Misle bašo prvo puti
Keda manuše na sine seksi džikasaja tegani ovela manuše pherdo misle bašo odova hem sar ka osetinel pe, sar mangela manuš odova te ovel hem keda odova ka ovel. Manuš šaj šundža bašo odova kotar ple amala/amaljinja, šaj dikhlja ko filmi, čitindža ko novine ja pale šundža diso javer hem odolestar avena ideje sar šaj te ovel.
Obično odola misle ovena te ovel manuše vaginalno seksi. O istraživanja so kerdže pe sikavena kaj but džene so završindže i gimnazija na sine olen vaginalno seksi. Odova šaj te zavisinel kotar but buča, ko primer manuš na mangela te ovel ole seksi, manuše na sine šansa, manuš mangela te ovel seksi murš muršea ja džuvli džuvljaja ja pale manuš tano interesirimo te ovel ole javer seksi a na vaginalno seksi.
Manuš korkori odlučinela
Disavo puti manuš šaj te osetinel pes telo stres ja pale šaj te ovel prinudno te ovel ole/ola seksi mada manuš na mangela ni na osetinela pe spremno.
Manuš šaj hem te ovel prinudno te adžikerel te ovel ole/ola seksi mada manuš mangela. Te osetinel pe manuš stresimo/stresimi te ovel seksi ja pale te adžikerel, odova šaj te zavisinel kotar grupno pritisok kotar okola manuša manuš kasaja so dikhela pe ja pale kotar e familijakoro očekujbe.
Ama but i važno manuš te na bistrel kaj manuš valjani te kerel adžahar so ka ovel olese/olake šukar.
Manuš odlučinela korkori
- bašo plo telo
- te sine seksi hem keda manuš mangela seksi
- sar mangela te ovel o seksi
- kasaja ka ovel seksi.
Beršengiri granica bašo seksi?
Našti vakerela pe točno ko save berša manuše šaj te ovel seksi džikasaja, Manuš mora korkori te osetinel odova. Ama is jek zakoni kori so vakerela pe kaj jek manuš so isi ole buteder kotar 15 berš na tromala te ovel ole/ola seksi ko disavo način džikasaja soj tikneder kotar 15 berš. Ama ko zakoni isto terdžola kaj manuš na ka ovel osudimo te dikhela pe šukar kaj o seksi na sine zoraja kerdo.
Odova soj najvažno i angleder sa kobor razlika isi ko berša, dali e beršengiri razlika hem o razvoj maškar o manuša so sine seksi tani tikni hem dali ulo dobrovoljno. O zakoni važinela hem muršenge hem džuvlenge. Akava zakoni tano kerdo te arakhel e čhaven te na oven koristime taro phureder manuša. Palo zakoni nikas nane pravo te kerel diso seksualno prema javer manuš so na mangela.
Tipsi angleder te ovel džikasaja seksi
Odova i obično keda manuše isi seksi prvo puti odova ovela hari javer kotar odova sar manuš zamislindža peske. Disavo puti odova šaj te osetinel pe kaj sine nauspešno odoleske so na sine sar manuš so očekunjdža peske.
O seksi tano diso so trebela/valjani te vežbinel pe kaj te šaj te ovel čače šukar, isto sar but javera buča ko dživdipe. Nane but manuša so šaj te bašalen pli favoritno gili ki jek gitara bizo te džanen te keren jek akordi, ja pale te nane olen astardo ni jek instrumenti ko vasta! Angleder o prvo puti isi disave buča so manuš trebela te mislinel hari a isi disave buča so manuš trebela te trenirinel.
- Probin te onanirine ko razna načinia, tegani i polokho te džane so svidžinela pe tuke.
- Kaj te šaj te arakhe o šukar thana ko jekjavereskoro telo: vaker jek javerea, rode, osetin hem vaker.
- Manuš šaj te galinel pe, čumnel pe hem but javera šukar buča kaj te šaj te nadražinel jekjavere.
- Koristin zaštita, ko primer kondomi ja čaribaskiri kesik, hem vežbin angleder sar koristinela pe.
- Te ovel seksi ko jek sigurno than odova šaj te kerel manuš te mukhljol polokhe.
Bipašlo/bipašli /bidošali/bidošalo (Čhajipa/nevinost)
Disavo puti šaj manuš te šunel o lafi bipašlo/bipašli bašo o manuša so na sine olen seksi e penisea ja pale e vaginaja, ama odova šaj te značinel hem keda manuše na sine nisavo seksi uopšte.
Džiko na mangela te koristinel pe o lafi bidošali/bidošalo. Šaj odoleske so odova zvučinela kaj manuš ovela došalo keda nane više bidošalo/bidošali. Odova tano sar te phene manuš trebela te ladžal odoleske so sine ole/ola seksi.
Buteder o manuša so koristinena o lafi bidošali/bidošalo na mislinena adžahar. Manuš vakerela o lafi bidošali/bidošalo sar jek lafi odoleske so manuše na sine seksi. Keda manuše ovela seksi palo odova vakerela pe kaj manuš ačhilo bizo plo bidošalipa, ja pale kaj manuš našadža plo bidošalipa. Šaj odoleske so manuš ovela lošalo kaj nane više bidošali/bidošalo.
Sakone isi pravo korkori te odlučinel keda ka ovel ole/ola seksi o prvo puti. Odoja nane javerengiri buti. Našti te dikhel pe dali jekhe manuše sine ole/ola seksi ja pale na. Ni o doktori ni i babica šaj te dikhel odova.
Čhajipe/Himeni?
Keda vakerela pe bašo čhajipe odova tano ustvari o phravdipe ko vaginakoro avruno kotor so lela te džal ko vaginakoro andruno kotor. O phravdipa šaj te ovel ki jek napravilno forma hem šaj te ovel hari khedimalo ja pale hari avri ferdimo. O phravdipe ko puberteti šaj te buvljol hem te ovel elastikano, ama ov nikad na našavdžovela. Nane nisavi membrana so učharela e vagina.
Pošto nane disavi membrana odoleske našti ništo te padžol keda isi manuše seksi. Ama disave čhajen keda isi olen seksi prvo puti šaj te thavdel olendar hari rat, ama obično na thavdela olendar.
Okolendar so thavdela rat odova ovela odoleske so o phravdipe ko vaginakere strane tane tang. Ama obično thavdela rat bašo javera bučada, odoleske so manuš ovela stegimi ja pale nane dovolno nadražimi.
Našti dikhela pe dali jek dženi tani čhaj ja na. Ni jek doktori ni i babica šaj te dikhen dali džikas sine seksi ja pale na.