Joekehts programmigujmie learohkh maehtieh hijven digitale vuasahtallemh darjodh, aelhkie dïrregigujmie. Daate barkoe sjeahta gaajhkine jaepiedaltesinie. Maahta man jïjnjem jïh njieptjiem daltesasse jïh dan aktegs learoehkasse sjïehtedidh.
Lohkehtæjja tjuara haalvedh dejtie voemeluktie nåhtadamme funksjovnide aarebi satne barkojne learohkigujmie nearhka.
Jis learohkh ovnohkens barkoevuekine, dah byøroeh aktem åenehks fotsoptsesem ektesne voestegh darjodh. Lohkehtæjja vuesehte, buerkeste jïh bïhkede. Dan mænngan learohkh maehtieh oktemierien voejhkelidh. Fotosoptsesh maehtieh mænngan guhkies jïh geerve sjïdtedh, jïh aktem faageles sisvegem utnedh.
NB! Mujhtieh learohkigujmie soptsestidh guvviereaktaj jïh gaaltijeåtnoen bïjre.
Dalhketjh
- pc tjoejekåarhtine
- mikrofovne
- digitale kaamera
- guvvieh
- programmevaaroe maam maahta nåhtadidh juktie tjoejem, guvvieh, video jïh tjaalegh aktanidh (Akte dagkeres programme lea daamtaj pc’ine, jïh namhtah programmh aaj gååvnesieh.)
- guvviestaeriedimmieprogramme. (Jis ij leah programmevaaroe bïejesovveme guvviegïetedæmman daatovrisnie, dle jïjnjh namhtah programmh gååvnesieh mejtie maahta våålese leessedh.)
Naemhtie dorje
Learohkh aktem tjaalegem tjaelieh jïh disse illustrasjovnem bïejieh, jallh dah tjaalegh guvvide tjaelieh. Dah tjoejem disse bïejieh, tjaalegem luhkieh jïh/jallh musihkem lissiehtieh. Dah tjaalegh maehtieh heamtuvrh, dikth, laavlomh jïh jïjtsh soptsesh årrodh. Learohkh maehtieh digitale fotosoptsesh lïerehtimmiebarkosne nåhtadidh ovmessie faagine. Dah maehtieh faagetjaalegh tjaeledh, faageaamhth øørnedidh jïh vuartasjimmieh jallh barkoevuekiem vihtiestidh.
Maahta fotosoptsesh nåhtadidh gosse learohkh sïjhtieh maam akt mubpide åehpiedehtedh.
Barkoevuekie
- Lohkehtæjja muana, jallh learohkh sjaangerem jïh aamhtesem veeljieh fotosoptsesasse.
- Learohkh guvvieh vaeltieh, guvviedieh jallh guvvieh nedtesne gaevnieh. Lohkehtæjja maahta badth aaj dejtie naan guvvieh vedtedh, mej gaskem maehtieh veeljedh.
- Learohkh voestes jïh minngemes sæjroem darjoeh. Dam maahta darjodh jïjtjehke programmesne, akte guvviedimmieprogrammesne jallh aktine åehpiedehtemedïrreginie. Jis guvviedimmieprogrammem jallh åehpiedehtemedïrregem nåhtadieh, tjuerieh fijlide vøørhkedh guvvieformatesne goh jpg jallh jpeg. Åvtesæjrosne edtja vuesiehtimmien gaavhtan tjaalegetjaelijen nomme årrodh. Daesnie maahta aaj akte guvvie årrodh goh illustrasjovne aamhtesasse, jallh mij iedtjem skreejrie disse.
- Minngemes sæjrosne edtja tjåadtjodh gieh fotosoptsesem dorjeme. Desnie edtja aaj tjåadtjodh gusnie gaaltijh gaavneme. Learohkh tjuerieh dovne musihkem, tjaalegh jïh guvvieh mujhtedh.
- Learohkh tjaelieh jallh lïjmesjieh tjaalegem, jïh guvvieh disse bïejieh. Dah tjaalegem luhkieh, tjoejh lissiehtieh jïh musihkem bïejieh. Dah sertiestimmieh darjoeh.
- Minngemosth learohkh waw-fijlem darjoeh.
- Learohkh fotosoptsesidie sinsætnan vuesiehtieh. Dah maehtieh aaj dejtie vuesiehtidh gosse eejhtegh guessine klaassesne..
Lohkehtæjja vuarjesje dam gaervies fotosoptsesem. Jis learohkh fotosoptsesem lïerehtimmiebarkosne nåhtadieh, maahta aaj dam faageles sisvegem vuarjasjidh. Akte fotosoptsese maahta aaj våaroeminie årrodh juktie learohken reaktoetjaelemem jïh baakoeveahkam saemienfaagesne vuarjasjidh.
Nuelesne akte goere maam maahta nåhtadidh vuarjasjimmesne iktemearan. Dah ulmieh mah leah veeljeme, edtjieh progresjovnem barkosne vuesiehtidh. Daesnie lohkehtæjja maahta learohki evtiedimmiem fulkedh. Learohkh maehtieh goerem nåhtadidh gosse jïjtjemse jallh sinsitniem vuarjasjieh.
Vuarjasjimmie
| Learohke maahta |
|
| guvvieh vaeltedh digitale kaamerinie |
|
| datamaskin guvvieh sertedh aktede kaameristie akten daatovrasse |
|
| sov guvvieh pc’sne gaavnedidh |
|
| tjaalegh daatovrisnie tjaeledh |
|
| tjoejem bæjjese vaeltedh digitale viehkiedïrregigujmie |
|
| tjaalegem jïh guvvieh tsaekedh |
|
| aktem fotosoptsesem soejkesjidh gusnie guvvieh, tjaeleme tjaalegh, tjoeje jïh musihke |
|
| fotosoptsesem darjodh gusnie guvvieh, tjaeleme tjaalegh, tjoeje jïh musihke, jïh dam tjåanghkan bïejedh guktie hijven sertiestimmieh sjïdtieh |
|
| vuartasjimmieh jallh aktem barkoevuekiem vihtiestidh |
|
| faageaamhth åehpiedehtedh |
|