Soske ovela manuše parnipa ko spolno organi?
Na džanela pe soske manuše ovela parnothavdipa ko spolno organi. Ama jek kotar o soskipa šaj te ovel keda manuš lela disavo iljači tegani lela te bajrol o parnipa ko spolno organi, ko primer i antibiotika, oj mudarela sa e šukar bakterien kola so isi normalno ko spolno orgaria.
O parnothavdipa ko spolno organi šaj te ovel nišani kaj kotar disavo razlog o imuniteteskoro arakhibe ulo poslabo, ko primer keda manuš lela te ovel nasvalo/nasvali ja pale keda manuš i but telo stres.
E hormonengoro balansi ko telo šaj isto te uticinel. Odoleske o džuvlja šaj te dobinen o parnipa baš angleder i mensturacija ja pale keda ačhona khamne.
Oparnipa ko spolno organi nane seksualikano nasvalipa. Disavo puti šaj te zarazinel pe keda manuš pašljola jek javerea ama odova tano but retko. Ama našti te zarazinel pe keda isi seksi mueja ja pale keda manuš džala ki kenefa palo o manuš so isi ole/ola parnipa ko spolno organi.
Sar šaj manuš dikhela kaj isi ola / ole parnipa ko spolno organi?
O džuvlja šaj osetinena poviše keda isi olen parnipa odoleske so odova handžola hem tharela olen tele ko vaginakoro phravdipa hem ko vaginakere vošta. E vaginakere vošta šaj hem te oven lole hem šuvle. O parnothavdipa šaj te ovel parno, šuko ja pale sar troške a disavo puti šaj te ovel sano, disavo puti na dičhola kaj isi manuše parnothavdipa.
O parnothavdipa šaj isto te kerel te tharel manuše, te dukhal keda manuš mutrela pe ja pale keda isi seksi. Disavo puti ovena bubulice ko vaginakere vošta hem ko agija.
Ko murša obično e peniseskoro šero o trupo, e pelengiri kesik ovena lole hem šuvle keda isi manuše parnothavdipa. Manuše šaj te ovel hem jek parni fleka ko peniseskoro šero ja pale teli šereskiri mortik ja pale ko trupo. I fleka ovela pophari te thovel nego i smegma soj tani prirodno hem soj teli šereskiri mortik.
Sar šaj te nakhel manušestar o parnothavdipa?
Te isi manuše tikne pharipa kotar o parnothavipa tele ki vagina ja pale ko penis, tegani odova skoro uvek našavdžovela korkori pestar palo disave divesa bizo disave iljačija.
Ama disavo puti na nakhela, ja paleodova handžola hem tharela odoborom but so manuš mangela te kerel diso te čhinavel odova. Tej odova prvo puti so astarela manuš odova tegani trebela te kontaktirinel pe džikas ki ternengiri ambolanta, mortikakiri hem spolno organengiri ambolanta ja pale i obično ambolanta kaj te šaj manuš te dikhel dali tano odova čače parnothavdipa. Te gelo manuš ki disavi ambolanta tegani ka ovel dikhljardo. Odova obično ovela sigate odoleske so okova/okoja so dikhljarela sigate šaj dikhela dali tano odova parnothavdipa.
Te sine manuše parnothvdipa angleder tegani manuš sigate haljovela o problemi hem tegani manuš šaj te kinel disavo iljač ki apotekai soj bizo recepta.Isi kreme so šaj manuš te makhel e vagina hem e vaginakere vošta ja pale e penise hem e pelengere kesika. E džuvlenge isi hem hapija kaske so vakerela pe vagitorium. Manuš čhivela odova andre ki vagina najencar, hem krema so perskinela pe jekhe tikne plastikane perskalicaja. Jek kratko vreme palo odova keda manuš lela o iljači tegani odova šaj te tharel hari hem te handžol panda poviše, ama odova nakhela sigate.
Manuš te ikerela pes ko akava sastljariba sar so vakerela pe olake/oleske tegani manuš sastčola kotar akala iljačija bizo recepta. Te na sastilo manuš ja pale te alo o parnothavdipe pale poviše puti nego duj puti ko berš tegani trebela manuš te kontaktirinel džikas ki ternengiri ambolanta, ki mortikakiri hem spolno organengiri ambolanta ja pale ki obično ambolanta te šaj te pomožinel pe e manušeske.
But i važno manuš te na lel iljačija so mudarena majasili te nane potreba, odoleske so tegani ovela popharo manuš te oslobodinel pes kotar o parnothvdipa ja pale odoleske so palo disavo vreme ov pale pojavinela pes. Odova šaj hem te šučarel i sapanipaskiri mortik hem te kerel ola šuki a odova kerela javera problemija.
So šaj te kerel pe te na ovel manuše parnothavdipa?
Odoleske so na džanela pe soske manuše ovela parnothavdipa tegani i pharo te arakhel pes manuš kotar odova.
Disavo puti vakerela pe kaj o riziko te ovel pobaro o parnothavdipa i keda manuš thovela pes tele često sapunea. Nane ništo so potvrdinela pe akava vakeribe. Amate isi manuše infekcija kotar parnothavdipa hem thovela pe poviše, tegani ka ovel šukar manuš te thovel pes pohari. Bizo razlika dali manuše isi parnothavdipa ja pale na tegani dovolno i manuš te thovel pes mlako panjea jek puti ko dive. Manuš na trebela te koristinel obično sapuni tele odoleske so odova šučarela manuše telal. Manuš te manglja šaj te koristinel jek biparfirimo ulje.
Pučiba hem odgovoria (dževapija) bašo parnothavdipe tele
Šaj manuše te ovel parnothvdipe kotar sanesostenja, tate šeja ja pale tang šeja?
Nane nisave naučna dokazija kaj o tate šeja, tang šeja ja pale o sanesostenja kerena polokhe te ovel manuše parnothvdipa. Ama keda isi manuše tegani odova tharela hem handžola pohari te isi manuše sostenja tari pošom hem sane šea. Šaj hem te pomožinel keda manuš sovela bizo sosten..
Našavdžovela o parnothavdipa manuš te makhela pes telal jogurtea?
Kaj o jogurti pomožinela protiv o parnothavdipe, odova tano jek miti hem bašo odova nane nisavo naučno dokaz. Ama o jogurti šaj te šudrakerel hem odoleske šaj te ovel šukar protiv o handžojbe.
Šaj o parno thavdipa te zarazinel?
O parnothavdipa na dolela pe ko primer ko toaleti. Ama o parnothavdipa šaj te dolel pe te is manuše vaginalno seksi mada odova tano but neobično.
Šaj manuš te astarel parnothavdipa kotar hajbe but šekeri?
Nane disave naučna dokazija kaj o parnothavdipa ovela kotar hajbe but šekeri. Ama te isi manuše parnothavdipa normalno kaj nane opasno te probinel pe te meninel ple hajbaskere navike te pomožindža te ovel pošukar.
Šaj manuše te ovel seksi keda isi parnothavdipa?
Nane opasno manuše te ovel seksi keda isi parnothavdipa, odoleske so i sapanimortik ovela šuki tegani šaj te ovel tikne morčakere phajrojbe hem odova šaj te kerel te dukhal keda isi manuše seksi. Keda manuše ovela vaginalno seksi tegani isi jek tikno riziko o parnothavdipe te zarazinel hem e javere/javera. Plus odova isi pobaro riziko manuš te dobinel ja pale zarazinel javere/javera seksualikane nasvalipancar keda isi vaginalno seksi istovremeno keda manuše isi parnothavdipa odoleske so tegani phajrlola hari sapani mortik a odova kerela manuš te astarel polokhe o infekcie.