Saemiedigkieraerie sæjhta darjomem lissiehtidh saemien kultuvrejieliemisnie jïh jieliemisnie gusnie kultuvre lea betnesne, jïh aktem dahkoesoejkesjem daan jieliemasse buakta daan biejjien. Daate lissine båata dan joe stoerre barkose Saemiedigkie saemien kåanstesne jïh kultuvresne åtna.
Daan biejjien jïjnjh tjiehpies saemien tjiehpiedæjjah jïh kultuvrebarkijh utnebe mah sijhtieh sijjen vaaroeh jallh dïenesjh akten kommersijelle maarkedese doekedh. Dïhte mij lea tjåenghkies dejtie lea dïhte dorjese jallh dïenesje maam dah faalehtieh våaromem åtna kåanste- jallh kultuvrevuekesne. Suerkie aktene murreds evtiedimmesne jïh nuepiem åtna vihkeles jielemegeajnojne saemide sjïdtedh båetijen aejkien.
- Saemiedigkieraerie sæjhta dahkoesoejkesjisne tjelmide bïejedh joekoen daejtie suerkide viermie, maahtoedaerpiesvoete, maeksijevoete jïh dïhte etihken vuajnoe kultuvrine goh jieleme. Kåanste jïh kultuvre nuepiem utnieh hijven barkoesijjieh vedtedh, jïh akte vihkeles bielie årrodh saemien jieliemistie. Daate lea akte jienebh fåantojste man åvteste mijjieh joekoen daam jielemem dåarjoehtibie daelie, saemiedigkieraerie Vibeke Larsen jeahta.
Goh akte dejstie åejvieråajvarimmijste dahkoesoejkesjisnie dle Saemiedigkie sæjhta aktem maahtoe- jïh viermieprosjektem bæjhkoehtidh saemien kultuvrejielemeaktööride. Daesnie dah aktöörh maehtieh faageles tjåanghkojde gaavnesjidh juktie jïjtse åssjaldahkem jïh sïeltem nænnoestehtedh, jïh aaj viermieh tseegkedh mubpiejgujmie mah dejnie seamma berkieh. Prosjekte aaj mentovrh jïh bïhkedimmieviehkiem faalehte aktööride. Fokuse etihkese, maeksijevoetese jïh maahtoelutnjemasse sijhtieh vihkeles biehkieh årrodh daennie prosjektesne.
- Mijjieh gujht vïenhtebe daate prosjekte sæjhta jienebh kultuvreaktöörh viehkiehtidh buerebe jielemebarkijinie sjïdtedh, jïh dejtie jïjtjejearsoesvoetem jïh daajroem vedtedh veartenem vaeltedh sijjen dorjesigujmie, saemiedigkieraerie Vibeke Larsen jeahta.
Akte jeatjah råajvarimmie lea evtiedimmieprogramme dejtie joe tseegkeme saemien kultuvrejielemebarkijidie aktine nasjovnaale jallh gaskenasjovnaale nuepine. Saemiedigkieraerie sæjhta naemhtie barkijidie viehkiehtidh orre maarkedh jaksedh sijjen joe gaavnoes dorjesigujmie.
Saemiedigkie sæjhta aaj sjïehteladtedh akten fïerhten jaepien konferansese saemien kultuvrejieliemasse jïh saemien kultuvrejielemen bïjre, jïh aaj tjïerteste ihke daerpies dotkeminie kultuvrejieliemisnie jïh kommersijaliseradimmesne saemien kultuvreste.
Govlehtallije
Saemiedigkieraerie Vibeke Larsen, tell: 941 30 116