So honkar bi, hetero ta homo?

Dolle aschar bulopha voltranden: bisexualitet, heterosexualitet ta homosexualitet. Buttast brukfarar diro rada penna homo, hetero ire bi.

  • Bisexualitet honkar karna diro bliddrar kamlad an ta tattano pre dypas tjejer ta rackloar.
  • Heterosexualitet honkar karna diro bliddrar kamlad an ire tattano pre khoon attjer jeck vaver mischepha. Jick vaver lav gla kava honkar straight.
  • Homosexualitet honkar karna diro bliddrar kamlad an ire kamlepha ire tattano pre khoon attjer savriga minschepha. Jeck vaver lav honkar gay. Tjejer savot voltrar kamma tjejer nasht penna siro lesbiska ire flator. Rackloar savot voltrar kamma vaver rackloar nasht penna siro gla bögar (pre romani gavomosch).

Dynkrande pre siro bulopha voltrande

Dolle honkar butt ninna manisch savo dynkrar pre siro bulopha voltrande. Savi bula voltrande dirots dynkrar te diro nasht kamma nasht vaverpha teli jibben.

Diro pottar baschi diro voltrar pennas gla bi, hetero ire homo. Diro nasht tasa penna te diro tji kammar jeck bula voltrande.

Dynkrande attjer vaver manisch

Vaver manisch dynkrar diro honkar heterosexuell. Baschi diro tji honkar kava nasht kava kerra savo diro kanslar ojurandepha ire tji ninna dova vaver.

Te pramissa baschi siro bulopha voltrande

Tji dynkrat pre savi bulopha voltranden diro kammar pottar diro sarstil ta karna diro voltrar pramissa kava gla vaver manisch.

Honkar diro heterosexuell brukfarar diro buttast tji pramissa kava pallasavo dolle honkar dolle manisch dickrar.

Honkar diro homosexuell ire bisexuell, nasht diro kansla te diro voltrar ire mostula pramissa kava.

Bula voltrande kammar nani ninna kerropha ire huri jeck manisch dickrar

Manisch nasht dynkra te diro honkar pre jeck kerropha dynkrat pre diro bula voltrande. Te diro saste dynkra butti baschi ovaroa tjack, juras pre jeck sutt ire kamma voltranden.

Diro kerropha, jurande, voltranden, ire huri diro jibbar diro jibb, kammar nani te ninna diro bula voltrande te kamma.

Illigalt te diskriminera manisch ninna ovaroa bulopha voltrande

Tji dynkrat pre bulopha voltrande kammar diro tjatso te jibba diro jibb.

Te ascha kerria, te diskriminera khoon ninna jeck vaver bula voltrande honkar illigalt.

Bliddrar diro kerrad gla drabb topha diro kammar jeck vaver bulopha voltrande honkar kava jeck baro stillo, savo pennas lackeskestillopa (”hatbrott”).