Karin Tuolja lea abpe sov geerve jieledem julevsaemien gïeline barkeme sveerjen bielesne. Dïhte lohkehtæjjine, jarkoestæjjine, learoevierhtieevtiedæjjine jïh korrektuvrelohkijinie barkeme. Tuolja akte vihkeles almetje julevsaemien gïelebyjresisnie, jïh aktem vihkeles råållam åtneme gïelelaavenjostosne nöörjen jïh sveerjen bielien gaskem, joekoen gosse lea evtiedimmien bïjre baakojste jïh teermijste, jïh jarkoestimmien bïjre Bijpelistie.
Jekaterina Mechkina daan jaepien Gulliegïele-baalhkam åådtje dov guhkies barkoen åvteste juktie kildinsaemien Russlaanten bielesne nænnoestehtedh. Dïhte meatan orreme barkosne baakoeveahkam evtiedidh jïh jïjtse kildinsaemien baakoegærjam evtiedidh. Mechkina lea gærjah tjaaleme, gærjah jarkoestamme jïh learoevierhtieh evtiedamme. Altese gærjaj tjïrrh jeenjesh leah kildinsaemiej jieliedinie jïh kultuvrine Murmansk-dajvesne åahpenamme.
Gaaktseden aejkien
Gulliegïele - Noerhtelaanti saemien gïelebaalhka gaaktseden aejkien vadtasåvva. Gïelebaalhka edtja viehkiehtidh dejtie saemien gïelide Nöörjesne, Sveerjesne, Såevmesne jïh Russlaantesne eevtjedh, evtiedidh jïh vaarjelidh.
Gïelebaalhka maahta aktegsalmetjidie, siebride jallh institusjovnide vadtasovvedh mah aktem stoerre barkoem dorjeme juktie saemien gïelh eevtjedh.
Hijven åvteguvvieh
Saemiedigkiepresidente Aili Keskitalo jïh staateraerie Monica Mæland Tjïelte- jïh orrestimmiedepartemeente gåabpegh baalhkavitnijh læhkoehtieh.
– Gåabpegh baalhkavitnijh leah hijven åvteguvvieh, jïh leah vihkeles barkosne juktie julev- jïh kildinsaemien nænnoestehtedh, staateraerie Monica Mæland jeahta, tjïelte- jïh orrestimmiedepartemeentesne.
– Gellie hijven raeriestimmieh kandidaatide orreme mah aktem stoerre barkoem saemien gïeli åvteste dorjeme. Raeriestimmieh mahte gaajhkh gïeledajvh feerhmieh, jïh stoerre variasjovnem jïh gamtoem vuesiehtieh. Dovne siebrieh jïh aktegsalmetjh, aerpievuekien jïh daajbaaletje gïelesuerkieh leah nammoehtamme jïh vuarjasjamme sjïdteme. Dan stoerre ïedtjen gaavhtan baalhkan bïjre, jïh dej gellie hijven jïh ovmessie kandidaati gaavhtan dellie doh saemien gïelh aktem hijven båetijen aejkien åadtjoeh, saemiedigkiepresidente Aili Keskitalo jeahta.
Neeta Jääsko, Såevmeste, David Kroik Sveerjeste, Nina Afanasieva Russlaanteste, Solvår Knutsen Turi jïh Jane Juuso Nöörjeste leah meatan orreme veeljememoenehtsisnie.
Baalhka vadtasåvva Oslosne gålkoen 26. b. Karin Tuoljese, jïh Murmanskesne gålkoen 29. b. Jekaterina Mechkinese.
Vielie bïevnesh:
Saemiedigkiepresidente Aili Keskitalo, 971 29 305
Buerkiestimmie: