Duarstan akte aarvoesjugniedimmieanalyjse nöörjen fealadasseste bööti, maam reerenasse dongkeme, mij sæjhta jielemen gaahtjemefaamoem nænnoestehtedh. Eatneme jïh kultuvre åvtese geasalgieh goh dïhte jarnge Nöörjen fealadassedorjesisnie.
- Eatneme jïh kultuvre lea ojhte dïhte juvele Nöörjen fealadassesne, jïh goh akte guhkiedimmie destie sïjhtem jielemedepartemeentem tipsadidh akten stoerre vierhtien bïjre mij vaenie åtnasåvva daan biejjien, Saemien fealadasse! Dah dorjesh mah daesnie faalasuvvieh åajvahkommes gaajhkine burhtjine sjiehtieh, dååjreseturisme mij eatnemem våaroeminie åtna, monnehke eatnemeåtnoe, kultuvre jïh histovrije. Akten gaskenasjovnaale åålmegasse die saemien fealadassedorjesh dovne ammes jïh tjïelke jïh stinkes, jïh Nöörje goh fealadassenasjovne maahta gaajhkem vitnedh jis sæjhta daam dåarjoehtidh, saemiedigkieraerie Silje Karine Muotka jeahta.
Dïhte reektehtsen visjovnh dåarjohte mij jeahta fealadasse edtja aarvoeh sjugniedidh, jïh jïjtje aktem visjovnem åtna saemien fealadassebyjrese eannan 5 jaepieh edtja dejstie uvtemes veartenisnie årrodh kultuvre- jïh fealadasseråajvarimmine aalkoealmetji gaskem. Muotka tjïerteste dam joekoen stoerre sjïdtedimmiem maam fealadasse Noerhte-Nöörjesne åtna, jïh jeahta dïhte saemien dorjese hævvi aktem sijjiem daesnie åtna.
- Nov lea gellie fåantoeh man åvteste turistejielemem noerhtene sjïdteminie, gaskem jeatjah dïhte sjïere eatneme jïh goeksegh. Men aaj sjïdteminie akten våajnoes jïh tjarke jielije saemien jïh noerhtenöörjen kultuvren gaavhtan, mesnie ahkedh jienebh leah meatan jïh maam ahkedh jienebh sijhtieh dååjredh. Daesnie abpe veartenen nuepieh mijjen uvte utnebe hijven laavenjostoen tjïrrh jïh evtiedimmien tjïrrh hijven paahkijste.
Muotka seamma tïjjen vaarohte ij laejhtehks årrodh akten dejstie mearhketjijstie reektehtsisnie, mij leah stoeredahken bïjre fealadasseråajvarimmine.
- Manne mietehtem stuerebe sïelth aktem stuerebe aarvoesjugniedimmiem utnieh, men tjoerebe mujhtedh jïjnjh mijjen dorjesijstie tjïelkevoetem jïh lïhkesvoetem eatnamasse faalehtieh, dah ektiedïejvesen nualan båetieh manne nomme ekoturismese. Dejtie dïhte onne maahta hijven årrodh jïh mijjieh byörebe dejtie skreejredh guktie dah evtiesuvvieh. Aaj daesnie doh ektieråajvarimmieh vihkeles, men ahkedh jienebh turisth sijhtieh dam onne jïh lïhke utnedh, Muotka minngemosth jeahta.