Edtja 39 tjïrkijh veeljedh Saemiedægkan.
Gosse veeljemegåetieh steegkieh, edtja gaajhkh åvtelhbodti steemmah jïh steemmah veeljemebiejjeste ryöknedh. Veeljemejoekedimmie lea göökte aejkieh. Voestegh edtja sjæjsjalidh man gellie tjïrkijesijjieh fïereguhte krirrie jallh læstoe edtja utnedh Saemiedigkesne.
Dan mænngan tjuara sjæjsjalidh mah kandidaath krirreste/læstoste mah edtjieh daejtie sijjide utnedh (kandidaateveeljeme).
Joekedimmie mandaatijste
Öörnege lea naemhtie, edtja tjirkijesijjide joekedidh krirriej/dåehkiej gaskem steemmelåhkoen mietie maam fïereguhte veeljemelæstoe åådtje. Prinsihpe gohtjesåvva forholdveeljeme.
Mandaatejoekedimme dej ovmessie læstoej gaskem dorjesåvva viehkine dehtie seamma matematihken vuekeste, dovne stoerredigkieveeljemasse, fylhkendigkieveeljemasse jïh tjïelteståvroeveeljemasse. Vuekie gohtjesåvva St. Laguës vuekie. Dellie fïereguhte læstoen steemmelåhkoe taalline 1,4 juakasåvva, jïh dan mænngan taalligujmie 3-5-7-9 jnv. Daejnie juakadimmine gellie taallh båetieh, maam kvotientine gohtje. Dah kvotienth stoeredahken mietie öörnesåvva. Joekede tjirkijesijjide dejtie læstojde mah dejtie stööremes kvotientide utnieh. Dïhte voestes mandaate jåhta dan læstose mij dam stööremes kvotientem åtna, mandaate nr. göökte disse mij dan mubpie stööremes kvotientem åtna, jnv.
Kandidaateveeljeme
Gosse tjïrkijesijjide læstojde joekedamme, edtja kandidaateveeljemem darjodh. Dïhte naemhtie dorjesåvva:
Kandidaateveeljemisnie voestegh ajve dejtie nommide ryöknoe mah leah nr. 1 steemmeleahpine. Dïhte guhte jeenjemes steemmah åådtje daennie ryöknemisnie veeljesåvva. Dan mænngan dejtie ryöknoe mah nr. 2 steemmeleahpine. Dïhte kandidaate mij jeenjemes steemmah åådtje, gosse tjåanghkan beaja illedahkide gåabpagihtie ryöknemistie, jïh ij meatan vaeltieh dam mij joe lea veeljeme, veeljesåvva. Naemhtie gïehtele guktie gaajhkh kandidaath veeljeesovveme.
Ihke veeljiji jarkelimmieh steemmeleahpine edtja maam akt jiehtedh persovneveeljemasse, dle bijjelen lehkie krirrien veeljijijstie lea tjoereme jarkelimmieh darjodh dennie seamma kandidaatesne.