori so bešea. Tegani o drumo hem o javera troškija platinela (pokinela) tlo landsting ja pale regioni.

Te dindža pe tuke jek uput bašo phravdo specijalizirimo arakhiba, mangela te phenel pe arakhiba kori so na trebela te ačhove ko nasvalengoro kher, tegani tu korkoro birinea ko savo phuvjakoro than ka ovel odova.

Tu korkori te birindžan te rode specijalizirimo arakhiba ko javer landsting ja pale regioni, tegani tu trebela te informirine tut save uputeskere regularija važinena baši odoja klinika.

Te trebindža tuke uput bašo arakhiba ko tlo landsting ja pale regioni tegani ka trebel tuke asavko diso hem ko odova landsting ja regioni kori so mangea te rode arakhibe. Tuke ka trebel uput mada o javer landstin ja regioni na rodela odova.

Ko but landstingija šaj te poručinel pe vreme direktno ko jek specijalisti doktori bizo uput. Ko asavke situacije disave klinike rodena tu korkori te pišine jek, sar so vakerela pe, lično prijava, bašo akava disavo puti phenela pe pli bičhalin (lično uput) ja pale plo arakhibaskoro rodibe (lično arakhibaskoro rodibe).

Odova kerela pe adžahar so tu lično pišinea lil dži ki klinika hem mothovea sar sian hem soske rodea arakhiba. Disavo puti isi formularija te šaj te kerel pe lično prijava. Okova so kerela buti tle lično prijavaja te smatrindža kaj trebela tuke dikhljariba tegani bičhalena tuke akharin (pokana) te ave ki klinika.

Jek lično prijava bašo lejbe arakhiba ko javer landsting ja pale regioni, šaj te pišinel pe te na rodela pe uput bašo odova than so mangea te dža hem te rode arakhiba, odova važinela hem bašo tlo landsting ja pale regioni.

Tut isi pravo te dogovorine tut tle doktorea kori ka ovel tut uput. Ko disave klinike šaj te ovel baro adžikeribaskoro redo. Tegani šaj te rode te ove bičhaldo ki disavi klinika kori so na adžikerela pe odoborom but vreme, plus odova te trebindža tuke sigate arakhiba tegani odova pišinela pe ko uput. Ama odoja tani i klinika so avela olake o uput so odlučinela kobor sigate šaj te del pe tuke vreme.

I arakhibaskiri garancija nane sa jek

Keda dela pe tuke jek uput baši jek klinika ko tlo landsting ja pale regioni tegani važinela i nacionalno arakhibaskiri garancija, odova značinela kaj tuke ka del pe arakhiba palo jek odredimo vreme. Baši jek specijalno klinika tu na ka trebel te adžikere poviše taro enjavardeš divesa bašo jek termini.

Te dindža pe tuke jek uput hem te birindžan te rode arakhiba ko javer landsting ja pale regioni, tegani na važinela e arakhibaskiri garancija. Tegani uticinela tli medicikani potreba bašo arakhiba kobor vreme ka adžikere.

I pacientikani taksa baši arakhibaskiri poseta na koštinela svegde isto, odova zavisinela savo arakhiba rodea hem kori bičhalela pe. I taksa računinela pe ko učokoštibaskoro arakhiba.

Odole vremeske so adžikerea te ave ki klinika kori so sian bičhaldo, okova so pišindža o uput tano odgovorno bašo o arakhiba so trebela tuke. Te ule tle pharipa pobare ko adžikeribaskoro vreme, tegani kontaktirin okole so pišindža o uput.