Saemiedigkieraerie lea 165.000 kråvnaj raajan prosjektese dåårjeme juktie geervehtidh jïh bæjhkoehtidh ubmejesaemien baakoegærjam mesnie 4300 ubmejesaemien baakoeh.
Voerhtjen 6. b. 2016 Saemien Parlamentarihkeles Raerie dam ubmejesaemien ortografijem byögkeles jååhkesji. Daelie dïhte minngemes barkoe baakoegærjine aajmene, jïh dïhte edtja olkese båetedh 2018.
– Vihkeles gïelen bïerkenimmien jïh evtiedimmien gaavhtan
– Ubmejesaemien terminologije baakoegærjesne sæjhta maehtedh lissiehtamme goerkesem jïh daajroem saemien jieledevuekien bïjre vedtedh, dovne skåajjesaemien jïh vaeriesaemien byjresisnie. Baakoegærja sæjhta meatan årrodh saemien ussjedimsvuekiem jïh saemien aerpievuekieh nænnoestehtedh sov sisvegen tjïrrh.
Vaenie almetjh ubmejesaemien soptsestieh nöörjen bielesne, mearan sveerjen bielesne ubmejesaemien soptsesåvva jieniebistie. Prosjekten tjïrrh baakoegærja edtja olkese båetedh goh akte versjovne ubmejesaemien-sveerjen bieline jïh sveerjen-ubmejesaemien bieline. Daate versjovne sveerjen gïelesne lea eevre daerpies ihke akte versjovne maahta båetedh nöörjen gïelesne mænngan, jïh dan gaavhtan dïhte gaagnine sjædta dan saemien siebriedahkese nöörjen bielesne.
– Bïerkenimmien jïh evtiedimmien gaavhtan ubmejesaemien gïeleste akte baakoegærja joekoen vihkeles, ij leah vihkeles mejtie baakoeh buerkiestamme sjidtieh nöörjen jallh sveerjen gïelesne. Akte baakoegærja sæjhta eevre vihkeles årrodh gosse edtja learoegærjah jïh vielie learoevierhtieh ubmejesaemien darjodh, Keskitalo jeahta.
Jaahkoegïelem nænnoestehtedh jïh vaarjelidh
Aaj göökte jeatjah gïeleprosjekth dåarjoem åådtje saemiedigkieraereste.
Guovdageaidnun Såakne 300 000 kråvnaj raajan åådtje juktie dam aerpievuekien saemien jaahkoegïelem nænnoestehtedh jïh vaarjelidh. Soejkesjen jïh åssjelen mietie maanah, noerh jïh geerve almetjh edtjieh ektesne tjåanghkenidh gusnie edtja jaahkoen gïelen jïh åtnoen bïjre terminologijeste soptsestidh. Guovdageaidnu Såakne lea aajhtseme båetije boelve ij jïjnjem daejrieh jïh ij goerkesem utnieh jaahkoen gïelese.
– Jalhts saemien soptsesåvva biejjieladtje Guovdageaidnusne lea daerpies maanah, noerh jïh geerve almetjh gaavnesjieh juktie saemien gïelem nænnoestehtedh, Keskitalo jeahta.
Saemienkuvsje
ABC Company E-skuvla AS 300 000 kråvnaj raajan åådtje SAAL 2 kuvsjem hööltedh Karasjohkesne. Daate akte jåarhkekuvsje dejtie mah ånnetji saemien maehtieh jïh leah illeme SAAL 1 kuvsjem.
–Vihkeles dah mah eah saemien dan hijvenlaakan maehtieh nuepiem åadtjoeh vielie saemien lïeredh, guktie dah maehtieh funksjonelle guektiengïeline sjïdtedh. Gosse ammesgïeleldh almetjh saemien lierieh saemien vielie åtnasåvva biejjieladtje barkoesijjine jïh privaate, dellie ij leah daerpies nöörjen åejviegïeline nuhtjedh, jïh vaallah toelhkem nuhtjedh, Keskitalo jeahta.
Bilder av sametingspresident Aili Keskitalo
Vielie bïevnesh, gaskesadth saemiedigkiepresidentem Aili Keskitalo, +47 971 29 305.