Biopsija kotar i prostata
Vävnadsprov av prostata - prostatabiopsi

Generalno

Jek biopsija kotar i prostata značinela kaj o doktori lela but tikne kotora kotar e prostatakoro tkivo kaj te šaj te ispitinel olen.

Manuš šaj te lel probe odoleske so o doktori mangela te ispitinel dali isi rakoskere celule ko prostatakere žlezde.

I proba bičhalela pe ki laboratorija kori so kerela pe analize. Palo odova o doktori informirinela bašo e probakoro rezultati.

Pripreme

Keda kerena manušeske biopsija tegani dela pe e manušeske jek antibiotika hapi. Disavo puti dela pe manušeske jek antibiotika hapi hem te lel peja khere, te šaj manuš te piel disave sahatija palo dikhljariba. But i važno manuš te piel odola hapija te šaj te na astarel manuš disavi infekcija.

Tej manuš alergično ki disavi vrsta antibiotika tegani but i važno manuš te vakerel odova angleder o dikhljariba.

Te isi manuše diabetis, vileskoro nasvalipa kotar o bijanipa ja pale javer pharipa e vileskere kapakoncar tegani but i važno te informirinel pe bašo odova e ambolanta ko vreme angleder o dikhljaribe. Odova važinela hem keda manuš piela hapija bašo rateskoro sanjaribe ja pale kortizoni hapija.

Baš angleder manuš te ovel dikhljardo tegani džala pe ki kenefa te čučarel pe o porja hem i bešika.

Sar kerela pe o dikhljaribe?

Keda manuš ovela dikhljardo tegani manuš pašljola ki levo strana ko dikhljaribaskoro kreveti. O doktori tegani lela te osetinel najea e prostata kotar o gužnako. Palo odova čhivela pe pažlivo jek ultrazvučno ranik andre ko gužnako disave santimija. Odova na dukhala ama šaj manuš te osetinel pe nezgodno.

Ki ultrazvučno ranik isi jek kanali, othe čhivela o doktori jek suv kolaja lela pe i proba kotar i prostata. But manuša odova doživinena sar jek tikni dukh ja pale na osetinena nisavi dukh. Ama manuš te mislinela kaj dukhala tegani šaj te del pe lokalno anestezija.

O dikhljaribe lela otprilike dešupandž minutija.

Sar i manušeske palo odova?

Obično palo odova dičhola hari rat ki sperma, ko muter ja pale keda džala manuš avri peste. Ama odova na značinela kaj diso nane sar so trebela. Manuše šaj hem te ovel hari dukh hem te osetinel palo dikhljaribe kaj mutrela pe oleske.

I proba lela pe kotar e prostatakiri žlezda

I prostata tani jek žlezda soj tani trujal e mutereskoro kanali ko upruno kotor baš teli mutereski bešika. E prostatakiri žlezdakiri funkccija tani te kerel iransportiribaskoro panjalipa bašo sperma. Manuš šaj te mukhel probe taro tkivo kotar i prostata kaj te šaj te dikhel pe dali isi rakoskere celule ki olende.

Jek proba taro tkivo tane but tikne tkiveskere kotora so ovena ispitime. Bašo tkivengere probe vakerela pe hem biopsija.

Prvo kerela pe javera kontrole

Angleder sa kerena pe duj puti tkiveskere probe. Ki jekto dikhela pe dali tane o PSA vrednostia pobare. O PSA tane substancije so producirinena pe ki prostata hem so bilana ko rateskoro drumo. Jekhe obično rateskere probaja šaj te kontrolirinel pe e PSA-eskoro vrednost. E PSA-eskoro vrednost ovela pobaro te ovela pobari i prostata. Javera buča so kerena te ovel pobaro o PSA tane: infekcija ja pale inflamacija ki prostata, ama isto te isi manuše rako ki prostata. Keda bajrola znači o PSA vrednost na značinela uvek kaj isi manuše rako ki prostata.

O dujto puti so kerela pe proba te isi manuše jek zorali grutka ki prostata, kova so šaj te ovel nišani bašo rako ki prostata. I zorali grutka o doktori otkrinela keda astarela najea e prostatakere žlezda kotar o gužnako. I prostata tani disave santimia upre kotar o gužnako hem but paše uzo e poreskoro drumo. Obično e prostatakiri žlezda tani ramno.

E tkivoskere kotora dikhena pe ko mikroskopi

E tkivoskere kotora so lena pe kotar e prostatakiri žlezda bičhalela pe ko mikroskopikano dikhibe kola so dena odgovor bašo pučiba dali isi rako ki prostata ja pale na. E rakoskoro tkivo oceninela pe pali jek skala kaske so vakerela pe Gleasoni.

I Antibiotika jek važno priprema

Keda kerela pe biopsija tegani obično dela pe manušeske antibiotika hapi. Disavo puti dela pe hem jek hapi te lel pea manuš khere disave sahatija palo keribe i proba. But i važno te pien pe o hapija kaj te šaj te na ovel disavi infekcija. Tej manuš alergično ko disave sorte antibiotika, ko primer penicilini, tegani but i važno te kontaktirinel pe i klinika ja pale i ambolanta kori so ka ovel manuš kontrolirimo.

Šaj ka trebel te meninel pe mediciniribe

Te piela manuš ratsanaribaskere hapija taro tipi Waran, tegani manuš trebela te informirinel odova e ambolanta najkasno jek kurko angleder o dikhljaribe. O PK vrednost ko rat trebela te resel te namestinel pes, mangela te phenel pe kaj o rat trebela te šaj te gustonel sar normalno. Odova tano o doktori so dela recepta bašo Warani, hem ov trebela te tiknjarel i doza angleder te len pe o probe.

I ambolanta/klinika trebela te džanel ko vreme hem odova dali isi manuše problemi e vileskere kapakoncar, dali isi bijami greška ko vilo ja pale dali isi proteza ko vileskere kapakija. Isto važinela te isi manuše bakterikani infekcija ko vileskere kapakija. Te isi manuše diabetis ja pale te piela kortizoni hapija tegani da i važno te informirinel pe i ambolanta/klinika. O sastljaribe antibiotikaja mora te adaptirinel pe prema sakone manušeskere specialna pharipa.

I kontrola ovela sigate

I kontrola lela komaj 15 minutija hem šaj kerela pe bizo anestezija. Oj tani dosta jednostavno hem sigate kontrola so šaj sarine te keren ola.

Baš angleder i kontrola manuš džala ki kenefa kaj te šaj te čučarel pe o porja hem i bešika, ko disave bolnice šaj manušeske dela pe buča bašo džajbe avri peste.

Keda manuš ovela dikhljardo tegani pašljola pe ki levo strana ko jek dikhljaribaskoro kreveti. O teluno delo kotar o telo tano nango hem isi jek peškiri te šaj te učharel pes manuš anglal. O doktori počminela odolea so lela te pipinel naeja e prostata kotar o gužnako. I prostata tani obično pravo zorali hem hari elastikani. Te osetinela pe i prostata zorali hem sar gunka tegani odova šaj te ovel nišani bašo rako.

O ultrazvuko dela jek slika kotar i prostata

Palo odova dikhljarela pe i prostata ultrazvukoja. Tegani lela pe jek ultrazvučno ranik hem čhivela pe pažlivo hari andre kotar o gužnako hem tegani o doktori ispitinela i prostata disave minutija.

I ultrazvučno ranik tani komaj 20 santimia, ama odova tano samo o upruno kotor so čhivela pe andre – disave santimia. E ranikakoro diametri tano 2,5 santimia.

Ki ranik isi ultrazvukoskoro transporteri. Ov bičhalela zvukoskere talasija kola so reflektirinena pe kotar o organija andre ko telo. O ultrazvukoskere talasija bičhalena pe ko jek kompjuteri kova so kerela olen te ovel slika a o doktori odova dikhela ko kompjutereskoro ekrani. I slika tani ko kalo hem parno hem sikavela e prostata ko profili.

I proba lela pe jekhe suvjaja bašo biopsija

Palo odova lela pe i proba kotar i žlezda. Ki ultrazvučno ranik isi jek kanali kori so čhivela pe i biopsijakiri suv. I suv tani disave milimetrija ko dijametri. Oj posavela pe ki pojrengiri sapani mortik ki prostata. Uz pomoč e ultrazvukoskere slikaja ko ekrani o doktori šaj te usmerinel i suv ko pravo than.

Ki suv isi jek sar tikni kutija koja so čhivela pe sigate andre ki prostata hem lela pe kotora tari prostata. Obično o doktori lela poviše kotora kotar razna than ki prostata. Obično lela pe kotar ofto dži ko dešuduj kotora.

Šaj te osetinel pe hari nezgodno

I ultrazvučno ranik na kerela nisavi dukh ama manuš šaj te osetinel pes hari nezgodno. Keda odova bastrinela pe ki prostata tegani šaj manušeske te mutrel pe. Odoleske šukar i angleder o dikhljariba manuš te mutrel pe. Keda ikalena pe o kotora e biopsikane suvaja šaj te osetinel pe hari nezgodno a disavo puti šaj te dukhal hari. Komaj sarine so kerdža odova sarine osetindže but tikni dukh ja pale nisavi dukh. Isi šaipa te del pe lokano anestezija te isi but bari dukh.

Ko so te mislinel pe palo dikhljaribe

Kaj te šaj te izbeginel pe infekcija ko mutereskoro kanali, šukar i te piel pe but pani te heljarel pe i bešika.

Komplikacije hem rizikija

Rat ki sperma, ko muter hem ko khul tane obično palo dikhljaribe. Odova nane nišani kaj diso ulo greška. Manuše šaj te ovel hem hari dukh hem te mutrel pe oleske..

Rat ki sperma šaj te ovel ko poviše dive a disavo puti poviše kurke. O rat ko muter hem ko khul čhinavdžovela palo disave divesa.

Mada manuš lela antibiotika te na ovel diso, disavo puti manuš šaj astarela infekcija kotar o bakterie. Najbaro riziko i jek kurko palo dikhljaribe. Te isi manuše jag hem te osetinela pes nasavlo tegani trebela manuš te džal direktno ko doktori.