Aamhtese 10/234

Saemiedigkie – Govlehtimmie orre ryøknemenjoelkedassijste jïh joekedimmievæhtijste guektiengïeledåarjose tjïeltide jïh fylhkentjïeltide mah leah saemien gïelen reeremedajvesne

                                                                                                                                                           

Gietedæjja

Sijjie

Tjåanghkoeb.

Aamhtsenr

Fylhkenraerie Noerhte-Trøøndelagesne

Fylhken gåetie, Stientje

30.11.2010

10/234

 

Aamhtesegiet.

  Sigurd Kristiansen

Våarhkoeaam.

  10/06889

Våarhkoekod.

  007

 

 

Fylhkenraerijen raeriestimmie nænnoestæmman:

 

Fylhkenraerie birrie Saemiedigkiem joekoenlaakan krøøhkedh dejtie sjïere haestemidie åarjelsaemien dajvesne gosse edtja orre væhtah jïh joekedimmiemaallh guektiengïeledåarjose sjïehtesjidh.

 

Orre joekedimmiemaallh tjuerieh vuesiehtidh dejtie sjïere haestemidie åarjelsaemien dajvesne, jïh eah darjodh guktie vaenebe vierhtieh guektiengïelebarkose båetieh Snåasen tjieltese jïh Noerhte-Trøøndelagen fylhkentjïeltese.

 

Fylhkenraerie vijriebasse birrie guektiengïelebarkoe Noerhte-Trøøndelagesne annje maahta gelliesåarhts råajvarimmieh utnedh juktie evtiedidh jïh sïejhmelaakan vååjnehtidh dam åarjelsaemien gïelem jïh kultuvrem.  

 

Tsiehkestahta vijriebasse dah sjïere latjkoeh Saemiedigkien jïh Noerhte-Trøøndelagen Fylhkentjïelten gaskem jïh Saemiedigkien jïh Snåasen tjïelten gaskem nuepieh vedtieh voenges sjïehtedimmieh buektiehtidh mah dam sjïere tsiehkiem åarjelsaemien dajvesne krøøhkieh.

 

Fylhkenraerijen vuarjasjimmie:

 

Dïhte tsiehkie åarjelsaemien dajvesne lea naemhtie guktie eevre daerpies aktine stuerebe barkojne juktie åarjelsaemien gïelem jïh kultuvrem vaarjelidh.

 

Øørnegen tjïrrh saemien gïelen reeremedajvine, Noerhte-Trøøndelagen Fylhkentjïelte jïh Snåasen tjïelte guektiengïeledåarjoeh Saemiedigkeste åadtjoeh daan barkose. Jis guektiengïelebarkoen syjhtedassedaltese edtja tjåadtjoehtidh, die vihkeles vierhtieh eah vaanenh.

 

Dannasinie åarjelsaemien gïelen jïh kultuvren tsiehkie lea prååsehke, dle byøroe annje maehtedh Saemiedigkien guektiengïelevierhtieh gellie såarhts råajvarimmide nåhtadidh, mah evtiedieh jïh vååjnehtieh åarjelsaemien gïelem jïh kultuvrem fylhkesne. 

 

Jïjnje dehtie vihties gïeleevtiedimmiebarkoste lea voenges byjresisnie, dennie aktegs tjïeltesne reeremedajvesne. Åarjelsaemien dajvesne dle Snåasen tjïelte aktem sjïere haestemem åtna gïeledienesjh tseegkedh, jïh voerkelimmiem åarjelsaemien kultuvren bïjre sjugniedidh, sïejhmelaakan. Dannasinie vihkeles dïhte båetije joekedimmie guektiengïelevierhtijste vuesehte daejtie vihkielommes daerpiesvoetide, jïh tjïelte vierhtieh åådtje mah unnemes daan beajjetje syjhtedassedaltesem tjåadtjoehtieh guektiengïelebarkosne.

 

Saemiedigkieraerie raereste sjïere latjkoeh darjodh Saemiedigkien jïh dan aktegs tjïelten jïh fylhkentjïelten gaskem guektiengïelebarkosne. Tsiehkestahta dah latjkoeh nuepieh vedtieh voenges sjïehtedimmieh darjodh mah dam sjïere tsiehkiem åarjelsaemien dajvesne krøøhkieh.

 

Stientje, gålkoen 23.b. 2010

 

Annikken Kjær Haraldsen/s
kultuvren fylhkenraerije

 Aamhtsesalkehtimmie fylhkenraaran

 

Iktedasse

Vuesehte fylhkenraerijen notatese, gietedamme Fylhkenraerien tjåanghkosne 16.11.2010, Noerhte-Trøøndelagen Fylhkentjïelten govlehtimmielahtesen bïjre Saemiedægkan, dan raeriestimmien bïjre Nye beregningsregler og tildelingskriterier for tospråklighetstilskuddet til kommuner og fylkeskommuner innenfor forvaltningsområdet for samisk språk/

Orre ryøknemenjoelkedassh jïh joekedimmievæhtah guektiengïeledåarjose dejtie tjieltide jïh fylhkentjïeltide mah leah saemien gïelen reeremedajvesne

 

 

Lissietjaalege mij aamhtesem  dåerede goh svaalhtese:

 

Salkehtimmie:

 

Aalkoe/våarome

Noerhte-Trøøndelagen Fylhkentjïelte (NTFT) lea ektine Snåasen tjïeltine aktem bieliem saemien gïelen reeremedajveste orreme, mænngan 1.1.2008. Daan sjiekenisnie NTFT 1.2 mill. kr dååste fïerhten jaepien dagkarinie guektiengïelevierhtine Saemiedigkeste, juktie åarjelsaemien gïelem jïh kultuvrem Noerhte-Trøøndelagesne evtiedidh jïh vååjnehtidh.

 

Dah vierhtieh uvtemes 3 såarhts råajvarimmide åtnasuvvieh.

 

1. Sisnjelds råajvarimmieh NTFT, aaj bæjngoeh eetath

2. Råajvarimmieh laavenjostosne Snåasen tjïeltine, gaskem jeatjah gïelejarnge-råajvarimmie

3. Dåarjoe bæjngoeh råajvarimmide jïh prosjekth ohtsemen mietie

 

Eajhnadovveme Saemiedigkien guektiengïelevierhtieh vihties gïeleevtiedæmman nåhtadidh, jïh dæjpeles guektiengïelevoetem fylhkentjïeltesne buektiehtidh. Latjkoen mietie Saemiedigkine, dle NTFT laenjeds orreme sisvegen bïjre guektiengïeleråajvarimmine, jïh mijjieh gellie såarhts råajvarimmieh jïh darjomh dåårjeme mah evtiedieh jïh siejhmelaakan vååjniehtieh åarjelsaemien gïelem jïh kultuvrem fylhkesne.

 

Saemiedigkien sertiestimmie guektiegïelevierhtijste lea gøøkth fïerhten jaepien, jïh våaromem åtna mijjen reektehtsinie, reeknemassine jïh darjomesoejkesjinie. Dah reektemevuekieh leah dejnie jeanatjommes tjïeltine jïh fylhlkentjïeltine saemien gïelen reeremedajvesne vuajnalgamme goh ovdaerpies striengkies. Saemiedigkie dan åvteste barkeme orre vuekiejgujmie jïh væhtajgujmie guktie edtja guektiengïelevierhtide joekedidh jïh reektedh.

 

Noerhte-Trøøndelagen Fylhkentjïelte lïhke Snåasen tjïeltine laavenjostoe guektiengïelebarkosne, jïh tjaktjen 2010 aaj Raavrevijhken tjïelte ohtseme guektiengïele-tjïeltine sjïdtedh, øørnegen nuelesne saemien gïelen reeremedajvine. Mejtie jïh gåessie Raavrevijhken tjïelte akte bielie daehtie barkoste sjædta, dam sæjhta voestegh daejredh jaepien 2011. 

 

 

Aamhtesen sisvege / dåeriesmoerh

Saemiedigkieraerie daelie govlehtæmman buakta - Nye beregningsregler og tildelingskriterier for tospråklighetstilskuddet til kommuner og fylkeskommuner innenfor forvaltningsområdet for samisk språk. / Orre ryøknemenjoelkedassh jïh joekedimmievæhtah guektiengïeledåarjose dejtie tjieltide jïh fylhkentjïeltide mah leah saemien gïelen reeremedajvesne

Govlehtimmiemierie lea goeven 1.b., jïh Saemiedigkien dievetjåanghkoe sæjhta dejtie orre ryøknemenjoelkedasside jïh joekedimmievæhtide gietedidh goevten 2011. Veanhtede dah orre njoelkedassh sïjhtieh aelkedh juhtedh 1.1.2012.

 

Maaksoestuvreme maalleste måalestuvreme maallese:

Saemiedigkien joekedimmievæhtah lea daan biejjien stuvreme maaksojste jïh dle taallide reektehte, jïh ånnetji aaj mah råajvarimmieh tjïelth jïh fylhkentjielth tjïrrehtamme. Gosse aktem orre, måalestuvreme maallem sjïehtesje, dellie reekteme sæjhta fokusem utnedh dejnie ulmine mejtie edtja jaksedh, gosse edtja almetjidie gaagkestidh jïh saemien gïelem evtiedidh.

 

Saemiedigkie daajra tsiehkie lea joekehts gosse lea gïeleevtiedimmien bïjre, tjïelteste tjïeltese jïh fylhkentjïelteste fylhkentjïeltese. Stoerre joekehtse guktie tsiehkie lea Finnmarhkesne, gusnie saemien muvhtine tjïeltine lea voestesgïele, jïh Noerhte-Trøøndelagesne gusnie dïhte barkoe guektiengïelevoetine lea aalkovisnie, jïh fokusem åtna åarjelsaemien gïelem jïh kultuvrem vååjnehtidh.  Saemiedigkie sæjhta dejtie joekehtsidie krøøhkedh dej orre joekedimmievæhtaj jïh reektemekrievemi tjïrrh. Sæjhta dan åvteste jïjtsh latjkoeh darjodh Saemiedigkien jïh fïereguhten tjïelten /fylhkentjïelten gaskem, mah individuelle sjïehtedimmiem væhtijste jïh krievemijstie gorrede.

 

Dåarjoe golme bieline: Saemiedigkieraerie raereste dïhte orre joekedimmieøørnege guektiengïelevierhtijste golme bieline sjædta:

 

1: Betniebielie.

Akte betniedåarjoe 45 % dehtie fylhlkentjïelten låhkoste guektiengïelevierhtijste. Daate bielie dåarjoste edtja dam sïejhme lissiemaaksoem maeksedh maam fylhkentjielte åtna gosse edtja gøøktine gïeline gaagkestidh. Betniedåarjoe edtja mierine årrodh mij våaroemasse biejesåvva jis edtja buektiehtidh saemiengïelesne gaagkestidh, dovne tjaaleldh jïh njaalmeldh. Saemiedigkie ij sïjhth krievedh reeknemassereektehtsh daan bielien åvteste dåarjoste.

 

2. Gaagkestimmiebielie.

Daennie bielesne dåarjoste lea dïhte barkoe almetjh gaagkestidh saemiengïelesne dejnie reeremetjïeltine mah leah fïereguhtene fylhkentjïeltesne. Gaagkestimmiebielie edtja 35 % årrodh dehtie ållesth guektiengïeledåarjoste fylhkentjieltide. Beetnehveahkam joekede mestie man gellie tjïelth mah leah saemien gïelen reeremdajvesne, jïh dan mænngan dejtie joekede fïereguhten fylhkentjieltese. Saemiedigkie ij sïjhth krievedh reeknemassereektehts dan bielien åvteste dåarjoste.  

 

3: Evtiedimmiebielie.

Daan beajjetje dåarjoeøørnege ij leavloem biejh faalenasside gieelråajvarimmiej bïjre årrojidie. Raereste dannasinie aktem evtiedimmiebieliem sjïehtesjidh mij lea 20 % dehtie guektiengïeledåarjoste fylhkentjïeltide. Maahta evtiedimmiebieliem nåhtadidh riektes gïeleråajvarimmide abpe fylhkesne, jïh ij leah vïhtesjamme tjïelth mah leah meatan saemien gïelen reeremedajvesne. Tjuara dåarjoen evtiedimmiebieliem reektedh, aaj reeknemassine.

 

Tjirrehtimmie orre øørnegistie

Saemiedigkie ryøknoe 2011 goh akte sertemejaepie, jïh joekedimmie guektiengïelevierhtijste seamma daltesisnie sjædta goh 2010 dejtie tjïeltide jïh fylhkentjïeltide saemien gïelen reeremedajvesne. 2012 raejeste sæjhta aktem jarkelimmiem sjïdtedh, mestie guktie dah orre væhtah sïjhtieh tsevtsedh dam aktegs tjïeltem jallh fylhkentjïeltem. Akte raeriestamme orre ryøknememaalle Saemiedigkeste vuesehte guektiengïeledåarjoe NTFT maahta ånnetji unnebe sjïdtedh 2012 raejeste, bene geerve eevre seekere årrodh, ihke dåarjoen evtiedimmiebielie lea jearohks dejstie reekteme darjomijstie. Dastegh Raavrevijhken tjïelte meatan sjædta saemien gïelen reeremedajvesne, dellie gujht akte lissiehtimmie sjædta guektiengïeledåarjoste NTFT Saemiedigkeste.

 

 

Illedahkh

Daan beajjetje øørnege joekedimmine jïh reekteminie guektiegïelevierhtijste maahta ånnetji måjkoes vååjnedh gosse lea misse dah vierhtieh maehtieh åtnasovvedh.

Dïhte orre øørnege maam daesnie raereste, sæjhta vielie øørnegen mietie årrodh, jïh ij goh unnemes sjïere latjkoeh Saemiedigkien jïh fïerhten fylhkentjïelten gaskem sïjhtieh akte hijven jarkelimmie årrodh. Akte dagkeres latjkoe sæjhta nuepieh vedtedh jååhkesjimmiem åadtjodh Saemiedigkeste, mah vihties råajvarimmieh mijjieh byørebe prijoriteradidh mijjen fylhkesne, mah mietiemoerevæhtah mijjieh edtjebe nåhtadidh jïh guktie mijjieh bøøremeslaakan maehtebe tjïrrehtamme darjomh jïh åtnoem vierhtijste reektedh.

 

Saemiedigkien raeriestimmie guktie edtja dåarjoen stoeredahkem ryøknedh 2012 raejeste, maahta darjodh guktie dïhte fïerhten jaepien joekedimmie guektiengïelevierhtijste NTFT unnebe sjædta, bene daan sjiekenisnie dle mijjieh aaj tjoerebe råajvarimmieh buektedh gïeleevtiedæmman, guktie dåarjoen evtiedimmiebielie dan stoerre sjædta goh gåarede. Naemhtie mijjieh toelhkestibie dejtie orre væhtide, ryøknememaallem jïh dam orre øørnegem dejnie sjïere latjkojne Saemiedigkine, NTFT sæjhta maehtedh aktem dåarjoem åadtjodh mij darjomedaltesem jïh reaktoe daerpiesvoetem vuesehte.

 

Snåasen tjielte sæjhta Saemiedigkien govlehtimmiem gietedidh tjïelteståvrosne 25.11.10. Reeremen raeriestimmesne govlehtimmelahtesasse tjåådtje Snåasen tjïelte Saemiedigkien raeriestimmiem dåarjede joekedimmien bïjre golme bieline dehtie båetije dåarjoste, bene tjïelte strerkeste guktie ryøknememaalle Snåasem tsevtsehte, akte tjïelte vaenie årrojigujmie jïh mij aadtjen aalkeme guektiengïelevoetem sjïehtesjidh tjïeltesne. Snåasen tjïelte bælla dah orre væhtah sïjhtieh dåarjoem vaeniedidh, jïh destie aaj akte vaananimmie dejstie syjhtedassijste juktie nænnoestidh jïh evtiedidh dam åarjelsaemien gïelem jïh kultuvrem tjieltesne.

 

 

Minngemosth

Saemiedigkie såårneme dah guarkah dïhte barkoe guektiengïelevoetine Noerhte-Trøøndelagesne annje daarpesje vielie vuartasjidh goh ajve vihties gïeleråajvarimmieh.

Mijjen vijriebasse barkoe reeremedajvesne saemien gïelese sæjhta annje leavloem biejedh råajvarimmide mah sïejhmelaakan åarjelsaemien gïelem jïh kultuvrem sjåahkoeh jïh      vååjnehtieh Noerhte-Trøøndelagesne.

 

Raeriestimmie orre væhtide, guktie øørnege edtja juhtedh jïh maalle guktie edtja dåarjoem guektiengïelevierhtijste ryøknedh, vååjnoe goh akte hijven våarome Noerhte-Trøøndelagen Fylhkentjielten vijriebasse barkoen åvteste, åarjelsaemien gïeline jïh kultuvrine jijtse åårganisasjovnen  sisnjelen, jïh laavenjostosne tjïeltigujmie jïh almetjigujmie Noerhte-Trøøndelagesne.

 

Vihkeles åarjelsaemien dajve ållesth dejtie vierhtide åådtje mah leah daerpies, ihke dah syjhtedassh daerpies evtiedimmien bïjre åarjelsaemien gïeleste maehtieh jåarhkesovvedh.

 

Snåasen tjielten tsiehkie guektiengïelebarkosne jïh dïhte vihties gïelebarkoe maam tjïelte dorje aaj vihkeles NIFT gaavhtan. Sïjhtebe dannasinie dejtie vihkeles momentide Snåasen tjïelten govlehtimmielahtesisnie tjïelkestidh mijjen vaastoeprievesne Saemiedægkan.

 

--