Arakhibaskiri garancija
Vårdgaranti

Arakhibaskiri garancija značinela kaj manušeske ka del pe arakhiba ko jek odredimo vreme. Odova tano regulirimo ko sastipaskoro hem nasvalipa arakhibaskoro zakoni. Ki arakhibaskiri garancija terdžola kobore vremeske šaj te nudinel pe manušeske arakhiba kotar o landsting ja pale kotar o regioni. Ama ki arakhibaskiri garancija na terdžola dali ka del pe arakhiba ja pale savo arakhiba ka del pe.

Disavo puti manuš šaj te ovel uputimo te džal posigate ko dikhljaribe ama ko javer landsting. Keda manuš ovela nudimo te del pe oleske/olake arakhiba ko javer landsting tegani manuš šaj te prifatinel odovaja pale te odbinel..

Te nudindža pe manušeske jek poseta ja pale dikhljaribe/sastljaribe, koja so našti dela pe ko arakhibaskiri garancijakiri granica, tegani manušeske ka nudinel pe arakhiba ko jek javer arakhibaskoro than. Odova šaj te ovel jek ambolanta, bolnica ja pale javer prifatno klinika. Tegani manuš šaj korkoro te vakerel ko savo than mangela te ovel uputimo, ama te dikhlja pe palo arakhibaskiri garancija tegani manuš našti te birinel korkori. Manuš te na manglja te del pe oleske7olake arakhiba ko javer than nego samo odori kori so rodindža, tegani manuš šaj te na ikerel pek i arakhibaskiri garancija.

Tegani odova šaj te značinel kaj šaj te adžikerel pe poviše vreme. Ama manuš te predomislindža pe pokasno, tegani šaj te kontaktirinel ple arakhibadejdžija (vårdgivare). Tegani e arakhibaskiri garancija važinela taro odova datum.

Pali e arakhibaskiri garancija manuše isi pravo bašo:

• 0 – Kontakti e opšto medicinaja ko isto dive
  Ko isto dive keda manuš rodela pomoč tegani manušeske trebela te del pe šaipa te kontaktirinel e opšto medicinam ko primer ki ambolanta ja pale ko godidejbe bašo nasvalipaskoro arakhiba. Odova šaj te ovel telefoneja ja pale džajbaja ko than.
• 7 – Džajbe ko doktori ki opšto medicina najaksno efta divesenge
  Te ocenindže e ambolantakere manuša kaj manuše isi potreba te dikhel jekhe doktore tegani dela pe manušeske jek vreme najkasno efta divesenge, ko primer ki ambolanta ja pale ko familijakoro doktori.
• 90 – Džajbe ko specijalizirimo arakhiba 90 divesenge
  Te dindža pe manušeske uput bašo specijalizirimo arakhiba tegani trebela manušeske te del pe jek vreme najkasno 90 divesenge. Odova važinela hem keda manuš rodela arakhiba bizo uput.
• 90 – O sastljariba lela te ovel 90 divesenge
  Palo rešenje kaj ka kerel pe diso e manuša ko primer operacija, tegani trebela te del pe jek vreme e manušeske najkasno 90 divesenge.

E arakhibaskiri garancija na važinela

• ki kontrola
• keda manuš trebela te adžikerel bašo medicikane razlogija poviše kotar e arakhibaskiri garancija
• medicikano servis, ko primer laboratorikane probe ja pale rentgenikano snimiba
• kontrole hem dikhljariba
• pomožibaskere buča, ko odova na khuvena o probibe e šunibaskere aparatja
• manuš te na manglja te džal ko dikhljaribe ko javer than (manuš šaj te predomislinel pes pokasno hem te lel odoja ponuda)
• tu te birindžan te rode arakhiba  ki disavi ambolanta ja pale klinika ko javer landsting a na kori sian registririmo.

E arakhibaskiri garancija na odlučinela dali ka del pe tuke arakhiba, savo arakhiba ka del pe tuke ja pale kobor vreme i istraga ka lel.

Isi jek nacionalno webbthan bašo dikhibe e arakhibaskiri garancija hem o adžikeribaskere vremija, Vantetider.se. Ko akava webbthan sikavena pe sa o adžikeribaskere vremija ko sa o landstingija hem regionija.