Ektiedahkoereforme

Buerebe ektiedahkoe dan bööretjommese årroejidie

Reformen ulmie lea vielie heerredidh, aarebi båehtjierdidh jïh buerebe ektiedahkoem utnedh. Skïemtjijh jïh utnijh edtjieh varke jïh hijven viehkiem åadtjodh gosse dam daarpesjieh, dan lïhke årromesijjien goh gåarede. Dah edtjieh reaktoe båehtjierdimmiem, reaktoe tïjjen jïh reaktoe sijjesne åadtjodh, akten ållesth jïh iktedamme healsoe- jïh hoksedïenesjefaalenassen tjïrrh. Edtja ållesth jïh iktedamme dïenesjh gorredidh gaskem jeatjah maahtoebïgkemen jïh laavenjostoelatjkoej tjïrrh jïh latjkeme båehtjierdimmiesoejkesjen tjïrrh skïemtjegåetiejgujmie. Dïenesjh edtjieh hijven kvaliteetem utnedh, gaajh jearsoes årrodh skïemtjijidie, åenehks vuertemetïjjem utnedh jïh fïereguhten skïemtjijasse sjïehtedamme årrodh.

Orre laakh våaromem biejieh

Ektiedahkoereforme lea gårreldamme göökte laakine: almetjehealsoelaake jïh healsoe- jïh hokselaake. Gåabpegh laakh leavloem biejieh healsoesjugneden jïh heerreden barkose. Healsoesuerkie edtja eadtjohkelaakan meatan årrodh almetjehealsoebarkosne, jïh heerreden råajvarimmieh healsoedïenesjinie faalehtidh, jïh meatan årrodh dennie gamte almetjehealsoebarkosne mij lea siebriedahken vööste.

Fylhkenålman laavenjassh

Fylhkenålma edtja vijriesåbpoe barkedh ektiedahkoereformine, jïh viehkiehtidh guktie skïemtjijejearsoesvoete, skïemtjijereaktah, eensivoete dïenesjinie jïh jearsoes skïemtjijesoejkesjh gorresuvvieh. Fylhkenålma edtja aaj viehkiehtidh iktedidh jïh dåarjedidh nasjovnaale, regijovnaale jïh voenges aktööri barkoem gosse reformem sjïehtesjeminie, viermiebïgkemen jïh dåårjehtimmiejuekemen tjïrrh.

Fylhkenålma edtja aaj raeriestidh jïh bïhkedidh regijovnaale jïh tjïelten aktöörh. Fylhkenålma maahta aaj vaaksjodh healsoesïelth, fylhkentjïelth jïh tjïelth sijjen dïedth tjïrrehtieh.