Nasjonaale daajroejarnge vædtsoesvoeten jïh traumatiske raessien bïjre (NKVTS) goerehtimmiem vædtsoesvoeten bïjre lïhke fuelhkine saemien siebriedahkine tjïrrehti, jïh reektehtse bæjhkoehtamme sjïdti Saemiedigkesne njoktjen 8.b. 2017 Karasjohkesne.
Reektehtse «Jis doesth gihtjedh, almetjh duestieh vaestiedidh» våaroeminie åtna soptsestimmieh faagealmetjigujmie jïh viehkieabparaatine saemien dajvine, jïh tjoevkesem beaja guktie viehkieabparaate dååste saemien almetjh mah vædtsoesvoetem dååjreme. Reektehtse aaj goerehte mejtie lea tsiehkieh saemien siebriedahken sisnie jallh ålkolen mah tsevtsieh man jïjnje vædtsoesvoete lea.
Tjuara illedahkide itjmieslaakan vaeltedh
- Reektehtsisnie tjïelke sjædta jeenjesh vuelege seahkarimmiem åtna pollisese jïh viehkieabparaatese, dan åvteste viehkieabparaate gaskem jeatjah ij leah gïele- jïh kultuvremaahtoem utnieh, saemiedigkieraerie Mariann Wollmann Magga jeahta.
- Tjoerebe illedahkide itjmieslaakan vaeltedh jïh åejvieladtjh tjuerieh råajvarimmiejgujmie nierhkedh saemien siebriedahkine, tjïeltigujmie jïh Saemiedigkine ektine. Reektehtse akte vihkeles dïrrege daennie barkosne, Magga jeahta.
Saemiedigkieraerie Mariann Wollmann Magga jeahta åssjele tjåanghkoejgujmie lea reektehtsem åehpies darjodh tjïeltide, jïh soejkesjem åadtjoem guktie tjïelth maehtieh jarkelimmieh darjodh juktie buerebe faalenassem vedtedh dejtie mah vædtsoesvoetem lïhke fuelhkine dååjroeh.
- Aaj vaajteles daejredh maam tjïelte Saemiedigkeste veanhtede dennie guhkiebasse barkose åvtese, Magga jeahta.
Saemiedigkiepresidente Vibeke Larsen jïh raerielïhtsege Mariann Wollmann Magga tjåanghkoem utnieh maana- jïh mïrrestallemeministerinie Solveig Horne jïh staatetjaeliejinie Justijse- jïh riejriesvoetedepartemeentesne duarstan ruffien 15.b. dan guhkiebasse barkoen bïjre reektehtsistie.
Voestes tjåanghkoe reektehtsen bïjre lij ruffien 7.b. Tromsøen tjïeltine. Edtja aaj akte tjåanghkoe årrodh Snåasen tjïeltine ruffien 12.b. Lissine lea maadteme akten tjåanghkoen bïjre Divtasvuodnan tjïeltine, men ij leah annje tjïelke gåessie.
Daesnie maahtah vielie lohkedh:
Artikkel: Om du tør å spørre, tør folk å svare
Kronikk: Ikke vær taus
Last ned og les rapporten "Om du tør å spørre, tør folk å svare"
Lahtestimmieh:
Saemiedigkieraerie Mariann Wollmann Magga, mob. 977 02 350