Datne naakenem damth mah viehkiehtamme mïrrestallemem buektiehtidh saemien siebriedahkine? Saemien parlamentarihkeles raerie sæjhta maaje dam jallh dejtie earoehtidh Noerhtelaanti saemien mïrrestallemebaalhkine.
- Saemien parlamentarihkeles raerien åvteste sïjhtem saemien siebrieh jïh institusjovnh bööredidh raeriestimmiejgujmie båetedh kandidaatide dan baalhkese, presideente Egil Olli jeahta.
- Mïrrestalleminie jïh seammavyörtegsvoetine barkedh nyjsenæjjaj jïh kaarri gaskem lea daamtaj akte guhkies barkoe mij dovne vissjelesvoetem jïh heartoeh kreava. Dannasinie vihkeles dam barkoem våajnoes darjodh jïh dam earoehtidh, Olli vihth.
Maahta baalhkam vedtedh aktegsalmetjidie, dåehkide, sïeltide, siebride, tjïertide, skuvlide jallh jeatjah byögkeles etaatide mah leah eadtjohke dagkeres barkosne, jallh mah leah råajvarimmieh tjïrrehtamme mah leah mïrrestallemem eadtjoestamme jïh nænnoesåbpoe dorjeme rïektesisnie. Daate mubpien aejkien baalhka juakasåvva. Vïjhten jaepien gietjeste dle Risten Rauna Magga baalhkam åadtjoeji altese barkoen åvteste saemien gïeline, saemien healsoedïenesjh jïh barkoe geeruveåtnoen vööste.
- Daejnie baalhkine dle Saemien parlamentarihkeles raerie sæjhta skreejredh stuerebe barkose mïrrestalleminie jïh seammavyörtegsvoetine kaarri jïh nyjsenæjjaj gaskem laanteraasti dåaresth, saemien siebriedahkine, Olli jeahta.
Saemien parlamentarihkeles raerien ståvroe sjæjsjele gie baalhkam åådtje. Mïrrestallemebaalhka lea akte tjeahpoe jïh beetnegh, tjåanghkan dle aarvoe € 10 000. Sæjhta baalhkam vedtedh konferansesne ”Kaarri jielede aktene saemien ektiedimmesne” (Menns liv i en samisk kontekst), gålkoen 1.b. Tromsøsne.
Dïhte mierie juktie kandidaatigujmie båetedh lea rïhkeden 3.b. 2012.
Raeriestimmieh seedtesuvvieh Saemiedægkan Nöörjesne:
Sametinget
Ávjovárgeaidnu 50
9730 Karasjok/Kárášjohka.
Jallh: samediggi@samediggi.no.
Govlehtallije:
Presideente Egil Olli, tel. 900 26 880.