Nora Bransjell: Voeresi joekehts vierhtieh
– Mijjieh tjoerebe dejtie saemien voeresidie vuejnedh goh almetjh joekehts vierhtiejgujmie jïh joekehts daerpiesvoetigujmie, Nora Marie Bransfjell jeahta, mij saemiepolitihken sïjse sæjhta juktie aaj voeresi aamhtesidie soptsestidh, dovne dejtie voeresidie daan biejjien jïh dejtie mah iktemearan båeries sjidtieh.
Nora Marie Bransfjell, andrekandidat i sørsamisk valgkrets
– Manne vïenhtem saemien voeresh leah akte dejstie vihkielommes vierhtijstie mijjieh utnebe. Dah voeresh jïjnjem daajrojste jïh dåårjehtimmijste meatan guedtieh, vuesiehtimmien gaavhtan gïelen jïh jielemi sisnjeli, jïh fïereguhte aktem sjïere histovrijem åtna soptsestidh, Bransfjell jeahta.
Nora veanhta mijjieh dennie saemien siebriedahkesne tjoerebe vihth aelkedh dejtie voeresidie ååktedh, jïh dejtie baajedh vielie våajnoes jïh gåvloes årrodh siebriedahkesne. – Kultuvrem, gïelem jïh aerpievuekide vaarjelidh, guktie edtjebe dam darjodh jis ibie åadtjoeh lïeredh dejstie mah bodtem jieleme? Dah voeresh daajroem meatan guedtieh mij mijjem saemine tjïelkeste, jïh gaajhkesh dovnesh sijhtieh aevhkiem utnedh buerebe mieriejgujmie juktie daajroem sertiestidh dejtie nuerebe boelvide, Nora jeahta.
Boelvegaavnesjimmie
Bransfjell veanhta jïjnje maahta dorjesovvedh juktie voeresidie aktem sijjem vedtedh siebriedahkesne mij mïelem vadta. Byöroe maehtedh gaavnesjimmieh öörnedidh jieniebidie boelvide guktie dah maehtieh joekehtslaakan gaavnesjidh jïh joekehts dajvine. Voeresh jïh noerh maehtieh gaavnesjidh gusnie åadtjoeh soptsestalledh, digkiedidh jïh soptsestidh. Mejtie vuejnebe daerpies aktine jïjtse åarjelsaemien voereseraerine aaj, jaa mejtie aaj sjïere voeresedïenesjh? – Guessiedïenesjh jïh skïemtjijegovlehtallijh leah råajvarimmieh mejtie manne vïenhtem leah vihkeles juktie voeresi vyörtegsvoetedomtesem lutnjedh. Mov mïelen mietie dle daate vihkeles råajvarimmieh, eah ajve dejtie voeresidie, Nora Bransfjell jeahta, mij gaskem jeatjah sæjhta daejtie vuajnojde bæjjese lutnjedh Saemiedigkesne.
