Laara Dunfjeld: Gïele tjuara åtnasovvedh
– Jaavoe, manne maahtam saemiestidh. Laara guarkeme satne tjuara saemiestidh. – Tjoerem amma doestedh aelkedh saemiestidh. Jis im manne dam darjoeh, guktie maahtam veanhtadidh gïele edtja jieledh guhkiebasse?
Lars Peder Dunfjeld (26) gohtjesåvva ajve Laara. Daate lea akte dejstie jielije åarjelsaemien aerpievuekijste; saemien nommh åtnasuvvieh. Akte jeatjah aerpievuekie lea gïele, mij aaj jielieminie, men lea UNESCOn læstosne itjmies håvhtadihks gïeligujmie. – Mijjeste dan vaenie, jïh mijjieh dan bårrode årrobe, guktie daerpies gaajhkesh dovnesh aktem lissiebarkoem darjoeh jis gïele edtja aktem båetije aejkiem utnedh, Laara jeahta.
Jealajimmie vierhtieh kreava
Åarjelsaemien dajvesne eah skraejrieh fååtesh juktie gïelem jealajehtedh. Gïelejarngh, kultuvrejarngh, saemieskuvlh jïh ovmessie prosjekth. – Saemiedigkie jïh staate tjuerieh mijjem dåarjoehtidh jis mijjieh edtjebe aktem hillem utnedh. Jalhts mijjieh jïjtje aktem vihkeles barkoem darjobe gosse gïelem åtnose vaeltebe, dle beetnegh daerpies jis edtjebe buektiehtidh tjïrrehtidh dejtie ovmessie prosjektide mejtie daarpesjibie. – Manne sïjhtem beetnehdåarjoem gorredidh gaajhkide skraejride mah gååvnesieh, jïh vïenhtem dåarjoeöörnegh tjuerieh gååvnesidh mah sagke jieniebidie skraejride skreejrehtieh, Laara veanhta.
Laara lohkehtæjjine saemien gïelesne barkeme minngemes jaepien, jïh vuajneme guktie saemienööhpehtimmie akte dåårrese sjædta dejtie jeatjah tæjmojde. – Ij leah nuekies sjïehteladteme gosse jeatjah ööhpehtimmiem dassa. Learohkh eah sïjhth saemien utnedh jis tjuerieh saemien utnedh vïtnedimmietæjmojne, Laara jeahta jïh minngemosth jeahta:- Tjoerebe dam öörnegem jarkelidh guktie dïhte aarvoem mijjen gïeleste jïh kultuvreste tjïelkeste.
