Båatsoen båetijen aejkien gaavhtan
–Båatsosne garres daelie, jïh abpe dam dåarjoem daarpesje maam maahta åadtjodh. Thomas Åhrén sov vaajmoem båatsosne åtna. Dïhte veanhta dan gïerve tsiehkien gaavhtan dle Saemiedigkie tjuara tjerkebelaakan pryöjjadidh.
Thomas båatsoefuelhkesne byjjeni Raedtievaerien sïjtesne sveerjen bielesne. Akte sïjte mij dovletje aaj gåatomelaantem nöörjen bielesne utni. Daan biejjien teknihken åvtehkinie barka Namdalseiden tjïeltesne.
– Manne aktene tjïelke saemien byjresisnie byjjenim, jïh sïjhtem mov nïejth edtjieh aaj dam nuepiem åadtjodh, Åhrén jeahta. Dan åvteste ektiedimmiem båatsose utniehtamme, jalhts dïhte dåaktovregraadem vaalteme gïehtelimmien jïh gorredimmien sisnjeli. Dïhte veele damta gusnie beehtjede aktene dejstie vihkielommes jieliemijstie Saepmesne.
– Vihkeles jearsoes jïh daajroes mierieh sjugniedidh. Naemhtie goh reaktah gåatomelaantese jïh aktem daajroes juvrepolitihkem, jeahta, jïh tjïerteste juvreveahka tjuara ånnanidh båatsoesïjtine. Aarebi daan jaepien akte dotkemereektehtse bööti bovtseteehpemen bïjre juvride, viertiestamme jaememinie beapmoevaanoen gaavhtan. Dellie dotkije Thomas Åhrén hïehpeni. Dïhte gyhtjelassh gihtji dotkijen premissi bïjre, jïh vuekien bïjre maam dotkije nuhtji. Mannasinie dotkemereektehtse ij naan hedtiem utnieh gænnah dejnie guvvine aarkebiejjeste maam båatsoesaemieh jïjtje utnieh?
Juvrelåhkoe tjuara våålese
– Akte båatsoealmetje ojhte daajra maam juvrh maahta bovtsigujmie darjodh. Juvrh gåatomedajvine ij leah ajve ryöktesth teehpeme, dah abpe krievviem sturrieh. Dah bovtside dåalvoeh guktie dah eevre faamohts sjidtieh, Åhrén jeahta, mij joekoen båatsoen nuepiejgujmie ååntjestalla.
– Dah mah bovtsigujmie gïehtelieh aktem joekoen garre jieledem utnieh. Båatsoe gelliej aajhtoej uvte tjåådtje. Gïervebe gïervebe sjædta båatsoealmetjinie årrodh, Åhren jeahta jïh gruvadarjomh neebnie mij lea akte dejstie darjoemijstie mij gåatomelaantem goerpedahta.
– Joekoen gïerve jeatjah dajvh åadtjodh mah vuesiehtimmien gaavhtan biegkefaamose gaarvanieh. Manne vïenhtem maaksoe vaalteme gåatomelaanten åvteste, tjuara orre dajvh årrodh. Jis ij dam åadtjoeh dle tjuara raaktan krievviem gåatomelaantesne giehpiedidh, jeahta jïh veanhta saemiedigkien politihkerh tjuerieh dan bïjre tjerkebelaakan pryöjjadidh.
Thoma Åhrèn veanhta daah dåeriesmoerh stuerebe fokusem daarpesjieh. – Dellie vihkeles sjædta aktine nænnoes gïeline, vuesiehtimmien gaavhtan dotkemereektehtsi vööste. Daamtaj ij våajnoes sjïdth dotkemereektehtsinie gåatomedajvh unnebe jïh nåakebe sjidtieh, jeahta.
Båatsoe tjuara årrodh
– Båatsoe lea joekoen vihkeles saemien siebriedahkesne. Mijjieh tjoerebe reaktam akten båatsose gorredidh maam maehtebe damtijidh, akte iemie båatsoe saemide, jeahta. Dan åvteste vihkeles orreme fuelhkieålma Åhrénese nïejtide meatan vaeltedh, dovne gosse edtjieh miesieh mïerhkesjidh giesege, jïh leekedidh tjaktjen:
– Daate akte aerpievuekie sjïdteme.
Gosse nïejti bïjre soptsestibie dle Thomas jeahta satne lea gijhteles dej faalenassi åvteste mejtie åadtjoeh. – Mijjen nïejth saemien ööhpehtimmiem skuvlesne åadtjoeh, jïh kultuvredaajroe akte iemie bielie ööhpehtimmeste, goh duedtie, religijovne jïh eatnemefaage. – Daate hijven, men faalenasse maahta buerebe sjïdtedh jïh jieniebidie jaksedh, jeahta.
– Dïhte daajroe maam saemien kultuvren tjïrrh åådtjeme, im lim sïjhteme bielelen årrodh. Dïhte akte stoerre aevhkie. Seamma tïjjen ööhpehtimmiem stoerresiebriedahkeste åtnam. – Naemhtie maahtam ussjedalledh gåabpagihtie bieleste, minngemosth jeahta.
