Stoerredigkie lea nænnoestamme Saetniesvoete- jïh måahtadimmiekommisjovnem tseegkedh, mij edtja salkehtidh mah konsekvensh daaroedehtemepolitihke Nöörjesne leah vadteme. Saemiedigkieraerie Inger Eline Eriksen Fjellgren lij Stoerredigkesne gosse aamhtesem digkiedin jïh dïhte joekoen madtjeles nænnoestimmine.
– Saemiedigkie lea hijvenlaakan laavenjosteme jeenjesigujmie jïh dan åvteste libie lyhkesamme daam kommisjovnem åadtjodh.
Ektie strategijem darjoejin
Fjellgren laavenjostoem Saemiedigkien voereseraerine sjïerelaakan neebnie.
– Saemiedigkie lea gijhteles dan barkoen åvteste maam Saemiedigkien voereseraerie lea dorjeme daennie aamhtesisnie gellie jaepieh. Joekoen lij hijven dah lin meatan dennie ræhpas govlehtimmesne Stoerredigkesne. Joekoen vihkeles Stoerredigkie åadtjoeji dååjrehtimmieh govledh båarasåbpoe almetjijstie, jïh maam dah leah dååjreme staaten politihken gaavhtan.
Saemiedigkieraerie Fjellgren varke aktem tjåanghkoem utni Trygg Jakoline Nöörjen kveeni siebresne. Desnie strategijh ektesne hammoedin guktie edtjin aktem dagkeres kommisjovnem åadtjodh. Daan tjåanghkoen mænngan Saemiedigkie aktem prieviem seedti fylhkentjïeltide saemien dajvine, gusnie dåarjoen bïjre birrimh juktie kommisjovnem tseegkedh, jïh dam leah dan mænngan dorjeme.
Dåarjoe gærhkoste lij hijven viehkie
Saemiedigkie aaj hijvenlaakan govlesadteme Saemien gærhkoeraerine, jïh dej dåarjoe stoerre nåhtoe orreme.
– Gærhkoe jïh staate leah aadtjen joekehtadteme. Gærhkoe annje aktem vihkeles sijjiem åtna dovne Saepmesne jïh abpe Nöörjesne, jïh aaj stoerredigkien tjirkiji gaskem. Saemieh tuhtjieh hijven gærhkoe mijjem dåarjohte daennie barkosne. Tjoerebe aaj mujhtedh voejkenevoetem gorredidh daennie måahtadimmiebarkosne. Gærhkoe dam maahtoem åtna mij lea daerpies, Fjellgren jeahta.
Dastegh gihtjehtimmiem sïjhth, govlesadth saemiedigkieraerine Inger Eline Eriksen Fjellgren, tel. 414 58 703.