Aarborten tjïelteståvroe nænnoesti aktine åvteprosjektine nïerhkedh eevre jåvli åvteli, juktie tjïeltem meatan åadtjodh saemien gïelereeremedajvesne. – Manne joekoen geerjene ihke jienebh tjïelth åarjelsaemien dajvesne sijhtieh meatan årrodh dam åarjelsaemien gïelem evtiedidh jïh eadtjoestidh, raerielïhtsege Ellinor Marita Jåma jeahta.
Dastegh tjïelte sjæjsjele ohtsedh mejtie åådtje meatan sjïdtedh, dle daate sæjhta dïhte sæjhta dïhte gåalmede tjïelte årrodh åarjelsaemien dajvesne, mij saemien gïelereeremetjïeltine sjædta. Tsïengelen 1. biejjeste daan jaepien dle aaj Raavrevijhken tjïelte meatan vaaltasovvi reeremedajvesne, mearan Snåasen tjïelte saemien gïelerreeremetjïeltine orreme 2008 raejeste.
- Gosse Aarborten tjïelte sæjhta salkehtidh mejtie nuepie gååvnese saemien gïelereeremetjïeltine sjïdtedh, dle dïhte akte vihkeles dïjrem vadta dejtie åarjelsaemien årroejidie tjïeltesne, Jåma jeahta.
Saemiedigkieraerie sæjhta tjïelth mah leah saemien gïelereeremedajvesne, edtjieh båetijen aejkien gïelevierhtietjïeltine sjïdtedh. Daate lea akte dejstie raeriestimmijste mejtie buakteme Saemiedigkiebïevnesisnie saemien gïelen bïjre, jïh maam Saemiedigkien stoerretjåanghkoe edtja gïetedidh goevten minngiegietjesne. Dastegh naemhtie sjædta, dle Aarborten tjïelte sæjhta – jis hijven nænnoestimmiem dan bïjre dorje – gïelevierhtietjïeltine sjïdtedh, gusnie dah saemien årrojh jïh mubpieh mah dam sijhtieh, vijriedamme reaktah åadtjodh åtnoen jïh lïerehtimmien bïjre saemien gïeleste.
- Manne Aarborten tjïeltem læhkohtem daejnie åvteprosjektine, jïh aavodem akten hijven jïh skreejrije laavenjostose gusnie Saemiedigkie hævvi sæjhta raerine jïh bïhkedimmine viehkiehtidh daennie barkosne, Jåma minngemosth jeahta.
Govlehtallije:
Raerielïhtsege Ellinor Marita Jåma, tell. 916 13 460.