Åvteprosjekte juktie åarjelsaemien maanagïertem tseegkedh Röörosne, saemien beapmoe-aerpievuekieh, gïeleevtiedimmie jïh joejke maanagiertesne leah naaken dejstie prosjektijste mah dåarjoem åådtjeme saemiedigkieraereste.
-Dan åvteste saemien siebriedahke dan gellielaaketje dellie doh ovmessie maanagïerth tjuerieh våaroemasse bïejedh dam voenges kultuvrem sov maanagiertesne. Gellie jeerehtsh gååvnesieh daan beajjetje maanagiertine magkeres gïelefaalenasse maanagïerte vadta, jïh mejtie dïhte voengen saemien kultuvre maahta våaroemasse bïejesovvedh maanagïerten barkosne. Prosjekteohtsemh gellievoetem jïh voenges daerpiesvoeth maanagiertine vuesiehtieh, saemiedigkieraerie Silje Karine Muotka jeahta.
Saemiedigkie lea govhte prosjekth dåårjeme. Árran mánájgárdde lea 150 000 kråvnah åådtjeme akten prosjektese man ulmie lea maanaj njaalmeldh gïeleevtiedimmiem nænnoestehtedh. Dam edtja darjodh viehkine aktede gïeletjiehpiedæjjeste mij lissine båata dejtie sïejhme barkijidie. Ástávuona sámi mánáidgárdi lea 150 000 kråvnah åådtjeme akten prosjektese man ulmie lea saemien gïelelïerehtimmiem maanaj luvnie lissiehtidh, jïh gïelebiesiemetodihkem abpe maanagïertesne sjïehtesjidh. Aajege saemien gïele- jïh maahtoejarnge lea vierhtieh åådtjeme akten åvteprosjektese juktie åarjelsaemien maanagïertem tseegkedh Röörosne, jïh 110 000 kråvnah åådtjeme.
Vierhtieh aaj vadtasovveme unnebe prosjektide mah edtjieh dam saemien voenges kultuvrem eevtjedh julev- jïh åarjelsaemien dajvine. Snåasen montessorimaanagïerte lea dåarjoem åådtjeme göökte prosjektide. Prosjekte saemien beapmoe Snåasen montessorimaanagïertesne edtja ulmine utnedh saemien beapmoe-aerpievuekiej bïjre lïeredh jïh saemien gïelem lïeredh daan aerpievuekien sisnjelen. Prosjektine joejke maanagïertesne dah sijhtieh viehkiehtidh guktie maanah vielie åahpenieh åarjelsaemien musihkeaerpievuekiejgujmie jïh åarjelsaemien gïeline viehkine joejkeste/vueleste. Holtet maanagïerte lea 32 000 kråvnah åådtjeme juktie prosjektem aerpievuekien låavthgåetie gïelesijjine tjïrrehtidh, man ulmie lea aktem sijjiem sjugniedidh saemien gïelese jïh kultuvrese maanagïertesne.
Dåarjoeh pedagogeles materijellese jïh stååkegaevnide
Dåarjoeöörnegen ulmie lea pedagogeles materijellem jïh stååkegaevnieh evtiedidh mah åtnasuvvieh maanagiertine saemien maanagïertefaalenassine. Dåarjoedåastojh daan dåarjoeöörnegasse leah bertemh jïh faagebyjresh maanagïertigujmie ektine.
Prosjekth mah våaroehtamme sjidtieh leah gïeleskreejrije materijelle, goh trygkeme spïelh jïh nossemespïelh jïh applikasjovnh mah leah sjiehteles maanide aaltarisnie 0-3 jaepieh.
Ohtsemesumme lij bijjelen 5,8 millijovnh kråvnah jïh daelie dåårjeme ånnetji vielie goh 3 millijovnh juktie gïeleskreejremematerijellem evtiedidh.
Vierhtieh leah joekedamme njieljie prosjektide:
ČálliidLágádus as: Nossemespïele - taalh jïh klaerieh dejtie unnemesidie noerhte-, julev- jïh åarjelsaemien
Intempo AS: Bravo-stååkedimmie jarkoestamme jïh sjïehtedamme saemien gïelese - aelhkiehtamme applikasjovne smarttellefovnide noerhte-, julev - jïh åarjel
GROM as: Troll i ord – saemien heamtureaeskie noerhte-, julev- jïh åarjelsaemien
Davvi Girji: 6 nossemespïelh noerhtesaemien
-Dej stoerre jeerehtsi gaavhtan maanaj gïelemaahtosne dellie akte haesteme sjædta gïeleskreejremasse sjïehteladtedh. Maanagïerth tjuerieh dan åvteste faalenassem evtiedidh maanaj gïeleevtiedimmien jïh maadtoen mietie. Eevre vihkeles pedagogeles materijelle jïh stååkegaevnieh gååvnesieh maanagiertine aelhkieslaakan. Daate lea vihkeles juktie våaromem bïejedh maanaj stååkedimmide jïh darjoemidie, jïh aaj öörnedimmien gaavhtan ovmessie lïerehtimmietsiehkide, saemiedigkieraerie Silje Karine Muotka jeahta.
-Pedagogeles materijelle jïh stååkegaevnieh edtjieh viehkiehtidh guktie barkijh jïh maanah ektesne saemien nuhtjieh goh stååkedimmiegïele, lïerehtimmiegïele jïh veeljieh saemien nuhtjedh gosse jeatjah saemiengïelen almetjigujmie ektine, Muotka jeahta.
Dåarjoe saemien maanagïertide jïh maanagïertide saemien goevtesinie
Öörnegen bijjelen 6 604 700 kråvnah leah dåarjojne vadtasovveme saemien maanagïertide jïh maanagïertide saemien goevtesinie maanagïertide.
Dåarjoe lea aerviedamme mestie man gellie saemien goevtesh leah maanagïertesne jïh man gellie saemiengïelen barkijh goevtesinie (gaertjiedamme bæjjese göökte saemiengïelen barkijidie fïerhtene goevtesisnie). Dåarjoe lea vadtasovveme dovne privaate jïh tjïelten saemien maanagïertide.
Joekedimmie lea naemhtie:
Altan tjïelte: 650 000 kråvnah leah joekedamme 3 maanagïertide
Guovdageaidnun tjïelte: 2 156 000 kr leah joekedamme 7 maanagïertide
Karasjohken tjïelte: 968 700 kr leah joekedamme 3 maanagïertide
Nesseby tjïelte: 520 000 kr leah vadteme akten maanagiertese
Porsangeren tjïelte: 390 000 kr leah joekedamme 3 maanagïertide
Deatnun tjïelte: 520 000 kr leah joekedamme 3 maanagïertide
Lavangen tjïelte: 130 000 kr leah vadteme akten maanagïertese
Målselv tjïelte: 130 000 kr leah vadteme akten maanagïertese
Nordreisa tjïelte: 130 000 kr vadteme akten maanagïertese
Evenes tjïelte: 260 000 kr leah vadteme akten maanagiertese
Tromsø tjïelte 390 000 kr lea vadteme göökte maanagïertide
Oslo tjïelte: 260 000 kr lea vadteme akten maanagïertese
Vielie bïevnesh: Saemiedigkieraerie Silje Karine Muotka, 984 87 576
Lohkh vielie: http://sametinget.no/nor/Opplaering/Barnehager