ОАНЬХЭСЬ КЫРРЬЙ

Тэ̄дт оаньхэсь кыррьй лӣ тэ̄н баяс манҍтэмь ло̄ссесь я̄лл лӣ са̄мь кӣлэсьт Коа̄ллнэгк нёаркэсьт.
Ко̄ллмлоагкь ыгке кыжьмильтэ моа̄ххтсэллэв са̄рнэ са̄мас школэнҍ, ПТУ, садикэсьт.
Выгкенҍ югке са̄мь кӣ̄л курсэтҍ, ко̄ххт сыйтэсьт, нышше я̄̄вьр рынтэсьт ке̄сся.
Ма̄тҍхэнҍ, ноа са̄ррнэ ванас ке̄ са̄рнэшкудӭ.
Та̄рьмья пя̄ййва кӯдтэй ванӓ чӯдтӭ о̄ллмае, ке̄ чӣллктэннӭ са̄ррн са̄мас.

Мэ̄нн быдт лыххкэ, мэ̄нн быдт вуайхе?
Вуайй уййнэ, ко̄ххт кӣлл пыньювв мӣн поа̄лт е̄ллей соа̄менҍ я мыйе вуайй ныдтҍшэ лыххкэ.
Суомапелльт ле̄в лыхкма мугка «кӣлл пе̄зь», касьт па­̄рнагуэймь са̄ррнэв пе̄ййвбайй лышшэ са̄мас, ев кӣчь оа̄ннтшэв ев оа̄нтэшш.
Ноа па̄рна тэ̄нн шэ пӣзесьт вуэйев са̄ррнэ кӣлле манҍтэм са̄ррнэв сӣнэгуэймь пэҏҏтэсьт.

Ныдтҍшэ сӣнэнҍ ле̄в са̄мь кӣл центр, касьт кӣлл пыньювв я касьт югке туетҍ лыххкэв моа̄йнса пайй са̄мас: моа̄ххтсэллэв пе̄ррк чӣннэ, туетҍ югкеналшэм тӯйшэ я во̄дтэдэв ва̄рра, чӣррэ, ёавре эл.
Луявврь са̄мь, ке̄гк та̄ххтэв я̄ллахьтэ са̄мь кӣл Куэлнэгк нёаркэсьт, юррьтэв пуэдтэмь альт а̄йкесьт лыххкэ мугка шэ центр мӣнэнҍ.
Я быдт лыхкэ тэ̄н кӣл центр Луявресьт, касьт е̄ллев я̄наш са̄мь о̄ллмэ.

Кӣл центр аллк выгкэ кӣл курсэтҍ о̄лмэтҍ, ке̄гк туввэв моа̄хтъе са̄ррнэ са̄мас.
Тэ̄дт центр аллк ве̄кьхе кыҏҏьйхэм о̄ллмэтҍ, ко̄пче е̄ркъя соа̄гэтҍ я ве̄кьхе «кӣл пе̄зь» выгкъетҍ.

Ныдтҍшэ аллк лыхкэ о̄ххпнувэм кыҏҏьй тӯетҍ.

О̅̅ллмэтҍ, кегк тӣдтӭв са̄мь кӣл, быдт югке са̄енҍ са̄ррнэ са̄мас я нышше ка̄ннҍц ка̄нҍцесьгуэймь са̄ррнэ са̄мас, танна кӣлл пуэйян я е̄лешкуадт!

Мугка шэ рэ̄ст лӣ кӣ̄л баяс э ыжмэнҍ.
Соа̄метҍ я ыжэм о̄ллмэтҍ быдт э̄̄ххтуввэ я выгкэ тэййт туетҍ эвтэс.

Кырьйха лӣ Нӣна Шаршина, Валентина Кириллова, Алла Васильева я Са̄нндрэ Антонова.