Gla te rakkepha ternopha manisch fann sass kerria ninna te brukfara tyjali, aschar dolle jeck horta savo pennar te diro tji fyssar tjinna tyjali baschi diro honkar teli 18 basht.
Tyali
Dirots nasht tyali butt ovaroa. Tyjali (cigaretter) honkar dolle buttast. Cigaretter andrekammar tyjali, an thuja fann jeck cigarett aschar dolle 4000 makurjepha, Dova nasht dokka cancer, dova darranoaste honkar:
- Nikotin, jek makurjepha savots rada honkar an dolle savots andrekammar tyjali ire saste hilpra manisch phatra te tyja ire nacka. Nikotin honkar savots kerria sav baschi diro kammade fann star cigaretter an rattet saste diro mula.
- Cyanväte, jeck makurjepha gas.
- Kolmonoxid, jeck makurjepha gas savot janar an tradrare som.
- Tjära, Savo andrekammar butt ovaroa makurjepha, dova nasht topha cancer.
- Vaver darranoa makurjepha honkar muldring, kadmium, ammoniak, bensen ta polonium.
Sosti aggrar manisch tyja?
Dolle janar buttast sav te manisch tyjar ninna siro malar gla jeckesta tjiron. Dova voltrar jura huri dolle smackrar ta kanslar. Attispha dynkrar dova te dolle honkar jibbanot. Manisch brukfarar tji dynkra te dolle smackrar fedigt jeckesta tjiron.
Manisch nasht tyja gla te kansla siro phuranoare. Dolle nasht tasa kanslar te dolle honkar lokkiare te ascha ninna vaver manisch.
Manisch janar te dolle honkar darranot
Manisch janar buttast te dolle honkar kerria te tyja. Abbo dolle honkar lokkigt te dynkra te duckalopha tji avar, ire dova saste phatra glanske dolle bliddrar darranot.
Baschi dirots aggrar tyali aschar dolle khonra tjack savot diro nasht jura, diro kammar kerriare phishi. Kava topha pre truppon bliddrar kerriare pre le uppri syre karna diros tyjar, ta nikotinet fyssar siiat te dabbas siggrare.
Selare an jibbet diros aggrar tyja, baroare astispha te bliddra jeck manisch savo mustula tyja ta te diro kammar duckar ta duckalopha attjer tyjen. Glanske lungorna bliddrat baroa honkar tyjali kerriast koro diro. Diro saste tji nashta le tyjali glanske diro honkar teli 18 basht, aggrar buttar terno manisch tyja.
Passiv tyjali
Baschi diro honkar nerrider manisch savot tyjar sav savot savrige kammora, fyssar diro andre tikno attjer kava. Kava pennas passiv tyjali. Pallasavo passiv tyjali tasa honkar darranot honkar kava tji legalt pre kahakk, mustanhak, mengeskesteddon ta vaver steddon anndre ovaroa hispoer.
Te phatra tyja
Dolle honkar lokkigt te bliddra jek manisch savot mustula kamma tyjali. Rada palla Khonra cigaretter nasht andrescherot bliddra kava attjer nikotintet. Te ascha kava attjer tujali honkar te truppon nii bliddrat mustulande attjer nikotin, kava dolle bliddrar kerria baschi diro tji tyjar, sav pennad abstinens. Dolle nast tasa honka kerropha diro avar an.
Dolle honkar kerria te phatra tyja, abbo diro voltrar ascha mukkano fann kava. Ta selare diro phater tyja kava fedigare honkar dolle. Kava buttaste drabben ta dukalo savo tyjali dokkar, nasht ja topha baschi diro phatrar tyja.
Fediga soskip the tji tuja:
- Diro nasht kamma lover to vaver, aschtersavo dolle mollar butt te tyali.
- Diro kammar fedigare kondition baschi diro tji tyali.
- Diro honkar sastepha avri tujali, soldyj nii ta glansketjiro.
- Diro kammar jeck langroare tjibb.
- Diro kerrar tji diro dad, dakri ta vaver lacka ire tugalo.
- Diro mustula tji honka nervolo ta kansla diro voltar tyali.
- Isinganra kandrar tji.
- Diro mustula tji kamma kerria moj kander ire gulo dander.
- Baschi diro honkar teli 18 basht nasht diro kerra lattjoare ninna diro tjiro jeck tjinna tyjali.
- Diro flata bliddrar tji kerria sass gla siggrepha.
- Tujaliodling poggrar trujali pre buttvar najek ta dova savot odlar dabbas attjer sass kerria.
Baschi diro tji janar baschi diro saste tyja ire tji, nasht diro kerra iller ninna ulavela ta menulave. Dolle nasha ascha tikno ta baro ulavela ta menulave, savo aschar diro jibb, vaver manisch, miljön ta butt vaver. Dolle honkar diro solus iller, ta diro savo saste potta savi savo saste kerras, sar diro voltrar kerra ninna trujali.