Manuš šaj te koristinel kondomi sar arakhibe kotar seksualikane nasvalipa ko razna načinija bašo seksi sar soj o vaginalno seksi, analikano seksi ja pale keda isi mujeskoro seksi penisea. Ko vaginalno seksi o kondomi arakhela hem te na ačhol pe khamni.
Manuš šaj te koristinel kondomi hem keda onanirinela, te osetinela manuš kaj i oleske šukar hem te sikljol sar čhivela pe odova ja pale te manglja te džanel sar osetinela pe i sperma ko kondomi.
Kondomia isi ko razna baripa, forme, boje hem ukusija. Obično but kotar akala kondomija so šaj kinena pe ko obična dučane ola tane but slična, ama ko Internet hem ko sekseskere dučane manuš šaj arakhela ko razna baripa hem forme.
Sa o kondomija na pasujnena bašo sa o penisija, odoleske šukar i te probinel pe savo kondomi pasujnela manušeske.
Ko komaj sa o kondomija isi intimno geli kaj te šaj te osetinel pe šukar a na te morel.
Tej manuš alergično ko lateks (guma) tegani manuš šaj koristinela kondomia tari plastika.
Sar koristinela pe o kondomi?
O kondomi čhivela pe upro jek penis soj tano uštimo ja pale ko jek sekseskoro šei. Kaj te šaj o kondomi te arakhel kotar o seksualikane nasvalipa hem khamnipa tegani but i važno odova te koristinel pe keda manuše isi seksi.
Te alo čhorajbe ko kondomi tegani manuš trebela te ovel pažlivo keda ikalela o penis te na čhordžol sperma andre ki vagina ja pale ko anali.
Šaj manuš ka trebel te vežbinel sar čhivela pe jek kondomi te šaj te ikerel šukar.O murša šaj te probinen te čhiven peske jek kondomi ko plo penis hem te onanirinen. A o džuvlja šaj te len jek dildo ja pale jek šargarepa hem te vežbinen.
Adžahar kerela pe kaj te šaj manuš te čhivel jek kondomi ko penis ja ko dildo:
- Phrav e kondomeskir pakovka.
- Cide jek strana taro kondomi te šaj te dikhel pe tari savi strana ka čhivel pes o kondomi..
- Te čhivela pes o kondomi ko jek penis tegani ov trebela te ovel uštimo te šaj o kondomi te phravel pe natele.
- Manuš te nane sunetlija tegani trebela i mortik te cidel pes palal.
- Čhiv o kondomi skros upre ko šero, bastrin e najencar ko okova kotor so ikerela pe o kondomi hem istovremeno phrav o kondomi natele ama dikh te na khuvel vozduh maškar o penis hem o kondomi ja pale maškar o dildo hem o kondomi.
- Keda o kondomi phravela pes natele, lizgajnker hari o kondomi dži kote te phravdžol sa. Tej o kondomi čhivdo ko jek penis tegani ov trebala te ikalel pes angleder o penis te perel. Dikh te šaj o kondomi te ikerel pe tele ko peniseskoro koreno, keda ikalela ole avri dikh te na perel o kondomi.
- Ferde o kondomi ki kanta na ki kenefakiri šolja.
Kori šaj lena pe kondomia?
Obično o kondomia ulavena pe e ternenge ja pale bikinena pe ko ternengere centrale.
Ola šaj kinena pe hem ko apoteke, hajbaskere dučane, trafike hem ko Internet. O kondomija bikinena pe hem ko automatija ko disave bioskopija , restorantija ja pale klubija. Jek pobari kondomengiri varijacija hem sorte isi ko seksualikane dučane ja pale ko Internet.
Kobor koštinena o kondomia?
O kondomija obično bikinena pe ko poviše kotora ki jek pakovka. Kobor koštinena zavisinela tari savi sorta manuš kinela hem kori manuš kinela olen. Ko ternegere centrale obično o kondomia ulavena pe bilovengoro ja pale bikinena pe but hari lovenge
Kobor i sigurno o kondomi?
Te džanglja manuš sar koristinela pe o kondomi, te koristindža ole celo vreme ko seksi hem sakova puti keda isi seksi tegani o kondomi tano jek sigurno arakhibe kotar seksualikane nasvalipa ja pale kotar khamnipe.
O kondomija garavena pek i sobno temperatura hem ko disavo than kori so na ka oven gužbime. Jek šukar than šaj ovela i džepa ki jek jakna ja pale ki tašna.
Našukar than šaj te ovel ko primer i paluni džepa ki pantolka ja pale jek džami kori so isi but kham. Okova kondomi soj purano ja pale šuko ov šaj phajrola but lokhe.
Šukar buča
- Šukar arakhibe kotar seksualikane nasvalipa.
- Sigurno arakhibe kotar khamnipe.
- Na uticinela upro telo.
Našukar buča
- Šaj te ovel jek problematično momenti odoleske so šaj čhivela pes samo keda o penis tano uštimo.
- Manuše trebela te ovel uvek peja keda manuš mangela te pašljol džikasaja.
- Manušeske ka trebel hari vežbe džikote sikljla te čhivel ole sar so trebela hem te osetinel manuš šukar.