Jaepien 2018 raejeste Saemiedigkie “superstipendem” 50.000 kråvnine vadta fïerhten jaepien dejtie mah maadthskuvlelohkehtæjjaööhpehtimmiem saemiengïeline faagegievlesne jallh maanagïertelohkehtæjjaööhpehtimmiem vaeltieh.
Saemiendigkien stoerretjåanghkoe lea nænnoestamme ajve studenth maanagïertelohkehtæjjaööhpehtimmesne jïh ovmessie lohkehtæjjaööhpehtimmine stipendem jollebe ööhpehtæmman Saemiedigkeste åadtjoeh daan jaepien, dan åvteste joekoen gellie saemiengïeleldh lohkehtæjjah maanagïertesne jïh maadthskuvlesne fååtesieh.
Tjaktjen 2018 maasterinie åarjel- jïh julevsaemien lohkehtæjjaööhpehtimmesne 1-7 aalka Noerhte Universiteetesne, mearan Saemien Jïlleskuvle sov maadthskuvlelohkehtæjjaööhpehtimmiejgujmie 1-7 jïh 5-10 eelki tjaktjen 2017. Studenth daejnie ööhpehtimmine maehtieh stipendem dåastodh Saemiedigkeste. Superstipende aaj vadtasåvva dejtie mah saemien voestes- jallh mubpiengïeline åtneme jåarhkeskuvlesne jïh mah maasterem vaeltieh maadthskuvlelohkehtæjjaööhpehtimmesne saemien gïeline goh jïjtse faage, jallh maanagïertelohkehtæjjaööhpehtimmesne. Saemiedigkien stipendenjoelkedassh daesnie gaavnh.
Lissine lohkehtæjjah barkoem åadtjoeh ööhpehtimmien mænngan, joekoen åajvoeh öörnegh aaj tseegkesovveme juktie lohkehtæjjaööhpehtæmman skreejrehtidh. Statens lånekasse studijelaajkoem tjeavede dejtie mah lohkehtæjjaööhpehtimmiem vaeltieh normeradamme tïjjen sisnjelen, jïh jïjtse öörnegh åtna Noerhte-Nöörjese jïh dejtie mah saemien vaeltieh goh akte bielie lohkehtæjjaööhpehtimmeste. Lohkh vielie njoelkedassi bïjre Statens lånekassen nedtesæjrojne daesnie jïh daesnie.
Ohtsememierie jollebe ööhpehtæmman lea voerhtjen 15. b.