Saemien lohkemejarnge
Saemien lohkemejarnge akte vierhtiejarnge joekoen stuvreme lïerehtimmiesysteemen vööste maanagïerten raejeste jollebe ööhpehtimmien raajan. Saemien lohkemejarnge barka juktie njaalmeldh jïh tjaaleldh åtnoem saemien gïeleste eevtjedh årroji luvnie. Saemien lohkemejarnge kuvsjh, raeriestimmiem jïh bïhkedimmiem faalehte mij lea sjïehtedamme maanagïerte- jïh maadthskuvledaltesasse, jïh aaj jåarhkelïerehtæmman.
Saemien lohkehtæjjaviermie
NetSam akte laantenvijries viermie saemienlïerehtæmman mij edtja nåhtojne årrodh lohkehtæjjide jïh jeatjabidie mah saemien gïelelïerehtimmine jïh lïerehtimmine saemien gïelesne berkieh. Fåantoe man åvteste viermie tseegkesovvi lea "Utredning om samisk lærernettverk" (2010) maam Saemien Jïlleskuvle darjoeji akten dongkemen mietie Saemiedigkeste. Saemiedigkie jïh Saemien lohkemejarnge leah beetnegh vadteme juktie viermiem tseegkedh.
Learoevierhtieportaale Ovttas|Aktan|Aktesne
Ovttas|Aktan|Aktesne akte learoevierhtieportaale gusnie bievnesh tjøønghkesuvvieh saemien learoevierhtiej bïjre. Daesnie maahta aaj learoevierhtieh löönedh. Portaalesne aaj akte sijjie gusnie lohkehtæjjah jïh mubpieh maehtieh learoevierhtieh, guvvieh, tjaatsegh jïh vielie juekedh. portaalen lea bæjhkoehtimmiedïrrege digitaale learoevierhtide.
Ovttas|Aktan|Aktesne laavenjostoeprosjektine eelki gaskem Saemiedigkie jïh Statens senter for IKT jaepien 2010, jïh sertesovvi Saemien lohkemejarngese snjaltjen 2013, goh ihkuve barkoe. Saemiedigkie jïh Maahtoedepartemeente learoevierhtieportaalem finansieradieh.
Ööhpehtimmiedirektoraate
Ööhpehtimmiedirektoraate akte etaate Maahtoedepartemeenten nuelesne maanagïertese, maadthskuvlese jïh jåarhkelïerehtæmman. Ööhpehtimmiedirektoraate aktem bijjemes nasjonaale dïedtem åtna juktie gorredidh dïhte nasjonaale ööhpehtimmiepolitihke nearhka jïh maanah jïh noerh edtjieh sijjen reaktah lïerehtæmman åadtjodh.
Saemiedigkie jïh saemien learoevierhtiejarnge
Saemiedigkie aktem jïjtse saemien learoevierhtiejarngem åtna mij bïevnesh jïh bïhkedimmiem vadta saemien learoevierhtiej bïjre. Saemiedigkie aaj learoevierhtieh vuesehte ovmessie areeninie goh v.g. lïerehtimmiekonferaansh. Akte laavenjostoe gaskem learoevierhtieportaale OvttasIAktanIAktesne jïh Saemiedigkie, jïh skuvlh mah bïevnesh sijhtieh learoevierhtiej bïjre jallh sijhtieh learoevierhtieh löönedh, mah saemien learoevierhtiejarngesne gååvnesieh maehtieh tjaangedh Ovttas|Aktan|Aktesne .
Maahta aaj Saemiedigkiem gaskesadtedh dastegh bïevnesh jallh bïhkedimmiem sæjhta saemien lïerehtimmien bïjre.