O akutno pilule tane jek sredstvo te čhinavel pe o khamnipa te sine manuše biarakhlo seksi, ko primer odoleske so manuš bisterdža te koristinel zaštita, manuš te na mislindža ko odova ja pale te ulo džiko silujmi.
Manuš valjani (trebela) te lel jek akutno pilula te isi riziko keda manuš sumninela kaj i zaštita so sine na funkcirindža sar so trebela, ko primer te pharilo o kondomi ja pale te čhadlja pe i pilula.
Ki akaja tableta isi hormoni anavea gestagen. Odova kerela e džuvlen te na ovel ovulacija ja pale te harinel i ovulacija.
Gestagen isi hem ko obična pilule ama ko akutno pilule olengiri doz tani but pobari. Odova čerela (kerela) te oven pobare bimangle dejstvia mada odova na ovela uvek.
O akutno pilule šaj koristinena pes samo ko hitno slučaja na sar jek redovno sredstvo bašo arakhibe khamnipastar.
O akutno pilule znači na čhinvena o khamnipa odoleske nane isto sar o peravibe( čistibe, aborti) ola nane ni peravibaskere pilule.
Sar koristinena pes o akutno pilule?
E akutno pilulenge disavo puti vakerela pes pilule bašo o dive palo odova. Akava tano hari pogrešno odoleske so o džuvli na mora te lel i pilula palo pašljojbe džikasaja. Akala akutno pilule šaj lena pes dži ko 72 sahatija palo pažljojbe znači palo trin dive-rača hem šaj te dejstvunel.
So posigate lela pes o hapi tigani isi potikno riziko te ačhol pes khamni. Keda lela manuš akaja akutno pilula tegani palo jek dive ja palo disave divesa manuš lela te ratvarel ama sarine na ratvarena.
Isi hem jek specijano akutno pilula koja šaj lela pes dži ko pandžto dive palo e džuvljakoro pašljojbe džikasaja. Odova šaj lela pes samo receptaja dindo kotar babica ja doktori.
Te trebela džikaske asavko recepti tegani manuš trebela te kontaktirinel e ternengiri ambulanta, i ambulnta bašo seksi hem zaedničko život, dajengiri ambolanta ja pale džuvlengiri klinika. Obično manuš platinela bašo odova . Ama ko disave ambolante manuš šaj lela odova bizo love.
Kori manuš šaj te lel akutno pilule?
Manuš šaj te lel akutne pilule ko but ternengere ambolante, ambolante bašo seksi hem zaedničko život hem ko obično ambulante.
Manuš šaj te lel akutno pilule ko disave babice hem džuvlengere klinike.
Manuš šaj kinela len hem ki apoteka bizo recepti.
Manuš te gelo ki jek ternengiri ambolanta tegani šaj te lel pe akutno pilula, tegani manuš šaj te lel jek termini (zakažimo vreme) te kerel pes khamnipaskoro testi hem te manglja manuš šaj te kerel hem testi baši klamudija.
Te manglja manuš šaj te del pes oleske/olake godidejbe sar te arakhael pes ponodori te na ačhol pes khamni hem šaj dela pe informacija bašo seksualikane nasvalipa.
Kobor koštinena o akutno pilule?
Manuš te gelo ki apoteka te lel akutno pilule bizo recepte tegani trebela te platinel bašo odova. Ki ternengiri ambolanta akala tablete tane bilovengoro.
Kobor i sigurna o akutno pilule?
Keda manuš lela akala tablete tegani nane baro riziko te ačhol pes khamni. O riziko bajrola te ačhol pes khamni ko zavisnost kotar odova kobor kasno lela pes i tableta palo pašljojbe – so pokasno lela pes i tableta tegani pobari tani i šansa bašo ačhojbe kamni
Keda manuš lela i tableta hem angleder te nakhen trin sahatija lela te čhadel ja pale te džala avri peste pajnalo tegani nane sigurno kaj o telo reslja te lel o hormoni. Odoleske manuš trebela ko asavke situacie te lel so posigate so šaj javer tableta, se isi riziko tegani te ačhol pes khamni.
So važinela baši odoja pilula so lea terdžola ki pakofkairi informacija. Keda kineja ja keda dela pes tuke i pilula , andre ki pakofka isi jek lil informaciaja. Manuš te nane sigurno tegani šaj pučela e babica ko primer ki ternengiri ambolanta ja pale ki mortikakiri hem genitalijengiri ambolanta.
Kaj te šaj manuš te ovel sigurno kaj nane khamni tegani trebela te čerel (kerel) pes jek khamnipaskoro testi trin kurke angleder te lel pe o hapi.
Kobor često šaj lela pes i akutno pilula?
Nane disavi granica kobor puti ko jek mensturacijakoro periodi šaj lela pes akutno pilula. Te sine manuše biarakhlo seksi hem te na manglja te ačhol khamni tegani pošukar i te lel pes akutno pilula poviše puti ko jek menusturacijakoro periodi nego te na lel pes, mada isi pobaro riziki te ratvarel manuš poviše.
Te ovela manuše potreba poviše puti kotar o akutno pilule, tegani manuš trebela te dikhel soj o problemi hem sar arakhela pes ko pašljojbe hem dali trebela diso te meninel. Kaj te lel pes pomoč bašo odova tegani manuš šaj kontaktirinela e ternengiri ambolanta, ambolanta ja pale e mortikakiri hem e genitalijengiri ambolanta.
Pozitivno buča
- Manuš te na arakhela pes ja pale odova arakhibe manuš so lela nane dovolno tegani akava šaj te ovel jek način te tiknjarel pes o riziko te ačhol pes khamni.
Negativna buča
- O akutna pilule na arakhena kotar o seksualikane nasvalipa.
- O hormoni šaj te uticinel upro manuša adžahar so manuše dukhala o šero, dukha ko kolin, ja pale manušeske ovela muka, ama odova na ovela poviše kotar 24 sahatija.