Topha te mosch voltrar kerra phatra pari honkar butt. Kava nasht ascha gla te mosch tji kanslar siro doschta baro. Te diro dynkrar diro honkar sass gla terno ire dolle tji honkar horta gla diro jibb. Astispha honkar dova mosch diro bliddrat pari kettanes ninna tji dova savo diro voltrar kamma nucko ninna.

Diro kammar horta te kerra phatra pari avritan te pramissa siro gla kommoni vaver. Kava steedrar randrat an phater pari-hortan. Diro nasht fyssa jeck vaver dynkrepha glanske phatra pari.

Te kerra phater pari kerrar tji te dolle bliddrar kerriare te bliddra pari an glansketjiron. Kava aschar tji jick bashteskehorta gla te fussa kerra phatra phari.

Glanske phatra pari

Kava savo dynkrar pre te kerra phatra pari nasht kamma butt ninna friggor ta karni nasht dolle ascha fedigt te rackla ninna jick vaver manisch. An kettenespha ninna jick phatra pari bjuddras diro hilprepha, dypas glanske ta akkter. Baschi diro honkar dova savo kammar kerrat kommoni pari nasht diro tasa trissa kommoni te rackla ninna.

Tjejen savo pottar

Kava honkar sarstill fedigt te rackla ninna dova savo diro bliddrat pari kettanes ninna baschi ernos saste kerra. Bashi kava honkar atispha honkar dolle fedigt baschi pottandet nasht kerras kettanes. Abbo baschi mosch tji honkar sinsemasker honkar dolle sarstill tjejen savo pottar baschi lester saste kerra phater pari baschi tji. Dova savo kammar kerrat kommoni pari nasht tji solus kamma pottande baschi phater pari saste kerras.

Te honkar kettanes-mosch to dova savo kerrar phater pari

Avritan dynkrat pre baschi pottandet honkar kettanes ire tji, nasht diro savo kettanes-mosch honka jeck kerria momenti. Pre dypas phater pari-steddon ta terniophakeret nasht diro fyssa trissa kommoni te rackla ninna, anten dypas kettanes ire solus.

Akkter jick phater pari nasht diro kansla diro dypas lattjano ta tugalo. Kanslorna ta dynkrorna nasht ava glan ta veder ta nasht ava jeckest langro palla phater pari.

Diro nasht karni diro voltrar avritan sar langro tjiro kammar jaat le trissepha ninna ternophakeret gla re rackla baschi dolle mosch kanslar.

Karna nasht diro kerra phater pari?

Glanske to dova 18e parieftadivusen kammar diro horta te kerra phater pari avritan penna gla khoon sosti diro voltrar kerrat.

Palla dova 18 parieftadivusen mustula diro kamma lottrande attjer Socialstyrelsen (Themmeskepottande-enheten) gla te kerra phater pari. Dolle nasht ascha te diro honkar terno, kammar vina ninna alkohol ire vaver, kammar bliddrat buleskeroad ire tikno-nuckon kammar jeck baro duckalo.

Sako kerrars phater pari?

Phater pari kerrar sarstil pre duckalokeren ire vaver savriga, diro nasht tji kerra phater pari pre ternophakeret. Abbo diro janar te diro honkar pari ta dynkrar pre te kerra phater pari nasht diro le trissepha ninna ternophakeret gla te kamma hilprepha. Diro nasht tasa ja to jick kisserphacentral ire gynekolog. Dova nasht tasa hilpra ninna le trissepha ninna jick phater parikere pre jick duckalokere.

Diro nasht tasa solus tava to jick phater parikere ta le jick tjiro. Baschi diro janar te diro voltrar kerra phater pari nasht dolle ascha fedigt te le tjiro siggrepha pallasavo dolle nasht ascha biddresketjiro pre dova steddorna.

Huri kerras phater pari?

Phater pari nasht kerras ovaroa. Savi metod dova nasht kerras pre honkar pre savi langro tjio pari kammar aschar. Gla te kamma janepha pre savi paritjiro diro kammar jurar vorsnos pre dova sensloaste rattisketjiro jeckesta divus.  

Glanske to eftadivus- enja

Glanske to eftadivus-enja nasht diro kerra phater pari ninna hilprepha attjer drabb. Dolle pennas gla drabbeskephater-pari. Pre khonra steddons brukfaras metoden gla to eftadivus-deschu-dy. Karni fyssar diro drabb pre jick phater parikere, kava honkar tji savriga savo siggrepha p-drabb. Palla te diro kammar let drabbet nasht diro ja kere.

Jeck to dy divusar sensloare avar diro veder to phater parikeret gla te fyssa nevo drab, anten savo diro ler teli an daron ire savo sasste ja uppri an minshen. Abbo biddra senslo pre phater parikeret ta palla jick tjiro aggrar diro ratta ta pari avar avri. Kava nasht kerra duckt abbo diro nasht fyssa duckeskehilprande ta sensloare savriga divus nasht diro tradra kere.

Dolle honkar atispha te kerra phater pari kere, jick savo pennad kereskephater-pari. Karni fyssar diro ninna drabb ta ler dova kere. Gla te fyssa kerra jick kereskephater-pari mostula diro honka 18 basht phuro ta kamma kommoni vaver baro manisch ninna diro.

Khonra eftadivusar palla phater pari avar diro pre jick nevo trissepha gla jick gynekolog ire nuckoskeduckalopenja gla te kerra jick nevo paritest ta pramissa huri diro kanslar diro. Dolle honkar karni jick drabbeskephater-pari juras savo phater. Dolle nasht tasa kerras ovaroa tester gla te jura bashi sassarot juras fedigt an belsingen.

Glanske to eftadivusar 12

Glanske to eftadivusar 12, nasht diro kerra dolle savo pennas gla kirurgisk phater pari, kava kerras karni honkar jick skrapning. Teli solus operationen honkar diro teliskedummrad. Duckalo-moshcen ler andre instrumentet andre jibbeskeorganet. Dova honkar kettanestavad to jick tjommare. Phater pari avar 20 minuter. Palla kava biddrar diro pre steddot jick tikno tjiro gla te dummra. Khonra eftadivusar sensloare nasht diro fyssa kerra jick buttare trissepha.

Palla eftadivusar 12 ta glan to eftadivusar

Palla eftadivus 12 mostula phater pari kerran an dy moment. Karni fyssa diro glanske drabb pre steddot savo honkar savrige drabb savo brukfaras an sela phater pari. Dy divusar senslo avar diro veder to steddot ta fyssar nevo drabb savo kerrar uterus kettanesriggningar sav te tiknonuckon dabbas avri.

Dolle nasht juras savrige savo jick tiknobenfande ta nasht kerra duckt savrige savo diro benfar nucko. Tjiron dolle ler nast ascha ovaro, sassfann khoonra timmar to butt divusar abbo gla dolle buttaste kerras kava pre jick divus. Teli kava tjiro honkar diro baschad pre duckalokere. Karni phater pari honkar kerrad rodepha duckalo-moschen uterus. Baschi placentan aschar doj nasht buttare meng kerras. Khonra eftadivusar palla phater pari fyssar diro buttast kerra jick veder trissepha.

Palla eftadivus 18

Palla eftadivus 18 fyssar diro rada kerra phater pari baschi dolle aschar baro topha to kava. Phater pari kerras karni pre savriga sutt savo masker eftadivusar 12 ta 18.

So mollar jeck phater pari?

So dolle mollar te kerra phater pari nasht vaverpha topha pre sar an themmet diro boddrar. Pre butt steddos mostula diro tji projsa baschi diro honkar teli 20 basht. Baschi diro mostula projsa savo mollar dolle 300 lock tji dynkrat pre diro phuro. Baschi diro voltrar jana huri butt dolle mollar doj diro boddrar saste diro frigga manisch pre ternophakeret ire pre nuckokerehilprandet. Diro nasht tasa kamma trissepha ninna phater paristeddot.

Mostula narthan jana?

Mengarna pre steddot kammar motjilleskeuchalipha. Abbo baschi diro saste kerra phater pari nasht dolle honka fedigt baschi jeck vaver manisch janar. Baschi diro honkar terno brukfarar mengarna pre steddot dojga penna te narthan saste fyssa jana  te diro saste kerra jick phater pari. Honkar dolle tji atispha te pramissa kere te diro saste kerra jick phater pari nasht diro attispha pramissa dolle gla jeck vaver baro manisch diro kammar pattjano an. Dolle nasht ascha jeck baro prhal ire pennja, jeck narthan, kuraton ire duckalo-pennjan pre bleddreskekeret ire jeck vaver savo nasht dokka hilprepha.

Baschi diro narthan bliddrar trissepha honkar dolle fann situation to situation pre so diro solus voltrar ta huri phuro diro honkar. Nerridare 18 basht kammar diro buttare sor ta hortepha. Gla dolle buttaste nasht diro fyssa rackla diro ta dova vaver glan to huri diro saste kerra ninna dova mengarna diro trissar. Baschi diro narthan saste fyssa janepha saste diro sarstill jana kava.

Baschi dolle honkar sav te diro narthan tji nasht jana te diro saste kerra jeck phater pari, gla te dolle nasht bliddra kerria koro diro, ler tji mengarna trissepha ninna dova. Te kerra jeck phater pari saste tji kerra te diro avar andre an jick situation savo honkar kerria gla diro. Diro nasht karna kamma hilprepha attjer jick kurator ire jeck vaver mengare.

Palla phater pari

Divusen palla jick phater pari honkar dolle fedigt te truma siro. Teli dova jeckesta divusarna ta uppri to jick eftadivusar nasht diro kamma duckt, savo kintan. Eftadivusarna palla phater pari brukfarar diro ratta savo karni diro kamma kintan ire buttare. Huri langro diro rattar honkar ovaro fann manisch to manisch ta topa savi phater pari diro kammar kerrat. Sav langro diro rattar saste diro tji kamma bulepha, brukfara tamponger ire nanda pallasavo diro nasht kamma jeck infektion. Palla pansh to sinkus eftadivusar brukfarar kintan ava veder.

Palla jeck phater pari nasht diro kansla diro lokkigare ninna vaver manisch kanslar siro tugaloa. Diro nasht tasa jaa glan ta veder masker kava kanslor ta dova nasht ava langro palla phater pari.

Baschi dolle kammar jaat jick langro tjiro nasht diro le trissepha ninna steddot gla te rackla huri diro kanslar. Dolle nasht diro kerra pre steddot doj pahter pari kerrades ire pre ternophakeret.

Dolle nasht topa pre diro kanslar sassaro honkar tjattjot, te diro honkar gla terno ire dolle tji honkar fedigt an diro jibb. Astispha honkar dova mosch bliddrat phater pari kettanes ninna tji dova savo diro voltrar kamma nuckoar ninna. Diro kammar horta te kerra jick phater pari avritan te penna to jeck vaver manisch sosti. Dolle steddrar randrat an phater pharihortan. Diro kammar tasa hortan te potta baschi karna diro voltrar ta dolle honkar nani phuranopottande gla te kerra phater pari.